Юркарын чукöртчыліс "Единая Россия" партия Коми юкöнлöн политсöвет. Сёрниыс муніс сиктъясын поштаяс тупкыны кöсйöм, сотчысьяслы отсалöм йылысь, видлалісны и мукöд юалöм.
—Пöдлавны-бырöдны сиктъясысь поштаяс оз позь. Олöмыс сэні сідз нин абу кокни, а татшöм мöвпышттöм воськолыс нöшта нин сьöктöдас сэтчöс войтырсö. "Почта России" котырлы оз сöмын кыдзи бизнеслы, но и кыдзи государственнöй учреждениелы колö кывкутны йöз водзас найöс социальнöя могмöдöм вöсна,— висьтавсьö "единороссъяслöн" шыöдчöмын, кодöн чукöртчöмаясöс тöдмöдіс партиялöн регионса исполкомöн юрнуöдысь Андрей Самоделкин.
Сійö пасйис, кымын пö ылынджык овмöдчöминыс, сымын поштаыс коланаджык. Öд сэтчöс олысьяс мынтысьöны сэні коммунальнöй услугаысь, босьтöны пенсия, пособие, су-дзöдöны газет-журнал, мöдöдöны письмö, пöсылка-бандероль да с.в. Мукöдлаас сійö дзик öти йитöд "ыджыд мукöд". А волывлысь поштаыд, мыйöн вöзйöны вежны сійöс öткымынöн, ылі пельöсад туй абутöм вöсна вермас и не сибавны да коркö волас, коркö – оз. И лоö зэв лёк, бырöдам кö воясöн ладмöдöмторсö.
Сыктывдін районса юралысь Артур Рудольфлöн видзöдласыс та вылö мöдджык. Сы серти, медым кывкöртавны, кольны али бырöдны поштасö, колö ставсö гöгöрбок видлавны-донъявны.
—Кöнкö, гашкö, и збыльысь позьö тупкыны, а йöзсö кутас могмöдны машинаöн ветлысь пошта, а кöнкö чинтыны уджалысь лыдсö либö уджалан кадсö. Но, шуам, Озёл сиктын бырöдны оз позь,— тöдчöдіс сійö да пасйис, мукöддырйиыс пö бурджык вештыны поштасö новлöдлöмысь рöскодсö районса да республикаса бюджетъясысь.
Республикаса госслужба академияысь ректор Валерий Грибанов вöзйис, мед Комиöс пыртасны регионъяс лыдö, кöні кöсйöны видлыны öтувтны пошта да банк – тадзи пö вöчöны Финляндияын. Найöс позьö уджöдны и быд лун, и вежоннас 2 лун да кöть и 2 час луннас.
Чукöртчöмаяс сідзжö пасйисны, мый "Россияса пошталы" тадзи вöчны оз позь. Тайö лоö мортлысь Оланподулöн индöм право торкöмöн, а огö кö кутöй водзсасьны татшöмторйыслы, аски миянлы вермасны юöртны мукöд учреждение тупкöм йылысь. Но век жö "единороссъяс" воисны öти кывйö, шуисны чукöртны став вöзйöмсö да видлавны найöс Госсöветын, кытчö тшöтш корлыны федеральнöй пошталöн Коми управлениеысь войтырöс.
Водзö сёрниыс муніс Россияын сотчысьяслы отсалöм йылысь.
Андрей Самоделкин висьталіс, мый партиялöн Коми юкöн медводдзаясöн чукöстчис йöзлöн шог вылö. Август 1 лунö нин политсöветса секретарь Роман Зенищев шыöдчöма партиечьяс да на вöсна сулалысьяс дорö, медым отсалісны неминучаö веськалöмаяслы. Вöлі восьтöма банкын торъя тшöт. Август 26 лун кежлö сэтчö воöма 427.134 шайт. На пиысь 400 сюрссö мöдöдöма нин Улыс Новгород обласьтö. Вичмöдöмаöсь отсöгсö и Луздор районса Мутницалы, кöні сотчис школа, а сідзжö Кöрткерöс да Вуктыл районъяслы. Сьöмысь öтдор йöзыс чукöртöмаöсь уна кöлуй.
Тані жö бöрйисны "Детсадъяс – челядьлы" партиялöн федеральнöй проект Комиын збыльмöдöм бöрся видзöдысьöс. Сійöн лоис Татьяна Гавриловна Навазова – тöдöмлун содтан да велöдчöм сöвмöдан институтöн веськöдлысь. Сідзжö индісны выль нырщикöс ютырлöн Удора районса юкöнö да видлалісны мукöд юалöм.
* * *
Кыдзи юöртіс республикаса Юралысьлöн пресс-служба, Вячеслав Гайзер шыöдчис федеральнöй пошталöн Коми управлениеö да корис, медым сиктса поштаяссö эз пöдлавны, а водзö вылö вöзйис видлавны татшöм юалöмъяссö республикаса правительствокöд да муниципальнöй юкöнъясöн веськöдлысьяскöд öтув. Та дырйи медводзö пö колö пуктыны йöзлысь правояссö.
—Ме дорö шыöдчисны Мылдін районса Русанов, Вуктыл дорса Шöрдін посёлокъясысь войтыр, Сыктывкарса Ручейнöй улича вылын олысьяс, кöні кöсйöны тупкыны поштаяссö. Татшöм жö серпасыс нöшта 9 муниципальнöй юкöнын. Тайö ёна майшöдлö йöзсö. Ме кори видлавны ставсö гöгöрбок. Öд сикт-посёлокъясын олысьяслы пошта йитöдыс зэв тöдчана.
Ми сёрнитім федеральнöй пошталöн республикаса управлениеысь войтыркöд. Найö гöгöрвоисны миянöс. Водзö вылö татшöм юалöмсö кутам видлавны правительствокöд да кар-районъясöн веськöдлысьяскöд öтув. Сöмын та бöрын вöчам кывкöртöд. Öні поштасаяс чинтасян уджсö дугöдасны, та кузя налöн абу на ставсö лючки видлалöма-артыштöма, — тöдчöдіс республикаса Юралысь.
