Россия Федерацияса правительстволöн индöд серти, 2010 воын бара кутасны гижавны миянöс. Комиын войтырöс пасъяласны октябрь 14-25 лунъясö. Ёна-ö колана тайö уджыс да кыдзи сійöс лоö котыртöма юркарын, сёрнитім Сыктывкарысь гижасьöм кузя уполномоченнöй Светлана Уляшовакöд.
—Светлана Андреевна, йöзыс унаöн на оз гöгöрвоны, мыйла тайö гижасьöмыс колö да кодлы.
—Правительстволы. Öд буретш тайö лыдпасъяс вылас подуласьöмöн вылын дасьтöны государственнöй уджтасъяс. Гижасьысьлöн могыс — тöдмавны быд мортлысь арлыд, кутшöм кыв вылын сёрнитö, кутшöм сылöн оласногыс, велöдчöма-ö. Петкöдчас тшöтш, уна-ö чужысьыс да кулысьыс, кымын том семья артмö. Буретш 2002 вося гижасьöм бöрын правительство дасьтіс нёль национальнöй уджтас: "Дзоньвидзалун видзöм", "Велöдчöм", "Оланін" да "Видз-му овмöс сöвмöдöм".
—Гöгöрвоана, мый гижасьысьлы ковмас ветлöдлыны керкаысь керкаö. А окотапырысь-ö йöзыс лэдзöны найöс асланыс патераö да висьтасьöны ас йывсьыныс?
—Дерт, быдсямаыс эмöсь. Öтияс шуасьöны, дöзмöдчанныд пö, а мöдъяс гöгöрвоöны гижасьöмлысь коланлунсö. Переписчикъяс оз кутны мырдöн сюйсьыны патераö. Быд сикт-грездын, карын лоöны участокъяс, кытчö позяс йöзлы аслыныс волыны да юöртны семья йывсьыс. Либö позяс гижасьысьöс и уджаланінö корлыны. Кöть эськö гижалам кöні збыль вылас мортыс олö, а оз уджаланін сертиыс.
Кöсъя тöдчöдны, мый гижасьысьысь повны нинöмла. Унаöн чайтöны, мый налысь висьталöмторсö кöнкö йöзöдасны. Оз! Нöшта пасъя, мый быдöн вермас корлыны гижасьысьлысь паспортсö. Öд сылöн удостоверениеас пасйöма сöмын ним-вичсö, а снимокыс абу. Позяс весиг звöнитчывны гижасян участокъясö да стöчмöдны, коді локтас пасъявнысö. А йöзлысь жö документъяс ог корöй, ставсö гижам налöн висьталöм серти.
—А пöръяласны кö йöзыс, оз сетны ас йывсьыс стöч юöрсö?
—Чайта, войтыр век жö гöгöрвоöны, мый гижасьöм – абу ворсöдчöм. Татшöм уджсö оз нин медводдзаысь котыртны. Дерт, висьтасьны колö веськыда. Шулі нин, мый тайö пасйöдъяс сертиыс государство дасьтö лöсялана уджтасъяс.
—Светлана Андреевна, эмöсь сэтшöм йöз, кодъясöс гижöма, шуам, сиктö, а олöны-уджалöны карын. И кытчö татшöм войтырсö пасъясны: прописка сертиыс либö кöні збыльвылас олöны?
—Пасйыны колö быть оланін адрес сертиыс. Та вöсна, шуам, армияын служитысьясöс да студентъясöс гижасны оз бать-мамыс ордö, а кöні найö збыль вылас олöны.
—Сикт-грездын ставныслöн ас керка. Сэні сідз шусяна бомжъясыд абуöсь. А каръясын оланінтöм войтырыд уна. Найöс кыдзи арталанныд?
—Сёрнитчим нин найöс кытшовтны милициякöд.
—Республикаса öткымын карын гижасян кадö кöсйöны найöс öтилаö чукöртлыны, öтпырйö и ним-вичсö юасьны, а сэсся и вердыштны. Сыктывкарын тадзи жö лоö?
—Ас костын сёрнитлім жö та йылысь, но карса администрацияö либö республикаса Юралысь дорö татшöм корöмöн эг на шыöдчылöй. Чайта, милициякöд öтув вермам кытшовтны ставнысö. Участкöвöйяскöд волам и омöль оласнога семьяясö. Абу гуся, мый гижасьысь вылö найö вермасны и кулакöн уськöдчыны.
—Асьнытö дорйöм могысь тіянлы мыйкö сетасны жö?
—Быд гижасьысьлöн лоö свисток да пöнар. Но найöн он дорйысь.
—Светлана Андреевна, косавлыны кö ас патератöм семьяяс дорö, унаöн öні олöны дачаясын. Торъя нин сиктысь локтöм том семьяяс. Найöс кытчö пасъясны?
—Гижысьяс петаласны и сэтчö. Медвойдöр сёрнитам дача котыръясöн веськöдлысьяскöд. Найö öд бура тöдöны аслас котырысь ставнысö, кодъяс сöмын гожöм кежлö картупель-лук быдтыны волöны, а кодъяс и пыр олöны. Чайта, пасъявны вермам ставнысö. Мед сöмын йöзыс асьныс паныд эз мунны-а.
* * *
Пасъям, Сыктывкарын йöзöс арталан кадö медаласны 860-ысь унджык мортöс. Кутас уджавны комын гижасян участок: Гöрд Затонын, Максаковкаын да Мыртыюын, Вылыс да Улыс Човъясын, да карсö лоö юкöма кызь сизим пельö. Эжва районын кутасны уджавны торйöн.
Снимокыс Фёдор МАКАРОВЛÖН.
"Коми му" газет,
2010 вося август 3 лун.
