Новости Республики Коми | Комиинформ

Нималö ыджыд вежöра йöзöн

Нималö ыджыд вежöра йöзöн
Нималö ыджыд вежöра йöзöн
logo
Нималö ыджыд вежöра йöзöн
Снимокыс Фёдор МАКАРОВЛÖН

 

Сійö либö мöд сиктлöн тöрытъя да талунъя олöм-вылöмöн тöдмасигöн ми медводз донъялам сійöс, дерт жö, на серти, кодъяс нимöдісны тайö сиктсö матысса и ылысса муясын. Та серти Емдін районса Гам ёна торъялö мукöдысь. Кöть нин сійöн, мый татчöс школаса велöдчысьяс пöвстын вöлі и став мир пасьта тöдса учёнöй-социолог Питирим Александрович Сорокин. Сылöн олöм-вылöмöн, наукаö кузь да абу кокни туйöн позьö тöдмасьны сиктса музейын.

Тайö музейыс воссис Гамын 1996 вося октябрь 28 лунö, кор пасйисны Гамса второкласснöй школалы 95 во тырöм. Важ велöдчан стрöйбаас и меститчöма сійö.

Кыдзи висьталö музейса öнія директор Светлана Александровна Отева, Гамса второкласснöй школасö помалісны Коми автономиялы подув пуктысьясысь öти Дмитрий Александрович Батиев, Коми совнархозса вöвлöм веськöдлысь Фёдор Степанович Коковкин, Коми пединститутса вöвлöм велöдысь Георгий Афанасьевич Старцев да уна мукöд.

А воссис второкласснöй учительскöй школаыс, Яренск уездын татшöм сикасысь дзик öти, вежа ай Иван Степанович Покровскийлöн водзмöстчöм серти. Сыысь öтдор, сэні медводдза велöдысьясöн вöліны Александр Николаевич Образцов, Александр Витальевич Вахрамеев, Николай Васильевич Воронцов. Тайö школаас коркö ве-лöдчылісны и "Парма сьöлöмын" помавтöм романлöн автор да коми фольклор туялысь Павел Григорьевич Доронин, Коми пединститутса вöвлöм велöдысь, коми челядьлы роч кыв вылын анбур гижысь Степан Николаевич Коновалов, РКП(б) Коми обкомса вöвлöм секретарь, а бöрынджык СССР-са ЦИК-ö да национальносьтъяс Сöветö пырысь Михаил Петрович Минин, Коми пединститутын вöвлöм велöдысь Николай Иванович Седьяков да мукöд. На йылысь висьталöны музейса экспонатъяс.

1917-1939 воясö тайö стрöйбаас меститчис Гамса школа. И бара жö уна нималана йöз помавлісны сійöс. На лыдын Коми пединститутысь физика да математика факультетса вöвлöм декан да физика кафедраöн веськöдлысь Геннадий Петрович Балин, поэт Василий Иванович Власов, Коми АССР-ысь просвещениеса министрöс вöвлöм вежысь Николай Иванович Козлов, Коми Республикаысь удж кузя комитетöн вöвлöм веськöдлысь Николай Егорович Некрасов, поэт Пантелеймон Александрович Образцов, Коми АССР-ысь йöзöс социальнöя могмöдöм кузя министр Мария Петровна Попова, СССР-са наукаяс академияысь Коми филиалса веськöдлысьöс вöвлöм вежысь, наукаса доктор Юрий Иванович Калимов, генерал-майор Владимир Николаевич Козлов, филология наукаса доктор Валентина Матвеевна Лудыкова, филология наукаса кандидат, Коми Республикаысь Государственнöй премияа лауреат Галина Александровна Некрасова, паськыда тöдса журналист Владимир Васильевич Огнёв, "Вымскöй" да "Коквицкöй" совхозъясса вöвлöм директор Иван Васильевич Огнёв. На йылысь помтöг вермас висьтавлыны музейса талунъя директор Светлана Отева.

А татчöс музейсö котыртöм могысь водзмöстчис Александр Иванович Некрасов, коді юрнуöдіс Гамса шöр школаöн 1960-1993 воясö. 1980 воын велöдчаніныс вуджис выль стрöйбаö, а важас меститчисны культура керка да музей. Талун культура керкаö пыранінас öшалö нималана учёнöй Питирим Сорокинлöн серпасыс. Кы-дзи казьтылö Александр Иванович, сійö дыр гижасис Питирим Сорокинлöн олöм-вылöм йылысь Ленинградса профессор Голосенкокöд. А сэсся бöрынджык Санкт-Петербургысь Гамö волісны кинооператоръяс снимайтны Питирим Сорокинлöн "Долгий путь" небöг кузя кинофильм. Ме пö вöлі буретш турун пукта. Музейса сэкся директор Татьяна Николаевна Малафеева пö вайöдіс кино вö-чысьястö веськыда видз вылö.

Талун музейын позьö тöдмасьны и медводдза коми анбур дасьтысь да коми войтырöс Исус Кристос эскöмö пыртысь Перымса Степанлöн, а сідзжö Гамса школаын уна велöдчысьлöн олöм-вылöмöн, татчöс войтырлöн гортса кöлуйöн, Емдін районысь петлöм нималана войтырлöн портретъясöн. Музейö волывлöны и ас районысь, и ылі муысь гöсьтъяс. Налы эм мый видзöдлыны татысь. Ыджыд нимкодьлун чу-жö сьöлöмад, кор аддзан, кымын нималана мортöс сетіс чужан муыслы Гамса школа.