И бара финн-йöгра  туялысьяслы воис ыджыд праздник. Венгрияын август 9—14 лунъясö лоас финн-йöгра туялысьяслöн войтыркостса дас öтиöд конгресс. Ми шыöдчим Комиысь конгресса делегат, Коми наука шöринысь Кыв, литература да история институтса  медыджыд научнöй сотрудник, профессор, филология наукаса доктор, Россия Федерацияса финн-йöгра туялысьяслöн комитетöн веськöдлысь да  финн-йöгра туялысьяслöн конгрессъясса войтыркост комитетлöн исполкомö пырысь Анатолий Ракин дорö, корим висьталыштны öнія конгресс йывсьыс.

 —Анатолий Николаевич, стöчджыка кö, кöні лоас конгрессыс да коді сійöс дасьтіс?

—Конгрессыс лоас Пилишчаба карын, Будапештсянь кызь вит километр сайын. Тайö карас меститчöма Будапештысь Петер Пазмани нима католическöй университетлöн филология факультет. Тайö  факультетсьыс финн-йöгра кывъяс велöдан кафедра и дасьтіс конгрессö.  Сэтчö  чукöртчыласны став мир пасьталаысь финн-йöгра кывъяс туялысьяс.

—Кыдзи позьö öнія конгресс водзын  донъявны  талунъя финн-йöгра войтырöс?

—Öні кежлö ловъяöсь дас квайт финн-йöгра войтыр  да налöн кывъясыс. На пиысь дас кыкыс олöны Россияын — тайö коми, удмурт, мордва, мари, карел  да с.в. Нёль финн-йöгра войтыр оз пырны Россияö. Финнъяслöн, венгръяслöн, эстонечьяслöн асланыс государствояс. Нöшта Латвияын  олöны ливъяс. Таысь öтдор, саамъяс, финн-йöгралы рöдвуж войтыр, олöны нёль государствоын — Россияын, Финляндияын, Швецияын, Норвегияын. Финн-йöгракöд йитчöмаöсь вужъяснаныс ненечьяс, энечьяс, селькупъяс, нганасанъяс.

—Сідзкö, став тайö войтырыс коркö овлöмаöсь öтув?

—Учёнöйяслöн чайтöм серти, ёна важöн вöлöма öтувъя урал войтыр. Сэсся  найö юксьöмаöсь öнія финн-йöгра да самодийскöй кывъяс вылö. Важöн финн-йöгра да самодийскöй кывъяс  вылын  сёрнитысьыс унджык вöлöма. Но вочасöн квайт войтыр, а сідзкö и, квайт кыв бырöма. Финн-йöгра пиысь абуöсь нин меря, мещера, мурома, кодъясöс пасйылісны на ёна важся картаяс вылö. Самодийскöй войтыр пиысь бырöмаöсь маторы, камасинцы, койбала, кодъяс овлöмаöсь Саян да Алтай гöраясын.

—Тöдсаöсь абу, корджык бырöмаöсь тайö войтырыс?

—Финн учёнöй Александр Матиас Кастрен гижліс, мый маторы войтыр пиысь медбöръя мортыс 1839 воын ловъя на вöлöма. А камасинцы войтыр рöдысь бöръяыс, Клавдия Захаровна Плотникова, олöма 94 арöсöдз да кувсьöма 1989 воын. Сы дорö унаысь волöмаöсь Эстонияса учёнöйяс да гижалöмаöсь аньлысь висьтасьöмъяссö.

—Кыдзи ті донъяланныд талунъя финн-йöгра кывъяссö?

—Öнія кадö найö ёна торъялöны öта-мöдсьыныс. Сідз, финн, венгр, эстон кывъяс Европаса кывъяс кодьöсь. Мöд ногöн кö, асланыс странаясын найö лоöны государственнöй кывъясöн, кодъяс вылын нуöдöны политика, экономика, наука, культура, вичко служба. Лыд сертиныс талун  венгрыс — 15 миллион, финныс — 5 миллион да эстонечыс — 1 миллион морт.

Мукöд финн-йöгра войтырыс быдöн öти миллионысь  этшаджык. Ставныс найö олöны Россияын. Сідз, 2002 вося  гижалöм серти, мордваыс вöлöма — 843.350, удмуртыс — 640.028, коми-зырянаыс — 293.406 морт. Став финн-йöгра войтыр пöвстын лыд серти ми лоам сизимöдöн. Став комиысь ас республикаын олö 256.464 морт. Мукöдлаö  муніс    да овмöдчис 36.942 морт.

Миян матысса коми-пермъякъяслöн лыдыс 125.238 морт. Манси — 14.432,    энечьяс — 237,  Латвияын олысь ливъяс— 250 морт.

Кызвын финн-йöгра войтырлöн эм гижан кыв. Сэк жö самодийскöй войтыр пиысь татшöм кывйыс эм сöмын ненечьяслöн. Финн-йöгра войтыр пиысь абу ливъяслöн, ижоралöн, водьлöн. Карелъяс гижöны финн кыв вылын.

Кызь  уральскöй войтырыс ставыс 25 миллион гöгöр. Тайö, дерт жö, абу уна, босьтны кö тöд вылö, мый öні Му шар вылын 3 сюрс кыв да сёрнитысьыс 6 миллиард морт.

—Мый верманныд стöчджыка висьтавны финн-йöгра конгрессъяс йылысь?

—Тавосяыс, кыдзи казьтыштлі нин, лоас дас öти-öдöн. Финн-йöгра туялысьяс чукöртчывлöны быд вит во мысти. Водзтіджык  конгрессъяссö нуöдлісны Венгрия, Финляндия, СССР. Бöрынджык – Эстония. А СССР пыдди лоис Россия.

Кык конгресс вöлі Сöветскöй Союзын. 1970 воын Таллинын нуöдісны коймöдöс. А квайтöдыс, 1985 воын, вöлі Сыктывкарын. СССР-лöн  киссьöм бöрын дасöдсö нуöдісны 2005 воын Йошкар-Олаын.

—Кор вöлі медводдзаыс?

—Медводдза конгрессыс 1960 воын, стöч 50 во сайын, вöлі Будапештын. Водзмöстчисны сэтчöс кыв туялысьяс. Сэсся вочасöн мукöд конгресс вылын нин на дінö öтувтчисны фольклористъяс, литература туялысьяс, этнографъяс, археологъяс. Сійö медводдза конгресс вылас 10 государствоысь воліс 81 делегат. Комиысь ветлісны кыкöн, Нина Андреевна Колегова да Марфа Александровна Сахарова.

—Кöніджык муніс мукöд конгрессыс?

—Вит во мысти Хельсинкиын вöлі мöд, кытчö воліс 19 странаысь 471 морт. Комиысь сэтчö ветліс сöмын Геннадий Григорьевич Бараксанов.  Коймöдсö  нуöдісны Таллинын, кытчö воліс 500 гöгöр морт. Комиысь вöліны дас öтиöн. На лыдын Анатолий Константинович Микушев, Татьяна Ивановна Жилина, Прометей Ионович Чисталев, Любовь Степановна Грибова, Любомир Николаевич Жеребцов, Элеонора Анатольевна Савельева, Геннадий Григорьевич Бараксанов, Евгений  Семёнович Гуляев, Вячеслав Ильич Канивец, Фёдор   Васильевич Плесовский, Адольф Иванович Туркин.

Нёльöдсö нуöдісны 1975 воын Будапештын, кытчö   чукöртчылісны 700-öн. СССР-ысь воліс 200 делегат. Комиысь ветлісны  кöкъямысöн. Витöдыс вöлі 1980 воын Туркуын, кытчö воліс 22 государствоысь 800 делегат. Комиысь ветлісны 9-öн. Квайтöдсö, кы-дзи казьтыштлі нин, нуöдісны 1985 воын Сыктывкарын, кытчö воліс 17 государствоысь 736 морт. Сизимöдыс муніс Венгрияса Дебрецен карын. Кöкъямысöдсö нуöдісны Финляндияса Ювяскюла карын. Сэтчö воліс сюрс морт. Комиысь ветліс 49 делегат. Öкмысöд конгрессыс вöлі Эстонияса Тарту карын 2000  воын.  Дасöдыс,  кыдзи висьтавлі нин, вöлі Йошкар-Олаын.

—Кыдзи   дасьтысисны öнія  дас öтиöд конгресс кежлас?

—Сэтчöс оргкомитетö воöма 500 сайö шыöдчöм, на пиысь 300-ыс Россиясянь. Кыдзи и век,  конгресс вылын лоасны пленарнöй да секцияяслöн заседаниеяс, симпозиумъяс  да "гöгрöс пызанъяс". Став сёрниыс медсясö кутас мунны XXI нэмын финн-йöгра войтыр-лöн олöм-вылöм да кывъяслöн сöвмöм йылысь. Асланыс мöвпъясöн юксясны кыв туялысьяс, этнографъяс, фольклористъяс, литература туялысьяс, историкъяс, археологъяс, антропологъяс. Öти симпозиум лоö сиöма öнія финн-йöгра литературнöй кывъяслöн сöвмöмлы. Веськöдлыны кутас филология наукаса доктор, миян Кыв, литература да история институтысь Кыв юкöнöн юрнуöдысь Евгений Александрович Цыпанов.

—И медбöрын, кодъяс ветласны тайö конгресс вылас миян странаысь?

—Россияысь Венгрияö ветлас 90 гöгöр морт. На лыдын Мордовияысь 21-öн, Удмуртияысь — 25-öн да Марий Элысь — 17-öн. Комиысь конгресс вылö ветлöм йылысь шыöдчöмсö мöдöдліс 40 сайö  морт, медсясö Кыв, литература да история институтысь да Сыктывкарса госуниверситетысь. Но ветласны сöмын сизимöн. Миянлы шуисны, мый кризис вöсна унджык йöзöс мöдöдны сьöмыс оз тырмы. Делегатъяс пöвстын меысь öтдор Элеонора Анатольевна Савельева, Евгений Александрович Цыпанов, Галина Александровна Некрасова, Татьяна Леонидовна Кузнецова, Елена Николаевна Федосеева, ставныс  ИЯЛИ-ысь, да Сыктывкарса университетысь Елена Васильевна Остапова. Дерт, суседъяс серти миян делегацияным ёна ичöт. Весиг Карелияысь мöдöдчöны дасöн. Но сы пыдди Комиысь петкöдчасны наукаса куим доктор   да нёль кандидат, медсясö кыв да литература туялысьяс, археологъяс. Оз лоны миянсянь, буретш сьöм  тырмытöм вöсна, фольклористъяс, этнографъяс да  этнологъяс.

—Кутшöм кывъясöн пондасны висьтасьны конгресс вылын?

—Кутасны сёрнитны англия, немеч да роч кывъяс вылын. Таысь öтдор, лоасны кö кöсйысьяс, быд финн-йöгра вермас сёрнитны чужан кывнас.

Сэні жö сёрнитчасны локтан дас кыкöд конгресс йылысь, кöні да кыдзиджык сійö кутас мунны.