Кольöм вежонö Кулöмдін районö удж кузяыс ветліс республикаса видз-му овмöс да сёян-юан кузя министрöс первой вежысь Алексей Буткин. Медшöр могыс вöлі — вöчны помшуöм Помöсдінын нянь пöжаланін йöв завод улö дасьт öм кузя.
Видз-му овмöс да сёян-юан кузя министр Сергей Чечёткинлöн видзöдлас серти, Помöсдінын йöв переработайтан заводыс зэв колана. Öти-кö, тані абу сэсся ни öти гырысь предприятие. А заводсö восьтöм бöрын оз сöмын ло йöзыслы удж, но и сиктсаяслы чöскыд да бур йöла вöлöга. Помöсдінын да Пожöгын войтыр ас овмöсъясас видзöны 800 гöгöр сюрукöс, сідзкö, предприятиеын йöв кузя падмöгыс оз ло. Мöд-кö, öнія молзаводыс война кадсянь нин меститчö сиктса вичкоын, да Енлы эскысьяс важöн нин корöны сетны налы стрöйбасö.
Помöсдінса йöв переработайтан пред-приятиесö вöвлöм нянь пöжаланінö вуджöдны шуисны 2004 воын нин, дасьтісны и став колана кабала-документсö, но сьöм тырмытöмла уджыс сувтіс. Сэки уджтассö збыльмöдöм могысь коліс 11 миллион гöгöр шайт. Талун донъясыс содісны и, стрöитчысьяслöн арталöм серти, завод выльмöдöм могысь колö 32 миллион. 5,2 миллион шайтсö государство вичмöдіс нин.
Министерство тшöктіс специалистъяслы выльысь видлавны проектсö збыльмöдöм могысь кабалаяссö да корсьны позянлун чинтыны рöскодъяссö. Завод выльмöдöм вылö шуöма видзны 15-16 миллион шайт: 10 миллион доныс ньöбны да ладмöдны оборудование, кольöм сьöм вылас дзоньтасьны.
Выль предприятиеас позяс вöчны 5 сикас вузöс: йöв, шомйöв, нöк, рысь да небыд сыр. Талун "Помöсдін" СПК-лöн важ молзаводас öти сменаöн перерабо- тайтöны 1 тонна йöв, гожöмнас куимöдз. Вöчöмторсö иналöны бюджет учреждениеясö, вузалöны татчöс лавкаясын да шойччан лунся ярмангаяс дырйи.
