Неважöн Сыктывкарса да Воркутаса епископлöн керкаын "гöгрöс пызан" сайö чукöртчылісны общественнöй да религиознöй котыръясын, национально-культурнöй автономияясын зільысьяс, уна челядя бать-мам, медым сувтны Россия Федерацияын да торйöн Коми Республикаын ювенальнöй юстиция вынсьöдöмлы паныд.
А мый сэтшöмыс ювенальнöй юстицияыс, коді шызьöдіс Россияын да тшöтш и Комиын олысьясöс?
Кратайтчö, но чирыштны оз позь?
Тайö оланпассö Россияса чиновникъяслы вöзйö Канада. Но вичкоын служитысьяс оз кöсйыны, медым миян странаын "ыджыдаліс" ювенальнöй юстиция кузя оланпас.
—Ювенальнöй юстицияыс пыдди оз пукты семьяöс, — паніс сёрнисö отеч Филипп. — Библия кö велöдö пыдди пуктыны да радейтны бать-мамöс, выль оланпас сертиыс семьяын ыджыдалысьöн лоö кага. А сідзкö, и тыр арлыдтöмаöс кратайтчöмысь ог кутöй вермыны чирыштны. А сійö водзö вельмас да, мыйö татшöмыс вайöдас?
Челядьöс быдтыны-воспитайтны абу кокньыд. Но буретш тыр семьяын ичöт морт быдмö вежавидзысьöн. Бать-мамыслöн да пöль-пöчыслöн туйдöмöн сюркнялö пель саяс, мый сэтшöм бурыс да лёкыс, и тадзи кöленаысь кöленаö вуджöны рöдвужлöн бур традицияясыс. А кыдзи вермас вежöртöм на нывка либö зонка донъявны олöмас лоöмторъяссö? Важся йöз на шулöмаöсь, мый олöмтö овны — абу потшöс вомöн вуджны. Падман да код дорö медводз шыöдчан? Дерт, бать-мамыд дорö. Налы медводз и висьталан сьöлöм дойтö. Да насянь и виччысян отсöгсö.
Ювенальнöй юстиция серти жö семьякостса йитöдъяс абу зумыдöсь. И дзикöдз гöрöдыс орö, кор бать-мамлöн быдтасныс верстяммас. Бать-мам да челядь оз лоны матысса рöдвужöн. Неважöн телевизор пыр петкöдлісны Финляндияын олысь öти семьяöс. Парализуйтöм олöма аньöс ыстісны странасьыс, сы вöсна мый сійö абу сэтчöс олысь. Кöть эськö и вайöдöма сійöс сэтчö нылыс. Но Финляндияын ыджыдалö ювенальнöй юстициялöн оланпас, код серти верстьö ныв да мам абу матысса рöдвуж.
Суйöрсайса моз яндысьтöг?
—Кыдзи тадзи позьö овны? Мыйла революцияöдз эз вöвны пенсионеръяс? И пöль-пöч эз тшыгъявны. Да сы вöсна, мый найöс вердісны-юктöдісны, кöмöдісны-пасьтöдісны верстяммöм нин челядьыс. Быдöн ичöтсяньыс нин тöдіс, мый сійöс быдтасны бать-мамыс, а сэсся ачыс нин налы лоö олöмас пыкöдöн, — висьталіс Сыктывкарса да Воркутаса епископ Питирим.
Владыка пасйис и сійöс, мый ювенальнöй юстиция вермас вайöдны зэв ыджыд неминучаöдз – семья пузувтöмöдз. Öд сэки надзор службаяс кутасны зэв сюся видзöдны бать-мам бöрся. Кыдзи найö быдтöны челядьсö, кутшöм чачаясöн ворсöны зон-посни, быд лун-ö чöсмöдлöны кагасö апельсин-бананöн, тшöкыда-ö ньöбöны выль паськöм, оз-ö öлöдны компьютерöн ворсöмысь да с.в.
—Миянлы оз лöсяв суйöрсайсалöн оласногыс. Сэні ставсö позьö вöчны, шуам, тыр арлыдтöмаяслы кадысь водз мусукасьны. Германияын весиг эм том йöзлы торъя керка, кытчö найö бать-мамсьыс гусьöн волывлöны кутчысьлыны-окасьны. Мыйла ми кутам на моз яндысьтöг овны? — дивитöмпырысь висьталö Сыктывкарса да Воркутаса епископ.
Вильшасьöм-дурöмысь ньöр
Сідзкö, выль оланпас сертиыс челядьлы позяс овны кыдз кöсйöны да кужöны. И омöль оласногысь найöс чирыштны оз кут позьны. Дерт, абу гуся, мый кор бать-мам дöзмöны челядь вылас, унаöн ньöръялöны либö юрсиöдыс някыртöны. А овлö, и небыдінас шлачкöны. Кызвыныс öд чайтöны, мый ньöръялöмысь нинöм абу лёкыс. Нэмъясöн пöль-пöчьяс кывзысьтöмъясöс буретш ньöрйöн и велöдлöмаöсь. И челядьыс бать-мам вылас таысь абу лö-гавлöмаöсь.
—Миянöс кö, вильышпозъясöс, батьным эз тасмаавлы, код тöдас, кутшöмöсь быдмим, — шуö Комиын украинечьяслöн национально-культурнöй автономияö пырысь Николай Николаевич Дидюк. — Чирыштöмыд абу тешитчöм. Некод öд оз тшöкты челядьöс воспитайтöм могысь чеп йылö пуксьöдны либö батареяö домавны.
Ювенальнöй юстиция серти жö весиг юрсиöд някыртöмысь верман бать-мамыдкöд янсавны, норасян кö быттьö на вылö. Францияын öти аньлысь та вöсна кагасö мырддьöмаöсь. И кор сійö некымын во мысти мöдöс чужтöма, весиг нёньöднысö абу лэдзöмаöсь, пыр и мырддьöмаöсь коньöр мамлысь и тайö кагуксö.
И куритчыны кутасны, и юны?..
"Гöгрöс пызан" сайын вöліны и бать-мам. Найö ставныс ювенальнöй юстиция Россияын вынсьöдöмлы паныд.
—Менам дас челядь, ставöн зэв вежавидзысьöсь, эскам Енлы. И суйöрсайса оласногыс пов-зьöдлö миянöс. Кыдзи сідз кагалы ставсö позьö? — шензьö Светлана Анатольевна Давыдова. — Медся нин ёна верöскöд майшасям, мый телевизор пыр быд срамсö петкöдлöны. Миянöс бать-мам велöдісны яндысьöмöн, йöзöс пыдди пуктöмöн овны, а öні мый вöчсьö?
Светлана Анатольевна паныд и сылы, мый öні школаын бать-мамлы висьтавтöг заводитöны юасьны челядьлысь, кыдзи найö олöны гортас.
—Тайö семья костö сюйсьöм, — дöзмöма ань.
—Бурджык эськö вöлі, миян правительство кö бурджыка тöждысис судзсьытöма олысь семьяяс вöсна. Школаясын колö вердны зонпосниöс дон босьттöг, сетны бур тöдöмлун, тöждысьны налöн дзоньвидзалун вöсна, — пырöдчис сёрниö уна челядя бать Юрий Анатольевич Новиков.
Коми Республикаса наркология диспансерысь нарколог-психиатр Галина Колегова пасйис:
—Россияын кö вынсьöдасны ювенальнöй юстициялысь оланпас, уна семья киссяс. Кутасны кö каттьысьны бать-мам вылö челядьнысö ньöръялыштöмысь либö юрсиöдыс някыртöмысь, сирöтаяслöн лыдыс, а такöд тшöтш и мыж вöчысьыс содас. Öд киысь петöм ныв-зон кутасны и куритчыны, и вина-сур юны, и наркотикöн дурмöдчыны...
* * *
Сыктывкарса да Воркутаса епископлöн керкаын "гöгрöс пызан" сайö чукöртчылысьяс гижисны Россияса Президент да Коми Республикаса Юралысь дорö шыöдчöм, медым найö эз лэдзны вынсьöдны тайö ковтöм оланпассö. А меным окота шыöдчыны "Коми му" газет лыддьысьяс дорö, мед юксясны ювенальнöй юстиция вылö асланыс видзöдласöн.
