Талун став мирын, тшöтш и Россияын, уна сёрнитöны мортлысь правояс дорйöм йылысь. А кутшöм та кузя серпасыс миянын? Коми Республикаын мортлысь правояс дорйысьуполномоченнöй Людмила Завьялова журналистъяскöд неважöн аддзысьлігöн висьтасис аслас воджынся удж йылысь.
Квайт тöлысьöн унаöн шыöдчы-лісны мортлысь правояс дорйысь уполномоченнöй дінö. Сёрниыс медсясö муніс омöль оланінъясысь выльлаö вуджöм, висьысьясöс лекарствоясöн бурджыка могмöдöм, жилищно-коммунальнöй услугаяс донсялöм, судъяслöн да право ви-дзан тэчасъяслöн уджын тырмытöмторъяс, армияын служитöм да уна мукöдтор йылысь. Шыöдчысьяс пöвстын 62 прöчентыс — мужичöй да 33-ыс—нывбаба, на лыдын пенсионеръяс, дзескыдінын пукалысьяс, вермытöмъяс. Медся уна шыöдчысьыс Сыктывкарысь, Ухтаысь, Сосногорскысь, Воркутаысь, Княжпогост, Емдін районъясысь. Ачыс уполномоченнöй тайö каднас сёрнитіс 163 нывбабакöд да 86 мужичöйкöд.
Йöзлöн норасьöмъяс кузя сійö унаысь шыöдчыліс Коми Республикаса Юралысь да сійöс вежысьяс, республикаса министерствоясöн да ведомствоясöн, кар-районса, сикт-посёлокса администрацияясöн веськöдлысьяс дінö. Людмила Васильевналöн висьталöм серти, öні уна норасьöм воö йöзсянь банкъяс вылö, кор найö вывтіасьöны кредит сеталігöн. Сэк жö миян войтыр оз бура тöдны кредит босьтігöн уна сикас гусяторсö да тшöкыда, позьö шуны, веськалöны налькйö. Со и йöзлысь правояс дорйысь уполномоченнöйлы войтыркöд аддзысьлігъясöн пыр лоö гöгöрвоöдны найöс, кыдзи да мый бурджык вöчны.
Öтчыд уполномоченнöй дінö локтіс кык челядя нывбаба, коді важöн нин торйöдчöма верöсыскöд. Мöдыс пö дзебсясьö да оз кöсйы мынтыны алимент. Нывбаба корис отсавны корсьны верöссö. Людмила Васильевна шыöдчис та кузя право видзан тэчасъясö. Тыдовтчис, мый аньлöн вöвлöм верöсыс важöнкодь нин кувсьöма. Сэк жö нывбабалы алиментыс чукöрмöма 170 сюрс шайт дон. Коді öні та мында сьöмсö сылы мынтас? А кутісны кö син улын тайö мортсö право видзысьяс, эз эськö, гашкö, ло татшöмторйыс.
Абу ставыс лючки и туберкулёзöн висьысьяс пöвстын. Кор оз видзчысьны тайö висьöмсьыс, сійö водзö паськалö. Тöдса, мый туберкулёзöн медсясö висьöны дзескыдінын пукалысьяс. Сэк жö срок помасьöм бöрас закон серти тайö войтырыслы колö сетны позянлун воöдчыны гортаныс, шуам, поездлöн торъя купеын да мед татшöмъяссö колльö-дісны торъя йöз. Но тадзисö гежöда овлö. Со и мортлöн правояс кузя уполномоченнöй шуис сентябрь тöлысьын кыпöдлыны тайö удж вöснаыс кывкутысьяскöд сёрни.
Майшöдлö мортлысь правояс дорйысь уполномоченнöйöс весиг сійö, мый уналаын сöмын мода вылас тышкасьöны борщевик паськалöмлы паныд. Кöть эськö быттьö тайö и абу сылöн мог. Тайö быд-мöгсö бырöдöм вöсна колö кывкутны районъясса, сикт-посёлокъясса власьтъяслы. Но, кыдзи шуис ачыс Людмила Васильевна, тайö пö и менам мог. Уполномоченнöйлы пö инмö дзик быдтор, мый йитчöма мортлöн олöм-вылöмкöд.
