Талун Сыктывкарысь гортса кöзяйкаяс окотапырысь волывлöны яйöн вузасян лавкаясö, кодъясöс восьтіс Светлана Батареева. Сэтчöс бур сьöлöма вузасьысьяс зільöны могмöдны медся асныра ньöбасьысьöс. Да и найö тані оз ёна асныравны. Öд пызанвыланыс век веськалö оз кыськö бокысь вайöм, а ас овмöсын быдтöм да сöмын на начкöм пемöслöн яй. Со и окота лои сёрнитыштны вузасян фирмаса кöзяйкакöд, кыдзи сылöн ставыс артмö.
—Светлана Витальевна, мый вайöдіс тіянöс тайö бизнесас?
—Ичöтдырсянь кöсйи лоны вузасьысьöн. Но бать-мам эз ошкыны менсьым мöвпöс. Со и пыри велöдчыны Чувашияса пединститутö. Сэсся некымын во велöді школаын физика да математика. 1989 воын верöскöд локтім Сыктывкарö. Кадыс вöлі сьöкыд. Ставсö сетісны талон серти. Майтöгла да кослунъя выйла колö вöлі быдса часъясöн сулавны. Овмöдчим медалöм патераын. А сэсся и кагаяс чужисны.
Пыри уджавны Кöджпомса челядь керкаö. Но сэні нажöвитöм сьöмыс нинöм вылö эз тырмы. Öттшöтш мöдлаын ковмис нажöвитчыны. А юрын пыр бергаліс мöвп: "Кыдзи водзö овны?" Шуим верöскöд ньöбны порсьпиöс. Керкакöд орччöн сулаліс важиник пес сарай, сэтчö и меститім сійöс. А мыйöн вердны? И миянлы бара мойвиис. Керкаяс сайын аддзи совхозлысь эновтöм нин му, кытчö тулыснас кöдзлöмаöсь мöс сёркни. Эг дышöдчы да кери пуктассö. Сійöн и тöвйöді порсьпиöс.
Сэсся кыпöдім ичöтик гараж. Мöд судтаас овмöдім комын чипанöс. Бара ньöбим дас порсьпиöс. Жаль, некымын кувсис. Арнас кольöмаяссö начким да лавкакöд орччöн телега вывсянь кутім вузасьны яйöн. Дерт, вöлі неуна и яндзим. Но меным колö вöлі вердны челядьöс. Колö вöлі мöв-пыштлыны и аскиа лун йылысь. Кор мöд кагалы тырис кöкъямыс тöлысь, муні уджавны карса рынокö. Вузаси быдторйöн, мый вöзйыліс кöзяин. Бöрынджык верöс-кöд шуим босьтчыны вузасьны яйöн. Ньöблім сійöс порсь ви-дзысьяслысь, лöсьöдім йитöдъяс республикаса уна районкöд. Тайö воясыс, быд сикас сьöкыдлунъ-ясыс да корсюрö тшыг нисьö пöт олöмыс унаторйö велöдісны. Некутшöм шойччан лунъястöг уджалі дас вит во.
—Ковмис-ö венласьны мукöд вузасьыськöд?
—Некор ог зіль пöръявны ньöбасьысьöс. Век вöзъя сöмын бур вузöс. Велöдчи керавны яй. Тані öд сідзжö эмöсь гусяторъяс. Ньöбасьысьяс пиысь унаöн тайöс пыр жö казялісны да öні векджык локтöны ме дінö. Да и яйöн мукöд вузасьысьяс пондісны пыдди пуктыны менö.
Нёль во сайын лоис позянлун восьтыны ассьыным лавка Давпонын. Но вузасьöмыс сэні эз пыр артмы. Зэв нин ичöт вöлі барышыс. Кöсйи пöдлавны лавкасö, но эг удит. Менö, вöлöм-кö, важöн нин кор-сьöны ньöбасьысьяс, кодъяскöд удиті лöсьöдны йитöдъяс карса рынок вылын. Найö и вöзйисны меным лöсьöдны лавка кильчö весьтын "Светланасянь свежöй яй" выль юргижöд. Сэки пö вöвлöм ньöбасьысьясыд бара кутасны волывлыны тэ дінö. И мый ті чайтанныд? Выль юргижöдыд и збыльысь кутіс кыскыны ме дінö ньö-басьысьясöс.
—Ті вузасянныд свежöй яйöн. Но öд колö та дыр-йи и аслыныд начкыны ловъя пемöсъясöс, керавны яйсö, уна пöсь кисьтны. Збыльысь öмöй вермö тайöс вöчны нывбаба?
—Шулі нин, мый тайö бизнесас дзик быдторйö велöдчи. Ньöбам ловъя порсьясöс. Мыйла? Ми вузасям свежöй яйöн. Сідзкö, и лавкаö колö пыр вайны сöмын на начкöм пемöс яй. Ми лöсьöдім йитöдъяс республикаса пöшти став фермерыскöд, скöт видзысь уна мукöд войтыркöд. Тшöкыда найö асьныс корсьöны менö да вайöны пемöсъяссö. Неважöн восьтім ассьыным начкысянін, кöні уджалö вит морт.
—Вузасянныд сöмын порсь яйöн?
—Порсьлöнысь öтдор эм и кукань да мöс яй.
—А коді тіянлы тайö бизнесас отсасьö?
—Дерт жö, верöсöй, Виталий Иванович. Сыкöд венім Сыктывкарын олігöн медводдза сьöкыдлунъяссö. Сійö пыр вöзйö меным, кыдзи мый бурджыка вöчны, ачыс вöдитö машина. Ичöтджык пиным миян туйöд жö восьлалö. Ыджыдджыкыс велöдчö юристö. Ме öні ёнджыкасö документъясöн нокся.
А кабала нокыд збыльысь зэв уна. Торкалöны уджсö чиновникъяслöн прöверкаяс. Сэсся падмöдöны и быд выль сикас документъяс, кодъяс тшöкыда вежласьöны. А бизнестö котыртöм могысь найöс колö бура тöдны.
Тайö лунъясö Светлана Батареевалы республикаса асшöр предпринимательяс пöвстысь медводдзалы сетасны сертификат, мый сылöн вузöсыс лöсялö талунъя корöмъяслы.
Сідз кö нин шуны, ни öти предприниматель оз вермы ошйысьны, мый сылöн ставыс кокниа артмö. Сідзжö и Батареев гозъялöн. Но бать-мамлöн асланыс челядь вöсна кывкутöмыс велöдіс найöс зумыда сулавны кок йыланыс. Найö некор эз виччысьны государствосянь либö кутшöмкö лышкыд мортсянь отсöг. Эз норасьлыны и сьöкыдлунъяс вылö. Но пыр зілисны вöч-ны йöзлы бур.
— Мекöд орччöн пыр вöліны бур йöз, — шуö Светлана Батареева. — Локті мöд республикаö, мöд карö, кöні некод менö эз виччысь. Но паныдаси бур йöзкöд. Ми олім авъя суседъяскöд орччöн, налöн патераын уна во чöж. Найö пыр отсавлісны миянлы. И ме сідзжö пыр куті паметьын кывъяссö аслам мамлысь, коді тшöкыда шулывліс, пыдди пö пукты суседъястö. Öні ме и ачым сідзжö зіля уналы отсавны. Öд Енмыс кö сетіс тэныд мыйкö бурöс, сійö бурсö бöр колö бергöдны йöзлы.
