Эг на ёна важ "Коми му" газетын горöдлы, мися, кöні тэ, коми книга? А со бара сэтшöм сяма юалöмöн шыöдча, сы вöсна мый петкöдчис: оз сöмын художествоа небöгыс, но и велöданыс школаясын оз тырмы.

Менам аслам челядьöй — öти ныв да вит пи — школаад велöдчисны, кор ме олі да уджалі сиктын на (бöръяыс кындзи) да коминад бура велалісны сёрнитнытö. Но сэсся ковмис вуджны карö. А найö быдмисны, гöтрасисны-верöс сайö петісны и карса школаясö нин челядьнысö сетісны. А сэні, дерт, коми кывтö öтдортісны. Со внукъясöй комисьыд и кöдзалісны, воштыны кутісны.

Но, слабог, коми войтырлöн медводдза съезд дырйи кыпаліс мам-бать да пöль-пöч кыв ловзьöдöм йылысь сёрни. Вöлі вынсьöдöма зэв бур да колана оланпас, код серти коми роч кыв моз кутіс шусьыны государственнöйöн да сійöс быть лои велöдны школаын. Съезд бöрын первойя воясас законсö и збыльысь зілисны пöртны олöмö, но со коли кызь во, а коми кыв велöдöмыс "чотö".

Юалі внучкалысь да правнучкалысь, кыдзи найö тöдöны-велöдöны коми кывсö. Внучкаöй шуис, школаын пö эз велöдны, но пöчсяньыс неуна велавліс да, гöгöрвоö да неуна сёрнитыштö. Правнучкаöй сідз жö вочавидзис, мый комисö оз велöдны, да нöшта и комиöн кужысь пöчыс кувсьыліс. Мöд дорö тайö жö юалöмнас шыöдчи да, висьталіс, мый школаас коми кывйысь тöдöмлунсö сетöны, но омöля. Велöдан небöгыс пö этша, урок пансигöн кык морт вылö öти учебник сетлöны, а помасьöм бöрас бöр босьтöны. Коймöд и нёльöд внук-правнучкаöй дзик жö тадзи вочавидзисны. Сэсся пö и вежоннас сöмын öти урок овлö.

Тешкодь артмö: англия ли немеч кывйысь вежоннас 2-3 урок, а пöль-пöчлöнысь дзик öти. Тайö, дерт, зэв этша. Чайта да, комисö колö нуöдны кыкысь оз гежöдджыка. Ыстысьöны, бать-мамыс пö полöны, мый коми кывйыс челядьсö ёна сьöктöдас. А ми тай велöдлім да, гöгным эз письты. Бур вылö на муніс. Ми тшыг кынöмöн, верстьö пыдди удж вöчöмöн, школаö даддьöн пес кыскалім да эг укшальмöй ни бöбö воöй, мöдарö на, винёвджыкöсь лоим. Нежитöмсьыд да чеченитöмсьыд тöлкыд оз ло. Челядьтö колö ичöтдырсяньыс велöдны уджавны, асланыс ки-кокöн да вежöрöн шедöдны бур олöмсö, а оз тöв чужъяліг виччысьны, мый бать-мамыс налы ставсö вöчасны. Кымын уна кад кутас видзны велöдчöм вылö, сымын бур.

Мыйла коми кывйысь велöдчан небöгыс оз тырмы, ветлі тöдмавны Коми Республикаса йöзöс велöдан министерствоö да велöданног бурмöдан институтö. Меным сетісны коми кыв велöдысьяслы 1992-2009 воясö йöзöдöм небöгъяслысь лыддьöг (список). Вель кузьöс. Но буретш велöдчаныс, учебникыс, 18 воöн петöма сöмын 20: 1-öдсянь 9-öд классöдз да кыдзи чужан кыв, сідз и рочьяслы велöдöм могысь. Тайö жö зэв этша! А унджык небöгыс велöдысьяслы методичкаяс, челядьлы лыддьысян книгаяс да хрестоматияяс. А кыдзи лыддьысьнысö, коми кыв велöдан небöгыс кö оз тырмы?

Тöдмалі тшöтш, уна-ö лыдöн лэдзöны учебникъяссö. Медводз юалі роч челядьлы урчитöмаяс кузя. Вöлöмкö, первой во велöдысьяслы (мöд классалы) 1992 воын йöзöдöмаöсь 36.000 экземпляр, кöкъямыс во мысти, 2000 воын, — 8 сюрс, а коймöдысьсö, мöйму, — 4.800-öс нин. Ставнас Коми Республикалы! Вывті этша. Сэсся öд и книгаыд дженьыд нэма, сы мында ки пыр мунö да. Коми кыв мöд во велöдысьяслы (коймöд класса роч челядьлы) небöгсö медводдзаысь лэдзöма 1999 воын 11.000 лыдöн, мöдысьсö 2003-öдын — 4 сюрс. Кор йöзöдасны коймöдысьсö — абу тöдса. Татшöм жö серпасыс мукöд классын велöдчысьяс кузя. Абу бурджык и коми челядьлы урчитöм небöгъяснас. Öти кывйöн, быд пöрйö найöс йöзöдöны пыр этшаджык лыдöн.

Институтса и министерствоса войтыр эскöдöны, мый небöгсö дасьтöны тырмымöн, но вермöны лэдзны сöмын джынсö да этша лыдöн. Унджык вылас пö сьöмсö оз вичмöдны. Сідзкö, колö корны, гöгöрвоöдны, мый коми кыв велöдан книгаыс колö тöдчымöн уна. Гашкö, корсьны сьöмöн отсалысьясöс-спонсоръясöс. Колö вöчны ставсö коми кыв йылысь оланпассö олöмö пöртöм могысь, а оз пыксьыны.

Нöшта кöсъя юксьыны роч челядьöс коми кывйö велöданног кузя видзöдласöн. Ме серти, методикасö колö вужвыйöныс вежны. Ме коркö вöлі кык детсадйын школаö дасьтысян группаын коми кыв урок вылын да казялі, мый сэні кывъяссö велöдöны олöмсьыс торъялöмöн. Босьтöны кутшöмкö кыв, шуам, "ныр" либö "пель", гöгöрвоöдöны, мый сійö лоö рочöн, да тшöктöны унаысь висьтавны. Сэсся мöдöс тадзи жö, коймöдöс. Татшöм ногöннад, чайта да, этша мый челядьлöн юрас коляс, öд медся бура вежöрад кутчысьö эмакывйыс кадакывкöд либö кывбердкöд öтлаын. Сэсся мед эськö и ворсіг ли дуригмоз позис вöчны шуöмторсö. Шуам, висьтавны "ныр" да тшöктыны "чышкыны" либö "пöдлавны öдзöс", "кизявны дöрöм" да сідз водзö. И мед вöчасны унаысь. А локтан урок вылас выльысь ставсö уськöдны тöд выланыс да вöлисти велöдны выль кывъяс.

Роч йöз öдйö велалöны шуны "лок татчö" да "мун татысь", "вай рок", "пуксьы да ваксьы". Ме, кыдзи Эжва районын коми котырöн юрнуöдысь, урокъяс бöрас висьтавлі татшöм ногöн велöдöм йывсьыс, но педагогъяс пыксисны, миянлы пö индöма методикасö — и пом! А методикаыс кö оз отсав, оз "уджав"? Чайта, колö водзмöстчыныджык, босьтчыны выляс, а оз кутчысьны важас.

Тöдöмысь, отсаласны и не-ыджыд разговорникъяс, кытчö лоö пыртöма медся тшöкыда кывлан кывтэчасъяс да сёрникузяяс.

Но медводз, дерт, колö тырмымöн лэдзны коми кыв велöдан небöг-учебникъяс.