Семён Константинович Терентьевöс миян лыддьысьысьяс, чайта да, тöдöны. Дзик медводдзасьыс сійöс казялісны "Лемванырд" поэма йöзöдöм бöрын. Кадысь кадö сэсся гижöдъясыс петалісны "Войвыв кодзув" журналын. Та бöрын дасьтіс да лэдзис ассьыс некымын книга.

"Эзысь борд" конкурсын, кодöс котыртö да нуöдö "Войвыв кодзув", бöръя "Вомидз" висьтсö бара на вылö донъялісны. Семён Константинович тайö аслыспöлöс ордйысьöмас лоис лауреатöн, сылы сетісны мöд тшупöда Почёт грамота.

Нёль во и велöдöма

Семён Константинович чужöма да быдмöма Инта районса Ярпияг грездын. Коми кывсö велöдöма сöмын начальнöй школаын. Водзöсö ни коми кыв, ни коми литература урокыс абу вöлöма. Но чужан кывтöгыс овнысö абу вермöма. Зонка босьтлöма библиотекаысь да лыддьöма Яков Рочевлысь "Кык друг", "Изьва гызьö", "Му вежöм" нималана гижöдъяссö...

Сійö ичöтсяньыс зільöма кыдз позьö унджык тöдмавны. Бара жö библиотекаысь босьтöм книгаясысь лыд-дьöма Перымса Степан, "Зарни Ань" йылысь. И верстяммöм бöрас абу веж-сьöма. Кольöм нэмся 80-öд воясын мöдöдöмаöсь командировкаö Перым карö. Первой жö прöст здукас весь-кöдчöма сэтчöс краеведческöй музейö. Содтöд уна выльсö бара на тöдмалöма. Сійö пасйис:

— Музейын эм Перымса Степанлöн портретыс, сылöн беддьыс, мый вылö мыдж-сьöмöн ветлöма, а сідзжö и комияслöн пу енъясыс...

Ас нэмнас уна ветлöма

Тайö мортыс ас олöмас уна ветлöма, унатор аддзылöма. Кöкъямыс класс помалöм бöрын вöзйысьöма тундраö. Кöр стадаыс вöлöма ыджыд, некымын сюрс пемöса. Нокыс уна дай тундраад бать ни мам абу, ставсö аслыс ковмöма вöчны.

Та пыдди том морт вуджöма Из, некымын сюрс километр мунöмаöсь Карскöй лайколаöдз, коді тай Войвывса Йиа океанын. Сэтчöс Каравом посёлок дорöдз волöмаöсь. Мойвиöма аддзывны помтöм-дортöм восьса эрд, нюръяс, вуджöмаöсь синва кодь сöстöм да визувсьыс-визув юяс вомöн. А кутшöм аслыспöлöсöсь тундраса тыясыс! Семён Константинович казьтылö:

— Видзöдлан да весиг акнитан: тыыслöн пыдöсыс тыдалö, со из дорас сулалö пес плака ыджда чир... А öд джудждаыс 5-6 метр. Сиръясыс кражъяс кызтаöсь... Öткымын ты дорын кöр видзысьяс сувтлöны. Шойччигмозыс кыйöны чери. Муас кодйöма гуран, кытчö и кольöны кебöс-чирсö. Тундраын муыслöн сöмын веркöсыс муртса сылышт-лö. Тайö дзик аслыспöлöс холодильник кодь, сэні нинöм оз тшык ни оз бакшась.

Армияас Семён Терентьев служитöма Хабаровскын. Сэтчöдз 16 час самолётöн лэбöмаöсь. Гöгрöс öшиньсьыс синсö абу вештылöма. Кор пö сэсся нöшта вылісяньыс верма нимкодясьны чужан муöн... Армия бöрас нин мойвилöма волыны помтöм-дортöм Обь ю дорö. Любуйтчöма и Енисей юлöн шемöсмöдана местаясöн. Юлöма ва веж гыяса Амур-батюшкоысь. Кывтлöма и Волга юті. Но чужан войвывса муыс магнитöн моз ас дорас кыскöмöн кыскöма. Торйöн нин тундраыс, кодкöд йитчöма матысса рöдвужыслöн олöм-уджыс.

Другöн заводитöма гижны

Олöмас лоöма сідз, мый другöн киас босьтöма ручка. Лун дай вой пессьöма-мырсьöма. Тадзи и чужöма "Лемванырд" поэма. Тайö вöлöма 1999 воын. Лыддян гижöдсö да син водзад сувтö ачыс Лемванырдыс, Ярпияг грездыс, сэтчöс войтырлöн оланногыс да историяыс. 2008 воын тайö поэмасö ас сьöм вылас йöзöдöма.

Семён Терентьев пасйис:

—Кольöм нэмлöн 90-öд воясыс вöлісны зэв сьöкыдöсь. Ыджыд да вынйöра страна пыдди колис Россия, вежсис йöзыслöн оласногыс, бырис уна предприятие да совхоз... Кутшöм лоö челядь-внуклöн аскиа луныс? Войтыр вочасöн лэдзчысисны, унаöн юсисны. Öд олöмас некутшöм пыкöд öні абу. Удж ни нажöтка. Мыйö эскыны?

Воöма чужан Ярпияг грез-дö, олöма йöзкöд сёрнитігöн синмыс другöн воссьöма. Со мый йылысь колö гижны. Аслад чужан грезд йылысь, петкöдлыны, кыдзи уна нэм сайын йöзыс уджавлöмаöсь, кутшöм талунъя луныс...

Отпуск чöжыс варовитöма пöль-пöчкöд, гижалöма налысь казьтылöмъяссö. Унатор и ачыс бура тöдіс. Удж бöрас нин рытъяснас пукалöма да гижöма. 2008 воын лэдзöма нöшта öти книга — "Деревня Ярпияг – прошлое и настоящее".

Семён Константиновичлы öні 65 арöс. Но весь оз вермы овны. Перымса Степанлысь анбурсö велöдöма. И бара чуймöма, мыйла пö сійöс вунöдöмаöсь? Заводитöма корсьны татшöм шыпаса книгаяссö, но некысь абу сюрöма. И пуксьöма ачыс гижны. Друг пö да кодлыкö, гашкö, тшöтш лоö интереснö.

Кык во чöж сійö зільöма-уджалöма. Важ перымса шыпасъясöн первой ки помысь гижöма Евгений Афанасьевлысь "Епшо да Настук" гижöдсö. Та бöрын дасьтöма Геннадий Юшковлысь "Öк-тас", сэсся кывбур да висьт чукöръяс, "Коми му" газетысь босьтöм шмоньяс да мойдкывъяс, Алёна Шомысовалысь "Муслун биыд абу помтöм...", Евгений Митюшевлысь кывбуръяссö, медбöрын — Исус Кристослысь олöмсö...

Быд окотитысь ставсö тайöс вермас лыддьыны. Ачыс Семён Терентьев лыддьö:

— Дерт, Перымса Степанöс уна ног позьö донъявны. Но тайö енбиа мортыс кöсйöма, медым коми ас чужан кыв вылын сёрнитіс дай Енлы вермис юрбитны-эскыны. А мый талун миян олöмын? Великöй Отечественнöй война помасьöм бöрын Сыктывкарын вöлöма коми школа. Юркарын йöзыс комиöн сёрнитісны. А талун? Вежоннас чужан кыв велöдöны 2 час, а немеч кыв – 6(!) час. Тайöс бура тöда, уджала школаын плöтникöн. Мыйла коми кывсö öтдор-тöны? А сэсся ханты да манси моз пырам ичöт лыда вужвойтырö. Коми кыв йылысь зэв унаöн больгöны, но збыльвылас мыйкö вежсис-ö? 1926 воын Россияын вöлöма 194 сикас войтыр, а öні уна-ö?

Майшасьö олöма морт, сьöлöм-думнас пессьö, корсьö петан туй... Та вöсна и босьтчöма ас киöн важ перымса шыпасъясöн гижны книгаяс.

Михаил Ладанов.

Снимокыс Фёдор МакаровлÖн.

"Коми му" газет.