Июнь 24 лунö республикаса Госсöветысь депутатъяс медбöръяысь чукöртчылісны тувсовъя сессия вылö. Видлалісны 40 саяс юалöм. Унджык оланпас баласö вынсьöдісны да вежсьöмъяссö пыртісны öтсöгласöн, сöмын öткымын кузя кыптыліс вен.
Мирöвöй судьяясöс индöм бöрын парламентарийяс öтсöгласöн вын-сьöдісны республикаса Юралысьöс нöшта öти, витöд, вежысьöс. Сійöн лоис экономика сöвмöдöм кузя министрöс первой вежысь Владимир Тукмаков. Татшöм коланлунсö Вячеслав Гайзер подулаліс сійöн, мый кар-районъясö ветлігъясöн сылы абу воöмаöсь сьöлöм вылас муниципалитетъяс сöвмöдан планъяс.
– Меным чайтсьö, мый правительствоын, сёрнитны кö бизнес кывйöн, оз тырмы проектъяс вылын уджалысь менеджер. Уналаын эмöсь инвестиционнöй проектъяс, но оз кö ло наöн веськöдлысьыс, вермасны джöмдыны. Та вöсна выль вежысьлöн медтöдчана могыс – котыртны тайö уджсö да видзöдны сійöс збыльмöдöм бöрся, — гöгöрвоöдіс Вячеслав Михайлович сессия водзвылын комитетъясын тайö юалöмсö видлалігöн.
Кыв шутöг гöлöсуйтісны и республикалöн 2010 вося бюджетö содтöдъяс пыртöм вöсна, кодъясöс вöзйис сьöм овмöсöн веськöдлысь Виталий Стаханов. Сійö юöртіс социальнöй стрöйбаяс кыпöдöм-дзоньталöм, челядьöс шойччöдöм вылö содтöд сьöм вичмöдöм йылысь. Та вылö пöшти 700 миллион шайт правительство кöсйö удждыны федеральнöй бюджетысь.
Нöшта öткымын юалöм видлалöм бöрын Госсöвет быдсöн шызьыліс. А ыззьöдіс ставнысö оланпас бала, код серти 11 час рытсянь 8 час асылöдз оз позь вузавны некутшöм курыд зелля, весиг сур (ресторан-лавкаясысь öтдор, кодъяслöн эм та вылö лицензия), а сідзжö оз позь юны найöс йöзаинъясын. Кыдзи пасйис Госсöветын социальнöй политика комитетöн веськöдлысь Ольга Савастьянова, депутатъяслы ковмас босьтны ас выланыс ыджыд кывкутöм, сы вöсна мый федераль-нöй тшупöдын татшöм оланпасыс абу на. И век жö сійö вывті колана. Öд странаын быд олысь вылö, пузчужöм кагаясöс бось-тöмöн, вонас воö 50 сулея курыдтор.
—Дерт, тайö вайö ыджыд барыш (68 миллиард шайт), но артыштны кö сыысь воштöмъяссö, бöрыннас ми видзам триллион саяс, — тöдчöдіс Ольга Викторовна да корис уджъёртъяссö вынсьöдны оланпассö.
Тайö эз эскöд "справедливоросс" Сергей Катунинöс да сійö корис висьтавны, кутшöм кывкöртöд вöчис та кузя прокуратура. Ольга Са- вастьянова веськыда висьталіс, мый бöръяыс эз сет сöглассö. Вöліны и юалöмъяс, кыдзи милиция кутас видзöдны оланпассö збыльмöдöм бöрся, но пытшкöс делöяс кузя министр Владимир Ерёмченко шуис, мый найö дасьöсь нин и тöдöны, кыдзи тайöс вöчны.
– Тайö вывтіасьöм. Ми тöдöмöн дзугам Россияса оланпас. Татшöмъяссö вынсьöдлісны куим регионын, и быдлаын суд киритіс найöс. Колö мунны мöд туйöд, шыöдчыны Госдумаö да сы пыр вöчны ставсö, – водзö зілис дорйыны ассьыс видзöдлассö Сергей Катунин.
А коммунист Александр Рогов, мöдарö, ошкис оланпас баласö да пасйис, мый Госдумаын куим во сайын нин кöсйылісны, но öнöдз эз видлавны сійöс. И кымын унджык регион пö вынсьöдас, сымын öдйö- джык палялас Россияса парламент. Сэсся депутатъяс, кöть эз ставныс гöлöссö сетны сы понда, оланпассö век жö вын-сьöдісны.
Сьöкыда "муніс" и Госсöветлы правительстволöн удж йылысь республикаса Юралысьлöн быд вося висьтасьöм кузя оланпас, кöні Вячеслав Гайзер вöзйис, медым депутатъяс донъялісны докладсö, сетісны юалöмъяс да висьталісны сы кузя ассьыныс мöвпъяссö эз пыр жö, а бöрынджык. Кöть тайö эз во сьöлöм вылас ни коммунистъяслы, ни "Справедливая Россия" партияö пырысьяслы, но мыйкö дыра вензьöм бöрын вынсьöдісны и сійöс.
Ставныс ошкисны республикаса прокурор Владимир Поневежскийлысь водзмöстчöмсö. Öні бать-мамöс, кодъяслöн быдтасъяслы абу на 18 арöс, да найö öтнаныс гуляйтöны войнас, кутасны штрапуйтны. Асланыс зептысь жö мöдасны вештысьны и сöстöмлун да пöрадок торкалысьяс. Сідз, ковмас кывкутны керка йöрын машина мыськöмысь, кытчö сюрö лöп-ёг шыбла-лöмысь, позьтöминö киоск либö гараж сувтöдöмысь да мукöд татшöм нога пакöститчöмысь.
