Сыктывдін районысь Выльгорт сикт горулын кыйсян угоддьö бара нин кöсйöны вöчны сідз шусяна "турунвиж зонаöн". Сэні сэсся, дерт, оз кут позь лыйны утка ни кулик. А водзмöстчöма республикаса видз-му овмöс да сёян-юан министерствоысь вöралöм кузя департамент. И помкаыс, майбыр, сюрöма: тулыснас пö сэтчöс видзьяс вылö пуксьылö дзодзöг-пискулька да лэбö на весьтöд юсь-кликун. Тайö кыкнан пöткасö пыртöма Гöрд книгаö.
А вöравнысö кöні?
Некод оз кут вензьыны, мый Гöрд книгаö пыртöм пöткаястö колö видзны. Юсьтö, чайта да, ни öти прамöй вöралысь оз лый. Енмöн сетöм мич вылö лыбас-ö öмöй киыд... Дзодзöгтö эськö унаöн окотапырысь кöсйöны шковгыны, да оз тай артмы. Зэв рам да видзчысьысь пöтка. Пуксьылö сöмын восьсаинö.
А вот Выльгорт сиктысь да Сыктывкарысь вöра- лысьясöс департаментын уджалысьяслöн татшöм "водзмöстчöмыс" чорыда сконйыштас. öд талун кызвын йöзыслöн удждоныс абу ыджыд. Торйöн нин сьöкыд пенсионеръяслы, студентъяслы, уджтöмалысьяслы... Став тайö йöзыс автобусöн кокниа воöдчылісны Выльгортöдз. А öні мый? Кыйсьыны ковмас кытчöкö мöдлаö ветлыны. А лысьтан талун машинатö кольны? Сэсся ломтас-мавтасыс зэв дона. Пуля-порок йылысь и сёрни абу. Да и мыйла мунны Воркутаса тундраö, кор тані, юркаркöд орччöн, позьö лыйны жыдачтö?
Талун кыйсьöмыд абу сöмын шойччöм. Социальнöй тöдчанлуныс эм жö. Сійö жö уджтöмалысьлы зук-гордаыс — содтöд вöлöга. Коми мортыд нэмсö вöравліс да кыйліс чери. А кыдзи öні пи-внуксö велöдасны утка лыйны бать-пöльыс?
Озыр кö — позьö?
Кольöм нэмся 80-öд вояс помын Выльгорт горулын вöлі нин "турунвиж зонаыс". Законтö пыдди пуктысь вöралысьяс сэки вуджлісны Сыктыв ю мöдлапöлö либö ветлывлісны Няйт куръя сайö. Но сэки автобус билетыс вöлі донтöм – 5 ур дай ломтас-мавтасыд "аттьö вылö" вичмывліс.
А вельмöм йöзыд, на лыдын чинаяс да озыръяс, тайö кадас некодысь повтöг сизьдісны Выльгорт горувса тыясысь горда-чöжтö. И тулыснас дзодзöгтö лыйлісны. И öні тадзи жö лоö. Телевизор пыр унаысь нин петкöдлісны, кыдзи Алтайын татшöмъясыс вертолётсянь кыйöмаöсь гöраса межъясöс – архаръясöс. Но öнöдз неко-дöс эз мыждыны. А уткаыд абу Гöрд книгаö пыртöм архар.
Веськыда кö, кодсюрö ошкöны "турунвиж зона" котыртöмсö. Бöръя кык вонас пö татчöс видз вылысь ни öти дзодзöгöс эг лыйöй, вöралысьыс зэв уна да. Öдвакö тадзитö вöчас закон серти олысьыд.
Кырныш кырнышлысь...
Вöралöм кузя департаментын уджалысьяс эскöдöны, мый сяммасны кöрт-вомавны вывтіасьысьясöс. Но öдвакö тайö налы вын серти. Эмöсь-ö налöн вына джипъяс да öдйö журъялысь катеръяс? Быд ты дорö автомата мортöс он сувтöд. Да и чинатö öдвакö лысьтасны чирыштны. Некор на тай эз йöзöдлыны газетын, мый киöдыс кутöмаöсь закон торкалöмöн татшöм вöралысьсö. Миян пöль-батьяс на шулöмаöсь, кырныш кырнышлысь синсö пö оз кокав.
Шензьöдö, мый миян странаын пыр зільöны кедзовтны закон пыдди пуктысьöс. Татшöм вöралысьыс и ружье вылö разрешение босьтö, и путёвка да лицензия ньöбö, кыйсян правилöяс збыль-мöдö... А шышыд став вылас сьöвзьöма.
Чуймöдö и "Коми войтыр" öтмунöмлöн веськодьлуныс. Кольöм во Комиын оз вöлі позь вöйтны ботан. Талун со вöралöмысь öтдортöны. А "Коми войтырсаыд" вомас быттьö ва босьтöмаöсь. Налы эськö медводз колö жыннянö швачнитны. Комиясöс öд кедзовтöны...
Кабинетсьыс петавтöг
Татшöм выльторсö пыртысьясыс, тыдалö, важöн нин абу петавлöмаöсь ыджыд кабинетсьыс. Выльгорт горувса видзьясын важöн быдмöны пипу, бадь да кыдз. öткымынлаын турунсö весиг оз ытшкыны. Стöч та вöсна пискулькаыд öні пуксьывлö лыда местаö, кöні эрдыс восьса на. Таво дзодзöг котыртö аддзылöмаöсь Ёляты посёлок да Няйт куръя костын, дзик Сыктыв берегас, да Сыктывкарса видз-му овмöс техникум дорын, нöшта мир туй бокын.
Коляс во-мöд, и вöрсялöм тайö видзьяссьыс Гöрд книгаö пыртöм пискулькатö ог нин сэсся аддзылöй. И мыйла, сідзкö, "турунвиж зонасö" лöсьöдны?
Вежöра йöз вöзйöны мöд туй: тувсовъя кыйсьöмсö тупкыны. А арнас лэдзны вöравны. Сы вöсна мый пискулькаыс лунвылö лэбö дзик мöдлаті.
