Шыöдчöм

2 сентября 2010 года, 9:30

Тавося октябр тöлысьын миянöс бара на виччысьö гижалöм (перепись), медым тöдмавны, кодъяс ми да кыдзи олам.
Вермас артмыны сiдзи, мый миян мича паськыд Коми муын кытыськö петласясны сэтшöм нима войтыр, кодъяс тайö гижасьтöдзыс весигтö эз кывсьывны, либö кывсьывлiсны ёнджыкасö оланiн стöчмöдiгöн. Шуам, изьватас, удораса, емваса, эжваса да сiдз водзö. И ни öти морт асьсö веськыда "комиöн" шуысь оз ло. Сiдзкö, коми войтырыс Коми му вылас бырас. На пыдди танi олысьясöн кутасны лыддьысьны разi-пельö паськалöм, тöдтöм нима йöз котыр. А оз кö ло коми войтырыс, ми тöдлытöг сылам-вошам мукöд сёрниа йöз пöвстас.
Да, ми ставным неуна торъялам öта-мöдысь сёрнисикасöн, кöм-паськöмöн да оласногöн. Но сэк жö ми öткодьöсь, кöть кыдзи эн бергöдлы. Öд миянöс чужтiс öти ас му; миянöс нэмсö мелiалiс и мелiалö öти ас шондi; вердö-чöсмöдлö öти ас помтöм-дортöм сук Парма. Миян медся муса чужан кывным öти вужйысь петöм, öти енэжö кыпöдчöм.
Коркö важöн ас пöль-пöчным козьнавлiсны миянлы тайö мусö. Сетiсны "коми" ним. Вермис-ö волыны налы юраныс шуны асьнысö мöд нога, нырнысö вылö чатыртöмöн да морöсас кучкалöмöн вышитчыны öта-мöд водзас кутшöмкö мöд нимöн да нимтысьны?! Öта-мöднымысь кö кутам öтдортчыны, вöйпны öта-мöдöс, коднö сэки миянöс пондас пыдди пуктыны?! Торйöннад ми – некод, а öтув - ми ас мича муын, вына странаын олысь ыджыд войтыр, кодi шусьö "КОМИ"-öн. Ас му вылын – ас войтыр. Мöвпыштлöй водзвыв, кыдз асьнытö нимтыны, мед бöрыннас эз ло яндзим чужан му водзад. И йöз муö петалiгöн, веськыда позис шуны асьтö комиöн.

МОД "Коми войтыр"

Сійö абу гуся тэд ни мем:
Коми костас быдсямаыс эм.
Унджыкыс ас кывсö донъялöны,
Кöн кöть, восьсöн сы дор сулалöны.
Найöс кывзан – содö кыпыдлун,
Сы вöсна, мый ай-мам кыв оз вун…
Но и аддзылан на, мед и шоча
Комиöс, а лыддьö асьсö рочöн.
Татшöм мортыс, рочасяс мед öтчыд,
Коді сійö пырысь-пыр и тöдчö…
Эн жö дзикöдз йöз син водзын усь,
Шöрö-бöрö вошöм коньöр тусь.

В. Тимин

Анастасия Маркова

Сыктывкар, Ижемский, Удорский

Новости Республики Коми | Комиинформ

Шыöдчöм