"Коми му" газет редакцияö шыöдчисны Кöрткерöс районса Ыджыдвиддзын олысьяс. Районса ёрдлöн шуöм серти сиктсьыс тупкöмаöсь детсадсö. Бать-мам майшасьöны, кытчö кутасны инавны ныв-пинысö.
—Менам кык нывка. Верöскöд уджалам. Код дорö инала Ксюшаöс да Миланаöс? Аскöдыд öд удж вылад он босьт, — шогö усьöма Елена Анатольевна Панюкова.
Ыджыдвидзса садйын зонпосниöс видзöмаöсь кык котырын. Сэтчö котралöмаöсь 33 нывка да зонка. На пиысь öкмысыс таво мунöны школаö, кызь нёльыс кутасны пукавны гортаныс. Квайт бать-мам эськö и шыöдчöмаöсь садйöн веськöдлысь дорö, медым налысь быдтаснысö сэтчö босьтісны. Гöгöрвоана, налы нинöм и надейтчыны.
Водзынсö Ыджыдвиддзын вöлöма куим детсад. Весиг пузчужöм кагаясöс видзöмаöсь яслиын. Вочасöн челядьлöн лыдыс чинöма. И сиктын кольöма öти детсад. Збыль вылас кö, сылöн стрöйбаын водзтісö вöлöма школалöн склад. 1985 воын сійöс лöсьöдöмаöсь детсад улö. Кольöм нэмся кöкъямысдасöд воясö сёрнитлöмаöсь выльысь стрöитчöм йылысь, но олöмыс гудыртчöма да Ыджыдвиддзын выль садйыд абу и кыптöма.
Бöръя воясö детсадйыс заводитöма киссьыны: джоджыс сісьмöма, стеныс пöлыньтчöма, пöтöлöкыс лайкмунöма. Кольöм во бать-мам отсöгöн стрöйбасö эськö дзоньталöмаöсь. Выльмöдöмаöсь подувсö да вевтсö, пыклöмаöсь стенсö. Бать-мам чайтöны, мый гоз-мöд вотö эськö стрöйбаыс шогмис на. Но таво июньын волöмаöсь Сыктывкарса "Комигражданпроект" стрöитчан компанияысь специалистъяс да найö кывкöрталöмаöсь, мый стрöйбаас оз туй видзны челядьöс.
—Миян видзöдöм серти, быттьö и шогмö на. Но специалистъяслöн торъя приборыс петкöдлöма, мый чардакса стрöпилöыс оз туй норма сертиыс. Со и ёрд шуис пöдлавны детсаднымöс, — висьталö сійöн веськöдлысь Роза Ивановна Игушева.
Сиктса мужичöйяс шуöны жö, мый тайö стрöйбасö кöть и дзоньталан, сёр ли водз бöр пöлыньтчас. Öти-кö, кыпöдлöмаöсь сійöс кузь керъясысь да йитöдъясöдыс и лайкмунö. А мöд-кö, вöчлöмаöсь склад пыдди, а абу челядьлы оланін вылö.
Ыджыдвиддзын матö ветымын зонпосни, кодъяслы эськö коліс котравны садйö. Но весиг найöс ставнысö водзынсö инавны эз вермывны, местаыс эз вöв да. А öні и найö, кодъяс босьтісны тöдöмлун Ыджыдвидзса садйын, кутасны пукавны гортас. А öд кызвын бать-мамыс уджалöны. Кытчö да кодлы найö колясны быдтаснысö? Пöль-пöчыс кö эм, найö эськö и отсаласны внук-внучкасö видзны. Но öд школа кежлö оз вермыны дасьтыны.
Сиктын тöдісны, мый детсадлöн стрöйбаыс важ да сёр либö водз сійöс тупкасны. Роза Ивановна унаысь шыöдчыліс сиктса администрацияöн веськöдлысь дорö да районса велöдан юкöнö. Но выль садсö сиктын эз и кыпöдны. Кöть эськö пö вöлöма сёрниыс, мый стрöитасны 2013 воын. Но сэтчöдз дыр на.
—Мöвпалім вöвлöм совхоз контораö восьтны садсö, — висьталö Роза Ивановна. — Но медым лöсьöдны та могысь стрöйбасö, колö 34 миллион шайт. Та мында сьöмсö вичмöдны районса бюджетысь эз вермыны.
Кöсйылöмаöсь вуджöдны школаö. Сёрнитöмаöсь вичмöдны налы начальнöй классъяс. Но мöвпыс вежсьöма. И öні Ыджыдвидзса кагушъясöс бать-мамыс кутасны новлöдлыны Выльыб грездö. Но быдöн сійö сэтчö оз жö веськав.
Орчча грездас садйö котралысьыс дас сизимöн. Мöд группаö босьтасны сöмын уна вылö дас вит кагаöс. Медсясö, дерт, найöс, кодъяс лöсьöдчöны мöд во мунны школаö.
—А кыдзи ми сы ылнасö кутам новлöдлыны? Макарсиктсянь Выльыбöдзыс куим километр, а Кывтыдсянь и квайт. Сэсся öд абу пыр гожöм. Лоас и зэра ар, шляча, кöдзыд тöв, —майшасьö кык челядя мам Галина Михайловна Столярова.
Сиктса школалöн эськö эм автобус. Но бать-мам сы вылö ёнасö оз надейтчыны. Вермас лоны, сійöн найöс оз кутны новлöдлыны. Öд автобуссö лöсьöдöма гырысьджык челядьлы ветлöм вылö, а торъя транспорт садйö котралысьяслы некод оз вичмöд.
Сэсся и Выльыбса детсадлöн стрöйбаыс Ыджыдвидзса дорысь важджык. Öні сэні эськö и дзоньтасьöны. Но уджыс вывті на уна, босьтчöмаöсь сöмын на гипсокартонöн стенъяссö эжны. А колö на выльмöдны би проводъяс, нюжöдны ва да с.в. Районсянь став вылас вичмöдöмаöсь 200 сюрс шайт. Но та мында сьöмыс абу тырмымöн. И сентябрь öтиöд лунöдз став уджсö сигöртны оз на вермыны.
