Новости Республики Коми | Комиинформ

Медбуръясыс — Спаспорубысь да Ухтаысь

Медбуръясыс — Спаспорубысь да Ухтаысь
Медбуръясыс — Спаспорубысь да Ухтаысь
logo
Медбуръясыс — Спаспорубысь да Ухтаысь
Снимокъясыс Фёдор МАКАРОВЛÖН

 

Май 27 лунö Сыктывкарын "Россияса пошта" ФГУП-лöн Коми филиалын вöчисны "Пошта отделениеöн медбур веськöдлысь" республикаса профессиональнöй конкурслы кывкöртöд.

Тайö ордйысьöмас донъялісны кöкъямыс кар-районысь öкмыс пошта отделениеöн веськöдлысьясöс.

Казьтыштам, став Россияса тайö конкурссö миян республикаын первой нуöдісны кар-районъясын. Сэні вермысьяс сэсся петкöдчисны Сыктывкарын, сервис да связь колледжын, коді важысянь нин ёртасьö Комиын федеральнöй пошта йитöд управлениекöд. Буретш тайö велöдчанінас дасьтöны поштаса операторъясöс.

"Пошта отделениеöн медбур веськöдлысь" ним вöсна юркарын республикаса конкурсын ордйысисны Сосногорскысь, Воркутаысь, Печораысь, Сыктывкарысь, Ухтаысь, Луздорысь, Кулöмдін да Емдін районъясысь специалистъяс.

Жюрилы, кодöн юрнуöдіс "Россияса пошта" ФГУП-лöн Коми филиалöн веськöдлысь Виталий Осипов, эз вöв кокни бöрйыны медбуръяссö. Кыдз тыдовтчис, кар-районса пошта отделениеясысь начальникъяс абу сöмын асланыс уджын профессионалъяс. Найö сяммöны и кывбуръясöн да сьыланкывъясöн йöзсö гажöдны, а сідзжö чöскыда пусьыны-пöжасьны.

Ставнысö ошкисны видзöдысьяс. И век жö, кыдзи и быд конкурс-ордйысьöмын, жюрилы ковмис бöрйыны медбуръяссö. Вермысьясöн лоисны Луздор районса Спаспоруб сиктысь Елена Пантелеева да Ухтаысь Ирина Волкова. Июнь помын, Россияса поштаын уджалысьяслöн праздник водзвылын, кодöс таво пасъям июль 11 лунö, буретш найö и ветласны ордйысьны Санкт-Петербургö, кöні чукöртчыласны Россияса Рытыв-Войвыв кытшысь республика-обласьтъясын пошта отделениеясöн медбур веськöдлысьяс.