"Рытыв-Войвыв Телекомлöн" Коми юкöн отсöгöн Сыктывкар, Санкт-Петербург да Финляндияысь Инари костын видеопос нуöдісны август 25 лунö Рытыв-Войвыв кытшын Коми Республикаса представительство, Россияса финн-йöгра культура шöрин, "Коми войтыр" öтмунöм. Общественнöй котыръясын зільысьяс сёрнитісны рöдвуж войтырлысь кывсö да культурасö видзöм-сöвмöдöм йы лысь.
"Кыв поз"
Нёль странаын – Финляндияын, Швецияын, Норвегияын да Россияса Кола кöджын – олöны саам войтыр. Быттьö и абу унаöнöсь, но öкмыс войтырсикас вылö на юксьöны. Финляндияса Инари муниципалитетын государственнöйöн лоöны финн, войвывса саам, колт-саам да инари-саам кывъяс. Инари-саам ногöн сёрнитö сöмын 350 морт, кызвыныс гырысь арлыда войтыр, томджыкъяс бать-мамыслысь кывсö тöдöны омöля. Гортаныс верстьö сёрнитöны челядьыскöд финн кыв-йöн, оз ышöдны ныв-писö тöдны чужан кыв. Ассьыныс сёрнисö бöр ловзьöдны Инариын босьтчöмаöсь 1997 воын, детсадъясын заводитöмаöсь збыльмöдны "Кыв поз" уджтас. Посни ныв-зонкöд сёрнитöны сöмын ас войтырлöн кывйöн, и некымын тöлысь мысти нин тыдовтчöмаöсь бурлань вежсьöмъяс, челядь öдйö велалöмаöсь гöгöрвоны да сёрнитны инари-саам ногöн. Но сöмын детсадса "кыв позйыд" этша на. 2000 воын сійöс кутöмаöсь паськöдны школаясын, кызвын уроксö нуöдны вужвойтырлöн кывйöн. Вочасöн челядь бöрся вöтчöмаöсь и бать-мамыс. Инари-саам кывйöн öні книга-журнал лэдзöны, сьыланкывъяс гижöны, весиг теле- да радиопередачаяс дасьтöны, оз ыстысьны, мый куимсё кывзысь-видзöдысьыдлы вывті лышкыд тайö лоас.
– Но тайö вермöмъясыс чужтісны выль мытшöдъяс, – висьталіс видеопос дырйи "Финн-йöгра кыв поз" уджтасöн веськöдлысь Анника Пасанен. – Велöдысьыс эз кут тырмыны, некодлы вöлі лöсьöдны велöдчан небöгъяс. И ми котыртім шöр арлыда войтырöс чужан кывйö велöдан курсъяс. Медводдза дас сизим морта котырас вöліны детсадса воспитательяс, радиожурналист, вичкоын служитысь. Велöдчиганыс найö во кежлö эновтчылісны уджсьыс, корсим позянлун вештыны налы удждонсьыс 85 прöчентсö. Бöрас 17-сьыс сизим мортыс пыр жö аддзисны аслыныс инари-саам кывкöд йитчöм выль удж. 350 морта вужвойтырлы тайö лыдпасыс зэв тöдчана. И ми эскам, мый миян аскиа луныс эм.
Инариын "Кыв поз" уджтассö збыльмöдöны саам регионын велöдан шöрин бердын. Шöринöн юрнуöдысь Лиисе Холмберглöн кывъяс серти, найö паськыда вöдитчöны выль технологияясöн да вермасны юксьыны рöдвуж войтыркöд дистанционнöя (на ног кö – визуальнöя) велöдан опытöн. Видеопос дырйи нин найöс корисны Юграö, кöні став олыссьыс вужвойтырыс сöмын кык прöчент. Миян пö хант да манси семьяясын рочасьöны, и "Кыв поз" кодь уджтасыс миянлы зэв колана.
Зільöны уджавны öтув
Инариысь уджъёртъясыскöд топыд йитöд кутö Комиысь школаöдз челядьöс велöдан лабораторияöн веськöдлысь Зоя Остапова. Сійö öттшöтш юрнуöдö чужан кывъяс вылын велöдчан небöгъяс дасьтысьяслöн Россияса ассоциацияöн. Вужвойтырлысь кывъяс ве- лöданног бурмöдны зільысь котырыс кольöм во на и чужис, но дасьтöны нин "Этнология детства финно-угорских народов" небöг.
Öтув уджалöны и Россияса рöдвуж регионъясса университетъясысь учёнöйяс. Кыдзи висьталіс СГУ-ысь финн-йöгра велöдан да наука шöринöн веськöдлысь Марина Федина, Европаса сöвет отсöгöн Комиысь, Удмуртияысь, Мордовияысь преподавательяс дасьтöны школаын велöдчысьяслы терминология кузя кывкудъяс.
Видзöны вужъяссö
Медунаöс видеопоскыс вöлі чукöртöма Санкт-Петербургын. "Неватас" коми землячествоын водзмöстчысьяс кындзи сэтчö локтöмаöсь финн-ингерманландечьяс, водьяс, мордва, карелъяс, эстонечьяс, тшöтш и Ненеч, Ямал-Ненеч да Ханты-Манси кытшъясысь войтыр.
– Петербургын öні уджалö 60 гöгöр национально-культурнöй автономия. Öтияс котыртчылісны важöн нин, мöдъяс зэв на томöсь. "Инкерин Лииттолы" кö кызь сайö во нин, мордвалöн котырлы сöмын на кык, – висьталіс "Неватас" котырöн юрнуöдысь Александр Терюков. – Куим во сайын Питерын вöлі вынсьöдöма уна сикас войтыр костын сöгласа олöм лöсьöдан торъя уджтас, дженьыда ми сійöс шуам "Толерантностьöн". Детсадъясын да школаясын дас воысь нин дырджык "Этнокалендарь" программа подув вылын тöдмöдöны челядьöс войтыръяслöн культураöн.
Ленинград обласьтса квайт миллион олысь пöвстын 12 сюрс финн-ингерманландеч. Ассьыныс вужъяссö видзöм могысь 1988 воын найö лöсьöдöмаöсь "Инкерин Лиитто" котыр. Öні сылöн юкöнъясыс уджалöны Санкт-Петербургын, Сестрорецкын да Хельсинкиын. Налöн асланыс тöжд-мог: том йöз пö велöдöны финн кыв да Финляндияö овны-уджавны мунöны, а миянлы пö эськö окота, мед и чужанінас бурсö вöчисны.
Йöзöс бöръяысь гижалігöн водьöн вöлі асьнысö шуöмаöсь 73 морт. И найö оз на кöсйыны бырны му вывсьыс. Екатерина Кузнецовалöн кывъяс серти, некымын во сайын на водьлöн абу вöлöма гижöда кывйыс, но асланыс водзмöстчöмöн лöсьöдöмаöсь литература кывсö, медводдза небöг бöрти Эстонияын лэдзöмаöсь и словарь. Тартуса универ-ситет отсöгöн Кингисепп районса Лужицы сиктын дас во нин котыртлöны кыв велöдан лагерь. Эскöны, матыстчысь перепись дыр-йиыс водьлöн лыдыс содас, öд водзті пö миянöс торъя войтырöн эз лыддьыны, а кык во сайын шуисны этша лыда вужвойтырöн.
* * *
– Быд мортлöн олöмын чужан кывйыс зэв тöдчана, и быдöнлöн эм право тöдны мам кывсö да сёрнитны сыöн, – пасйис видеопос дырйи Лиисе Холмберг. – И татшöм аддзысьлöмъяснас ми отсалам öта-мöднымлы дорйыны тайö правосö.
Финляндияысь аньлöн тайö кывъясыс стöча подулалісны видеопослысь коланлунсö, индісны сёрнилысь сюрöссö.
