Новости Республики Коми | Комиинформ

Доймалöны верстьö и челядь

Доймалöны верстьö и челядь
Доймалöны верстьö и челядь
logo
Доймалöны верстьö и челядь
Снимокъясыс Фёдор МАКАРОВЛÖН

 

Бöръя вит вонас Сыктывкарын содіс туй вылын доймалысьлöн лыдыс. Кöлеса улö веськалöны и верстьö, и олöма йöз, и челядь. Тшöкыда овлö, мый машинаяс вывті öдйö муніганыс зурасьöны öта-мöдыскöд да туй бокас швачкысьöны. Туйö петан да, он и тöд, кытчö воан. Кыдзи жö видзчысьны неминучаысь? Та йылысь неважöн сёрнитісны пресс-конференция дырйи республикаса госавтоинспекцияын, медицинаын уджалысьяс да бать-мам, кодъяслöн челядьыс веськавлісны неминучаö.

 Вöляысь ветлыны оз нин вермыны?

—Машинаöн ветлысьяс вывті öдйö журъялöны. Мыйлакö надзöн муннысö некыдз оз вермыны. Кöть эськö туй пöлöн сувтöдалöма öд урчитан пасъяс. А мир туйöд и тöв ныр моз лэбöны, — висьталö Коми Республикаса МВД-лöн ГИБДД-са управлениеöн веськöдлысьöс вежысь Сергей Елфимов.

Кыдзи пасйис Сергей Леонидович, Сыктывкарса уличаяс вылын медся уна неминучаыс вöлöма 2004-2005 воясö. Кольöм во неуна чиныштöма.

—Шог, мый и челядь доймалöны, — висьталö Сыктывкарса УВД-ысь ГИБДД-лöн отделысь ДПС-са командир Александр Резвинский. — Тавося январь-майын Сыктывкарын туйвывса неминучаö веськаліс комын ныв-зон. А öти зонка Лесозаводын весиг кувтöдзыс доймаліс. Но сійö ачыс вöлі мыжа. Зонулов тшöкыда кутчысьöны автобусö либö вöр кыскалан МАЗ-ясö бöрсяньыс да исласьöны. Та-дзикöн жö "дурöма" и Лесозаводса зонка. И вештысьöма олöмнас – веськалöма кер тыра машина улö.

Республикаса туйяс вылын эмöсь местаяс, кöні торйöн нин тшöкыда овлö неминучаыс. Шуам, Эжвалань мунігöн доручасток дорын. Тайö местасö автоинспекцияын уджалысьяс ас костаныс шуöны "долина смертиöн". Пöшти быд лун сэні зурасьöны машинаяс.

—Эжвалань мунан туйыс абу нин шыльыд. Уна воöн сэні арт-мöма кöлея. А шоперъяс радей-тöны ветлыны öдйö. Вöляникысь кö мунан, машинатö оз шыбит кöлеясьыс. Но та йылысь руль сайын пукалысьяс, тыдалö, вунöдöны, — водзö висьталö Сергей Леони- дович.

Республикаын уна туй жугласьöма. Шыльыд асфальт пыдди джуджыд гуранъяс. Татшöмъяс вылас тшöкыда жö овлöны неминучаясыс. Дзик нин шогмытöм Сыктывкарсянь Кулöмдінö мунан туйыс. Сійöс дзоньталöм вылö колö уна сьöм.

Госавтоинспекцияын зільысьясöс да бурдöдысьясöс ёна майшöдлö и сійö, мый карса уличаяс вылын йöзыс доймалöны туйсö вуджигöн. Кöлеса улö веськалöны весиг сідз шусяна "зебраті" мунігöн. ГИБДД-ын уджалысьяс чайтöны, мый öд чинтан пасъясыд машинаöн журъялысьястö оз сувтöдны. Колö пö уличаяс вылас вольсавны сідз шусяна "куйлысь полицейскöйöс". Татшöм "мылькйыс" быть падмöдас öдйö мунысьтö.

—Савин нима улича вылын ускöттьöыс луннас витысь овлö. А мыйöн вольсалім "куйлысь полицейскöйтö", ньöти эз ло. Татшöм "падмöгъяссö" колö лöсьöдны Коммунистическöй да Октябрь шöр туй уличаяс вылын, — вöзйö Сергей Леонидович.

Кыдзи пасйис Сыктывкарын челядьлöн мöд номера поликлиникаысь главврач Светлана Захарова, зонпосни тшöкыда веськалöны больничаö улич вылын доймалöмысь.

—Мукöддырйисö кöть и неуна доймалöмаöсь, быть колö петкöдчывны бурдöдысьяслы. Ки-кокыс кö эз чег либö юрыс эз пырк-мун, оз на позь шуны, мый кага эз доймы. Повзьöмыс вермас жö чорыда мöрччыны сылы. Верстяммас да, вермас лоны сідз, мый кутас машина руль сайö пуксьöмысь повны либö нöшта кутшöмкö висьöм "мыччысяс", — чайтö Светлана Александровна.

Туй вылын доймалöм кагаöс специалистъяс видлалöны некымын во дорвыв. Медводз колö петкöдчыны тöлысь мысти, сэсся во джын кольö доймöмсяньыс да. Кыдзи шуöны врачьяс, висьöмыс вермас и сёрöнджык мыччысьны.

 Ачыс мыжа?

Кольöм вося октябрь 10 лунö Максаковкаын чорыда доймаліс öкмыс арöса Ваня Казаков. Сійö урокъяс бöрас ёртыскöд вöлöм локтöны гортас. Друг на вылö лёкысь увтчигтыр уськöдчас ыджыд овчарка. Зонкаясыд повзясны понсьыд. Öтиыс вужляö крукасяс да усяс пода туй вылö. А Ваня повзьöм йывсьыс уськöдчас машинаöн ветлан туй вылö.

Рöкыд вылö журкнитас иномарка да зургас зонкатö. Ваня некымын метр ылнаö лэбас да чорыда доймалас. Йöзыс, кодъяс аддзылöмаöсь лоöмторсö, юöртö-маöсь неминуча йывсьыс Ванялöн мамыслы. Кутöмаöсь и зургысьсö, Сыктывкарысь дас кöкъямыс арöса зонмöс. Машинаöн ветлан правоыс абу да, ветлö генеральнöй дöверенносьт серти.

Тайö здукас ань, дерт, эз думыштлы, мый ковмас сылы кыскыны том мортöс кывкутöмö. Мамыдлы медвойдöр пиыслöн дзоньвидзалуныс тöдчана. А зургысь зонлöн сöвесьтыс, тыдалö, абу. Кыдзи и сылöн рöдвужыслöн. Гоз-мöд лун мысти, кор Ванялы неуна кокньöдыштöма, мыжа зонлöн мамыс да ыджыд мамыс волöмаöсь больничаö. Но абу отсалöм могысь, а мöдарö, асьныс мыждöмаöсь Ваняöс.

—Ме вöлі бокын сулала. Палатаö пырисны кык тöдтöм ань. Чайті, неминучаö веськалысьяслы отсöг сетысьяс. Кыла, юасьöны Ванялысь, кыдзи сійöс шуöны да коді бать-мамыс. А сэсся заводитісны видны пиöс. Мыйла пö машина улас уськöдчин, ачыд и мыжа, — горш дорыс гöрддзасис Вера Ивановналöн.

Писö машинаöн зургысь зонсö сійö оз кöсйы пуксьöдны дзескыдінö. Но мыжавтöг оз жö вермы. Нöшта на и сэтшöм яндысьтöмöсь рöдвужыс – сьöкыд операция бöрын видісны Ванюксö.

Öні тайö лоöмторсö туялö милиция. Но Казаков гозъялöн лачаыс абу, мый вермасны кыскыны зонсö кывкутöмö...