Нина Питиримовна Поздеевакöд аддзысим Сыктывкарса Печать керка дорын, кытчö вöлі локтöма "Коми му" газетла. Пошта пыр пö судзöдігöн вывті уна колö мынтыны да ачым волывла быд вежон четвергö "Коми мула". Тайö газетсö пö дыр нин лыддя.
Кыдз ачыс висьталіс, торйöн ёна воöны сылы сьöлöм вылас коми сикт-грездса войтырлöн олöм-вылöм йылысь майшöдлана да восьса гижöдъяс.
Нина Питиримовна Поздеевалöн вужъясыс Емдін районса Йöрöсдін грездысь. Сэні коркö овлöмаöсь-вывлöмаöсь бать-мамыс. А сэсся вуджöмаöсь Сыктывкарö.
Батьыс, Питирим Васильевич, уджалöма милицияын. Воюйтöма Великöй Отечественнöй война вылын. Бергöдчöма гортас первой группаа инвалидöн. Но зільöма на татчöс лестехникумын комендантöн. Семьяын быдмисны квайт челядь.
Найöс колö вöлі вердны. Мамыс,
Анна Касьяновна, школаын пачьяс ломтылöма.
– Ичöтдырсянь гортын став уджсö вöчлім, – висьталö Нина Питиримовна. – Видзим кöзаясöс, ыжъясöс. Бöрынджык мам-бать мöс лöсьöдісны. Найöс колö вöлі дöзьöритны, гожöмъясын кöрым отсавны заптыны. А школа помалі да пыри уджавны Выльтыдор посёлокса пилорамаö. Уна челядьнад бать-мам водзö велöдны эз вермыны. Бöрынджык сэсся ломтас-мавтасöн могмöді катеръяс. Выльтыдор посёлокас, кöні и олам верöскöд, вöлі катеръяслöн затон. Сэні уджаліс пенсия вылас петтöдз верöсöй, Александр Михайлович Петрунев, капитан-механикöн. Зэв унаысь сэки сійöс бур уджысь пасйывлісны.
Кыдзи висьталö Нина Питиримовна, öнія сьöкыд ка-дö карса олысьясыд кыдзкö-мыйкö бергöдчöны, а сиктсаясыдлы талун, видз-му овмöсыд киссис да, торйöн нин сьöкыд. Уджыд абу. Унаöн эновтöны чужаніннысö. Но и бокад найöс оз ёна некод виччысь. А сэк кості сиктын вочасöн кусö олöмыс. Сійö жö Йöрöсдін грездас, кöні коркö сылöн бать-мамыс овлöмаöсь да коді уна йöза вöлöма, талун сöмын морт-мöд-коймöд пöрысь пöль-пöч пиысь нэмсö коллялöны.
– Оз во сьöлöм вылö сійö, мый Коми муын оз ёна пыдди пуктыны коми кывсö и асьныс комиясыс, и мукöд сёрниа войтырыс, – майшасьöмпырысь сод-тö Нина Питиримовна. – Шыöдчывла мукöддырйи öткымын дорö чужан кыв вылын. Тöда, мый комиöсь. А найö меным рочöн вочавидзöны. Тыдалö, яндысьöны ас кывсьыныс. Таысь водзö сэсся некытчö нин. Асьным кö ог кöсйöй сёрнитны комиöн, коді сэсся миянлысь кывтö пондас пыдди пуктыны. Со тай Кавказысь петлöм кык морт кö паныдасясны, сöмын ас ногныс швач-кöны-сёрнитöны. Весиг завидь босьтлö на вылö видзöдігöн.
Майшöдлö авъя аньöс и сійö, мый миян учреждениеясын чиновникъяс сідзжö оз кöсйыны тöдны коми кывтö, кодöс шуöма государственнöйöн. Пыр лоö на дінö рочöн шыöдчыны. Со и колö пö, мед "Коми му" газет велöдіс пыдди пуктыны вужвойтырлысь кывсö и сы вылын сёрнитысьясöс, и мукöд кыв вылын варовитысьясöс. А ми пö гортын верöскöд сöмын комиöн и сёрнитам. Сійö пö миянлы медмуса.
