Во мысти нин, кор миян республика кутас пасйыны котыртöмсяньыс 90 во, Сыктывдін районса Ыб сиктын воссясны финн-йöгра этнокультурнöй парклöн медводдза стрöйбаяслöн — кинотеатра кык судтаа конгресс-холлöн, ывлавывса концерт заллöн, туйвыв йöзлы 50–60 морт вылö оланінлöн, кык музейлöн да кафелöн öдзöсъясыс. 2013 воöдз сэні кыпöдасны финн-йöгра чачалы да чужан му туялöмлы сиöм музейяс, киподтуя йöзлы мастерскöйяс, лызьöн да конькиöн исласянінъяс, чери кыйысь-вöралысьяслы керкаяс. А дас во мысти Ыбын збыльысь нин позяс тöдмасьны финн-йöгра войтырлöн оласногöн, культураöн, сёян-юанöн.
Лоас финн-йöгра грезд
Кольöм вежонö Сыктывдін районса юралысь Артур Рудольф тöдмöдіс республикаса парламентöн веськöдлысь Марина Истиховскаяöс да тайö районсяньыс Госсöветса депутат Алексей Цыпановöс Ыбын збыльмöдан уджтаснас, висьталіс, мый тані кутасны нуöдны челядьлысь "Завалинка", классическöй сьыланкывлысь "Времён связующая нить" да мукöд фестиваль. Этногрездö волысь йöзöс кутасны новлöдлыны и районса мукöд сиктö, тöдмöдны сэтчöс нималанаторъясöн.
Уджсö сöмын на панісны, но öні нин колö мöвпыштны, кыдзи ышöдны волыны татчö унджык йöзöс, медым финн-йöгра грезд йывсьыс тöдісны эз сöмын Комиын, но и Россияын да суйöр сайын. Колö мöвпыштны сэтшöмтор, мед öти кывтэчасöн, öти серпасöн висьтавны-петкöдлыны Коми мулысь медтöдчанасö.
—Кöдзыд пöльлöн чужанін йылысь мöвпсö во кызь сайын вöзйывлісны Комиын, но нинöм эз вöчны сійöс збыльмöдöм могысь, – висьталіс Артур Альбертович. – А Югдінын лöсьöдісны Дед Морозлысь оланін да öні сэтчö уна йöз, тшöтш и Комиысь, волывлö. Россияса войвылын туристъяс окотапырысь тöдмасьöны миянкöд орчча Корела грездöн, кытчö Кардор обласьтса уна сиктысь вайöмаöсь да сувтöдöмаöсь важ керкаяс. Вöлöгда обласьтын нималöны Кирилло-Белозёрскöй да Ферапонтовскöй манастыръяс. И быдлаын вöзйöны сэ-тшöмтор, мый сэсся тайö местаас кындзи некöн абу. Ме веськавлі Мандрагаö, и сэні окотитысьясöс нуöдöны ді вылö, пасьтöдöны кыксё восайся паськöмö, овмöдöны важ керкаö. Налы аслыныс колö скöт дöзьöритны, вартны, изны, пожнасьны, няньшом кöтны да пöжасьны, пусьыны... Быттьö XVIII нэмö веськавлöны. И тадзи куим лун олöмысь мынтöны 50 сюрс шайт. Кöть эськö, веськыда кö, та дыратö пöшти некод оз ов, сутки мысти нин бöр вöзйысьöны öнія кадö.
Ыбын финн-йöгра грездсö кыпöдны дас воöн ковмас 3-4 миллиард шайт, на пиысь 250 миллионыс локтан воöдз нин, медым республикалöн тшупöда пас кежлö сэтчö вермисны нин волыны медводдза гöсьтъяс. Таво 120 миллион шайтсö вичмöдöмаöсь, локтан во виччысьöны нöшта 130 миллион. И Артур Рудольф корис Госсöветса депутатъясöс отсавны таын. Водзöсыс пö тайö уджтассьыс лоас оз сöмын Сыктывдінлы, но и Коми Республикаса став лунвыв районыслы. Марина Истиховская шуис, мый бöръя воясö Войвылын туризмыс кутіс паськавны, öд тані и сынöдыс, и ю-тыыс сöстöмöсь, вöр-ваыс кызвыннас вöрзьöдлытöм. Но оз ков сёрмöдчыны туризм сöвмö-дöмнас, ышöдны таö и асшöр уджалысьясöс.
Республикалöн чужан лун водзын Ыбын финн-йöгралысь этнокультурнöй парк кыпöдан уджтаснас тöдмасисны и Москваын да Санкт-Петербургын.
Инмö быдöнлы
Финн-йöгра парк меститчанінöн тöдмасьöм бöрын Марина Истиховская мöдöдчис Ыб сиктса администрацияö, кытчö йöзыс унаöн нин вöлі чукöртчöмаöсь. Ставныс найö кöсйисны шыöдчыны Госсöветöн веськöдлысь дорö асланыс корöмъясöн. Быдöнлöн аслас тöжд-мог, но кодкö и став сиктсаыс вöсна майшасьö. Сідз, Галина Глебова висьталіс, мый Ыбса да Захаровса культура керкаяс öні шонтöны электричество отсöгöн, и энергиясьыс уджйöзыс öкмöма нин 170 сюрс шайт. Уджйöзалöмаöсь эськö захаровсаяс, но öти овмöсöн лыддьыссьöны да бисьыс орöдöмаöсь кыкнаннысö. Галина Николаевнаöс эскöдісны, мый август помöдз тайö гöрöдсö лоö разьöма. Сідзжö висьталісны, мый республикаса школаясын да детсадъясын биысь видзчысян сигнализация вöчöм бöрын татшöмсö лöсьöдасны и культура учреждениеясын.
Республикаын олысь уна войтырöс майшöдлö, кыдзи могмöдöны лекарствоöн сиктса вермытöм йöзöс. ФАП-ясын найöс оз сетавны, быть лоö районса больничаö врач дорö ветлыны, медым сійö гижис рецептсö, сэсся бöр локны да ас фельдшер дорын кабалаас печать пуктыны да бара мунны юрсиктö лекарствоысла нин. И тадзи быд тöлысь. Марина Истиховскаялöн кывъяс серти, ФАП-ясын лекарство вузалöм да дон босьттöг сеталöм йылысь оланпас баласö öні видлалöны Госдумаын, и бур, мый йöзыс шыöдчöны депутатъяс дорö татшöм юалöмъяснас, öд тадзи налысь вöзйöмъяссö лоö тöд вылын кутöма законсö дасьтігöн на. Тайöс позьö шуны и профучилищеясын велöдчысьяслы социальнöй стипендияяс йылысь. Вузъясса студентъяслы кö найöс вештöны федеральнöй бюджетысь, лицейяслы да колледжъяслы сьöмыс вичмö республикалöн зептысь. Госсöветöн веськöдлысь кöсйысис сиктсалы видзöдлыны, эм-ö позянлуныс урчитны татшöм стипендиясö и училищеясын.
Ыбса войтыр элясисны парламентöн веськöдлысьлы, миянлы пö вöрсö торйöдöны дас вит километр сайысь, а карса организация пöрöдчöма сиктсянь куим километр сайын. Кыдзи тыдовтчис, карсаяс босьтчылöмаöсь туй писькöдны, но керсö петкöдöм бöрын мунöмаöсь. Тайö юалöм кузяыс шуисны шыöдчыны республикаса вöр комитетö.
Оланпассö ошкöны
Ыбысь бöр локтігас нин Марина Истиховская да Алексей Цыпанов кежалісны Выльгортö, пыралісны "Наша жизнь" газет редакцияö. Марина Дмитриевна ошкыштіс сэні уджалысьясöс, ті пö пыр зілянныд петкöдлыны газетаныд, кы- дзи йöзыс донъялöны Госсöветöн вынсьöдöм оланпасъяс да тадзикöн отсаланныд и миянлы кутны республикаса олысьяскöд топыдджык йитöд. Со неважöн вынсьöдöм закон серти öні уличьяс вылын, йöзаинын оз позь юны сур, войнас оз позь вузасьны тайö юанторнас. "Наша жизнь" газетса главнöй редактор Анастасия Одинцова висьталіс, йöзыс пö кызвыннас ошкöны тайö оланпассö. Вежон-мöд сайын на пö редакцияö пыраліс нывбаба, колö пö милицияö звöнитлыны, улич вылас кык мужичöй юöны да. Милиционеръясыд пыр и локтöмаöсь да öлöдöмаöсь найöс.
Сэк жö оланпасыс оз во сьöлöм вылас сур пуысьяслы да сыöн вузасьысьяслы. Кöть эськö казьтыштісны, "ОПОРа России" котырысь пö юристыс öти газетын висьтасьöма судö шыöдчöм йылысь, мед киритасны законсö, öд странаын та-тшöмыс абу на. А аскинас нин мöд газетын ошкöма оланпассö, водзті пö менам öшинь улын войбыд сур дучкисны, а öні пö лöнь лоис.
Арнас Госсöветса депутатъяс кутасны видлавны сöстöмлун йылысь закон. Марина Истиховская корис журналистъясöс паськыдджыка юöртны и тайö оланпас йывсьыс, мед йöзыс бурджыка гöгöрвоисны сылысь коланлунсö.
