Бöръя кадас милицияын уджалысьяслы он завидьты. Погона йöзтö оз видны сöмын дышъяс. Дерт, эм мыйысь кодсюрööс дöжналыштны. И ныр лэпталöмысь, и прöстöй йöзлöн тöжд-мог дорö веськодьлунысь... Уна грек на позьö лыддьöдлыны. Но век жö милицияад кызвыныс — пöрадок бöрся видзöдысь тöлка йöз, кодъяс век дасьöсь отсавны пикö воöм мортлы.
Буретш татшöм и Кулöмдін районса Руч сиктысь участкöвöй уполномоченнöй, милицияса старшöй лейтенант Борис Владимирович Зезегов.
– Ачым ме татчöс морт. Ручын помалі школа. Сэсся тшöтшъяяскöд сетчим юркарö Выльгортса 2 номера СПТУ-ö. Армияöдз мыйтакö кад уджалі трактористöн "Ручевскöй" совхозын, – казьтылö Борис Владимирович.
Служба бöрын бергöдчöма гортас. Вöлöма арендаторöн, фермералöма. Видзöма куканьяс, öшпиян.
– 1996 воын менам ыджыдджык вокöй, Алексей Зезегов (сійö милицияын зілис), вöзйис вежны уджöс. Эм пö Сыктывкарын милиционеръясöс дасьтан шöрин, ысты документъястö, видлы сэтчö пырны, – водзö висьталö Борис Владимирович. – Медводз кайлі Кулöмдінса РОВД-ö. Райотделса начальникыс ошкис менсьым кöсйöмöс. И со ме нин милиционеръясöс дасьтан шöринса курсант. Велöдчöм бöрын локті ас районö, вель уна во уджалі ГИБДД-ын. Носимсянь Аныбöдз видзöді туй вылын пöрадок бöрся.
– Тыдалö, быдторйыс вöлі тайö каднас. Туйвывса неминучатö унаöс аддзылінныд? – юася Борис Зезеговлысь.
– Неминучаясыд, дерт, вöліны. Но сиктса йöзыд миян кызвыныс шаньöсь, лабутнöйöсь. Кодсюрööс сувтöдлывлі жö туй вылад, но зык-вен некор эз кыптывлы. Дас куим во ГИБДД-ад служиті, и думайта да, ёна ыджыд öбида ме вылö некодлöн эз вöв. Весиг гажа юра шоперъяс пальöдчöм бöрас эз дöзмывны, бур пö, мый машинасьыд чеччöдін, öд верми веськавны неминучаö, – тöдчöдö милиционер.
Во джын кымын нин Борис Владимирович Зезегов зільö Ручын участкöвöйöн. Старшöй лейтенантлöн уджалан луныс заводитчö зэв водз. Асывсяньыс сиктсаяс пиысь кодкö да кежавлö милиционер ордад. А сійö сюся кывзö элясьöмнысö, вöчö пасйöдъяс блокнотас, мед сэсся ставсö бура видлавны-донъявны.
Унджык кадсö участкöвöй уполномоченнöй кок йылас. Кытшовтö ассьыс сиктсö, сэсся, суас кö мог, ветлывлö и орчча Аныбö.
– Ог дзеб, корсюрö мудзлывла. Öд суас кö неминуча, и войнас корлывлöны. Юысь-кампужитчысьыд тай век овлö. Час-мöд-коймöд зыксьысьястö лöньöда. Бурöн зіля сёрнитны, öд шань кывйыд медся яр йöзыслысь сьöлöмсö небзьöдö, – шуö Руч сиктса "Анискин".
Участкöвöй уполномоченнöй, милицияса стар-шöй лейтенант Борис Владимирович Зезеговöс и ручсаяс, и аныбсаяс лыддьöны ас мортöн. Тöдöны, ковмас кö, сійö воас отсöг вылö.
