Сыктывкарса университет помалöм бöрын том специалист Эдуард Пименов бергöдчис чужан Кöрткерöс районас да паніс уджалан туйвизьсö "Звезда" газетын. Бöрынджык вуджис юркарö, зілис "Йöлöгаын" да "Коми муын". Но, буракö, чужанінас мортыд век коланаджык — 2001 воын сійöс бара "коралісны" "Звездаö", сöмын та пöрйö веськöдлысьöн нин. Сэксянь Эдуард Вячеславович юрнуöдö Кöрткерöс районса петасын уджöн. А газетыслы тайö воыс, 2010-öдыс, — некымын пöвста тшупöда.

 —Тайö воыс "Звезда" газетлы збыльысь паса. Öти-кö, 70 во сайын, 1940 вося май 1 лунö, петіс сылöн медводдза номерыс. "Колхознöй труд" ним улын. Сэки öд районлысь тэчассö öтторъя выльмöдісны да, нимсö вежлаліс и газет: вöлі "Ударник вöрын", "Колхознöй труд", "Выль олöм"... А 1965 вося апрель 1 лунсянь Шойнаты да Кöрткерöс öтувтöм районын лоис "Звезда". Нимсö сетісны Шойнаты районса петаслысь, кодöс йöзöдісны 1930 восянь.

Таво жö март 30 лунö, "Звезда" ним улын петöмлы 45 во тырöмсянь лунöн водз да медводдза номер йöзöдöмлы 70 во тырöмсянь тöлысьöн водз, йöзлы киö воис газетлöн 9 сюрсöд номер.

—Та дыранад, дерт, и редакторыс уна вöлі?

—1940 восянь газетын ыджыдалісны А.Е.Кутькин, И.В.Макаров, А.И.Ганов, С.Н.Кынев, И.В.Быковская, В.Д.Попов, В.П.Потапов, Н.Н.Быковская, Л.И.Потапова, А.Е.Фёдорова. Öні со ме мырся.

—А орччöн коді зільö, "пöжалö" газет судзöдысьлы лыддянтор?

—Гижöны, тэрмасьöны тöдмöдны сикт-грездса войтырöс районса олöм-вылö-мöн да выльторъясöн редакторöс вежысь Нина Коюшева, отделса редактор Оксана Гудырева да неважöн на миян дорö локтысь Наталья Макарова. Овлö, и ачым йöзöдча. Кывкутысь секретарöн уджалö Елена Худяева, сійö жö верстайтö газетнымöс. Отсасьö сылы Анастасия Микушева.

—Асланыд этша журналистыд да, буракö, редакциялы ёна отсасьöны внештатнöй корреспондентъяс?

—Налöн отсöгтöг дзик некыдз. Куим мортыд öд районса быд пельöсö оз слöймыны воöдчывнытö, со и воöны отсöг вылö сикт-грездсаяс, зэв ыджыд аттьö налы. Сідз, важысянь нин районса газеткöд ёртасьöны Кöрткерöсысь Станислав Коюшев да Александр Панюков, Визябöжысь Анатолий Кулаков, Одыбысь Геннадий Попов, Нёбдінысь Галина Микушева, Шойнатыысь Галина Панюкова. Неважöн на, но тшöкыда да сьöлöмсяньыс гижöны Висерысь Оксана Пинягина да Шойнатыысь Ольга Печеницына. Газетö гижан уджö пырöдчöны и томъяс.

—Кыдзи талун кутчысянныд сьöмöн дзескыд олöмас? Мый вöчанныд, мед лыддысьысьыд эз чин?

—Быд районса газетлöн талун олöмыс öткодь: кызвын сьöмсö колö аслыд нажöвитны. Та могысь и рекламатö корсьны, и дон босьтана гижöдъяс йöзöдны. Кыдз шуласны, овны велöдö рынок. Ми весиг канцтöварöн да му-кöдторйöн вузасян лавка восьтім, документ вылö йöзöс снимайтам.

Ог вунöдöй и тираж усьöмсьыс видзöм йылысь. Некымын во нин ёртасям "Кöрткерöсса" потребитель котыркöд. Сикт-грездын олысьяслöн эм позянлун гижöдчыны газет вылö сылöн лавкаяс пыр донтöм донысь. Тиражысь матö джынйыс тадзи öкмö. Дерт, и пошта пыр гижöдчöны.

—Унаöн элясьöны, мый газетныд рочмис, а содіс-ö та бöрын сійöс лыддьысьыс?

—Коркö водзынджык нин ми юасьлім лыддьысьысьяслысь, колöны-ö районкаын роч гижöдъяс. И унаöн, торйöн нин Лöкчим вожсаяс, шуисны, мый кöсйöны лыддьыны юöръяс и рочöн. Но ми ог пуктöй мог дзикöдз рочмыны. Пек-ничаса номер рочöн лэдзны босьтчöм бöрын тиражным неуна содыштіс.

—Кыдзи вочаалісны йöзыс бöръя выльпыртöмтö — öтуввезйын лист бок восьтöм? Унаöн-ö сэтчö пыралöны?

—Пыралысьыс, дерт, абу на уна. Но лист бокöн тöдмасьысьыс вочасöн содö. И гижысьыс тырмö. Тшöтш и рекламаным содіс. Сійöс йöзöдысьяс шуöны, мый тöдмалöмаöсь миян йылысь буретш сайт отсöгöн.

—Эдуард Вячеславович, кутшöм могъяс сувтöданныд ас водзаныд водзö кежлö?

—Асланым отсасьысьяскöд — внештатнöй гижысьяскöд да лыддьысьысьяскöд — öтвылысь кутам водзö сöвмöдны газет, мед "Асъя кодзувным" дзирдалас нöшта на югыда. Газет судзöдысьясöс ышöдöм могысь водзö мöдам йöзöдны быд сикас конкурссö. Таво со бара йöзöдлім "Мисс "Звезда" ордйысьöм. Пырöдчисны сэтчö унаöн, финалö петіс сизим ныв. На пöвстысь медся-медсясö кутам бöрйыны аски, июнь 11 лунö, юбилейлы сиöм гаж дырйи. Корам газет лыддьысьясöс да ёртъяснымöс волыны Кöрткерöсса культура керкаö 5 час рытын га-жöдчыштны öтлаын!

Сёрнитіс Елена ПЛЕТЦЕР.

"Коми му" газет.