Тöдан кö эськö, кутшöм туйвежын тэнö шудыд виччысьö, мöдлатi эськö он жö ветлы да.

Оля Рубцова эз жö тöд, кытöнджык дзебсясьö сылöн шудыс. Мамыс нывкалöн нэмсö медсестраалiс Абъячойын и, дерт, окотитiс, мед нылыс сылысь кок туйсö жö талялiс. Школа помалöм бöрас Ольга мöдöдчис Сыктывкарö. Но медколледжö веськавны эз мойви. Кык экзаменсö эськö и "нёль" вылö сдайтiс, да химия вылын сконйыштчис. Мамыс да нывъёртъясыс тшöктiсны пырысь-пыр видлыны пырны Ярославльса мединститутö, кытчö экзаменсö примитiсны сэн жö, колледжас, но öтчыд яналöм бöртиыд Ольга повзис, мый мöдысь дзик жö сiдз лоас.

Та вылын Оля эновтчис мамыслысь кöсйöмсö аслас том олöмö пöртöмысь. Мöвпыштiс мунны дзик мöдлаö. Зэв эськö окота вöлi сетчыны университетö серпасалан юкöнö, öд школасяньыс на радейтiс рисуйтчыны, артмылiс и. Но сэтчö аскöдыд быть колiс вайны дась нин серпасъястö, а медицина туйöд мöдöдчысьыдлöн татшöмыс сьöр-сьыс эз вöв.

И Оля пырис велöдчыны технологическöй колледжö, мед лоны модельер-конструкторöн, век нин пö серпасасьöм дорас матын- джык. Но велöдчöмсö помавны эз удит — чорыда висьмис. Бурдöдчöм могысь вöзйысис петавны академическöй отпускö. Лэдзöм пыдди босьтiсны да киритiсны студентъяс лыдысь.

Но олöмыс мунö водзö, вочасöн вöтлö-разöдö том вирысь висьöм-шогсö. Оля помалiс 28 номера лицей, лоис шöрасьысьöн. То öтилаын вурсяс-шöрасьыштас, то мöдлаын. Удждоныс муртса тырмылiс сёйыштны-юыштны. Бур кöть, оланiн понда майшасьны эз ков. Батьыслы, кыдзи чернобылечлы, ас кадö карысь вичмöдлöмаöсь патера, да сэтчö и овмöдчис.

Юр сюянiн эм, сьöм чуктыштлö жö, муслун кö эськö нöшта! Öти рытö ныв чукöр, кыдзи и пыр, шмонитiг-сералiгмоз гуляйтiсны карса уличаясöд. Матыстчисны "Куслытöм би" дорö. Сэнi, на моз жö эз тöдны, кытчö воштысьнысö да, сулалiсны том зонъяс. Öтиыс на пиысь, са сьöд юрсиа, дзик пыр и воис Олялы сьöлöм вылас. Мöдыслы, буракö, еджыд нылыдлöн пöшти весьт кузьта син лысъяс увсьыс видзöдласыс ньöвйöн сатшкысьöма жö морöс шуйгаладорас. Вежон мысти Андрей Налбандян коралас Оляöс, а кык тöлысь мысти, буретш нывлöн чужан лунö, ворсасны кöлысь.

Олялöн, кöть и сизим во коли, век на син водзас свадьба луныс. Кыдзи налы гöсьтъясыс öтторъя горзiсны "Курыд!". И том гозъя некымын час чöж сулалiсны да окасисны. А кор найöс сэсся лэдзисны жö пуксьыны да кöть мыйкö воманыс сюйыштны, лунтыр öд тшыгöсь вöлiны, на улын лабичыс чегис. Но ставныс чайтiсны, мый тадзи и колö, да чеччыны отсалöм пыдди бара на горöдiсны: "Курыд!"

Регыд том гозъялöн чужис Сашук. Оля кутiс вурсьыштавны гортас. А Андрейлы ковмис вой и лун мырсьыны, медым тыр-бура видзны ичöт писö да том гöтырсö.

34 номера училище помалöм бöрын Андрей босьтчис вöчавны мебель. Гортас став пызан-улöс-шкапсö ас кинас лöсьöдöма. Мыйкö кö ковмас вöчны-дзоньтавны, ёртъяс-тöдсаясыс пыр жö сы дорö шыöдчöны. Зiль да киподтуя морттö уджыд пö тай, шуласны, ачыс аддзö.

Ольга ачыс сиктса морт, чужлöма Луздор районса Тыдор грездын да ичöтсяньыс тöдö быдсяма уджсö. Мамыс вит арöссянь нин куран-коса дорад сибöдöма, а сизим арöсöн мöс дорö лэччöдöма. Ачым пö ог тыдав, сöмын лысьтысьöмöй кылö. Асьныс эськö порсьясысь öтдор абу нинöм видзлöмаöсь, но ыджыд мамыслöн овмöсыс – кык мöс, кызь ыж, чипанъяс – быдöнлы "мöрччылöма".

Та понда ёна и шензьöма нылыд, кор чужанiнас кайлiгöн верöсыс, кодi быдмöма-олöма карын, сыысь на бурджыка мöстö лысьтöма, и косатö лэчталöма, и турунтö пуктöма. Вöлöмкö, Андрейöс бать-мамыс ичöтсяньыс öтнассö кольлöмаöсь гожöмнас дачаас дöзьöритны кöза-чипанъясöс. Асьныс сöмын шойччан лунъясö и волывлöмаöсь видлыны писö. Тадзи и велалöма зонмыд сиктса тöжд-нокас.

Сашук бöрын гозъялöн чужис Лизук. Кык кагаыдлы сьöмыд кык пöв уна колö. Оля пырис опера да балет театрö костюм-декорация вурны-дасьтыны. Но дырöн ли регыдöн сэнi бара жö сьöмнад топö-дiсны. И со уджöн могмöдан шöринсянь кабалаöн ныв ветлöдлiс кар кузя да корсис инасянiн.

Сыктывкарса коми культура шöринö кежалöма вöзйысьны сьöдас. Кутшöм нö пö удж вермасны сэнi меным вöзйыны, кор роч верöснад коми кывйыс вунны нин кутöма, да и кык посни челядя вурсьысьыд татчö öдва кö колас. Шöринöн веськöдлысьыс Олялысь мöвпъяссö быттьö лыддьöма да пöшти сiдзи жö и вочавидзöма. А сэсся рытнас звöнитöма пыралысьыдлы гортас да вöзйöма видлыны босьтчывны налöн уджас.

Бöрас нин, некымын тöлысь мысти, кор Ольга лоис шöринын ас мортöн, ме юалi веськöдлысьыслысь, Валентина Самариналысь, мыйла нывсö косöдöма. А, гашкö пö, небыд гöлöсыс вöрзьöдiс, гашкö, сьöлöмöн кылi, мый лöсялас миянлы, ог куж стöча висьтавнысö, но ньöти ог каитчы Ольгаöс корöмысь.

Быд выль удж дорö велавнытö сьöкыд, а сэтшöмö, кутшöмöс öнöдз на эн вöчлы, гашкö, сё пöв на делö. Но Ольгалы нимкодь сыысь нин, мый уджъёртъясыс сiйöс бура вочаалiсны да быдторйöн дасьöсь отсавны. Да и аслыс зэв окота видлыны вынсö выльторйын, быттьö выль сынöд лолыштны. Вöлöмкö пö, унатор кужа, мый весиг ачым эг чайтлы. И мам кывйыд бöр заводитöма ловзьыны морöсас. А кор уджыд сьöлöм сертиыд, быттьö и удждоныд тырмö жö.

Дерт, неуна сьöкыдджык ичöт челядьнад. Татшöм удж вылад мукöддырйиыс войöдзыс ковмывлö пукавны – гижны сценарий, дасьтыны выставка, нöшта мыйкö. Бать-мам челядьсö асыв-рытсö и ад- дзылöны. Том кöзяйкалы ковмö чеччыны вит час асылын пусьыны-пöжасьны, чеччöдны кагукъяссö да нуöдны найöс детсадйö. А рытнас семьясö бара на вердны-юктавны, сэсся песласьны-дöмсьыны да кагукъяссö водтöдны. Аслыс узьöм вылас нёль часысь унджык оз и вичмыв.

Но челядяд öд и шудыд, ставыс кö накöд бур. Сашук таво школаö нин мунас. Зэв кывзысьысь зонка. И водзтi абу вильшасьлöма, абу дöзмöдлöма верстьöясöс, а чойыслöн чужöм бöрын и асьсö верстьö моз кутö. Кывсö весьшöрö оз шу, ставсö бура мöвпыштöмöн, лабутнöя висьтасьö. Мöвпалö верстьö моз и. Та пуд Лизуклы кык пöвста вильышлун вичмöма. Да и ичöтджыктö семьяад ёнджыка жö лелькуйтöны. Лизук зэв ёна радейтö йöктыны. Лун и вой дась вежнясьны да чеччавны. Артистка, кöнкö, быдмö.

Но медъёна нывка радейтö ветлыны Ольгалöн батьыс ордö. Весиг ыджыд мамсö сы выйöдз оз кутлы-окав, кыдзи дедсö. И кор мамныслöн заводитчö велöдчан сессия да кор челядьсö нуöны Тыдорö, сэки Лизуклöн збыльысь гаж воссьылö. И татшöм гажныс вичмылö вонас кыкысь. Гашкö, эськö и нёльысь вичмылiс, но батьыслöн велöдчигкостi чоя-вокаöс Тыдорö оз катöдлыны.

Коркö Ольга да Андрей öтлаын сетлiсны документъяс Вöр институтö. И кыкнанныс босьтiсны сэтчö пырны колана мында балл. Сöмын сэки налы шуисны, мед гозъяысь кодкö öтиыс вузас кольччö, сы вöсна мый мукöд семьяысь велöдчынытö тшöтш окотитöны. Кольччис Андрей. А Ольга дыр эз думайт, пырис велöдчыны Санкт-Петербургса сервис да экономика академиялöн декоративно-прикладнöй творчество юкöнö. Верöсыслы регыд ковмис эновтчыны велöдчöмсьыс. И дзик на неважöн, дерт, гöтырыслöн тодмышкалöмöн, бöр пырис аслас институтö.

Со и тöд сэсся, кутшöм туйвежö тэныд кежны, кодарланьö воськов вöчны, кодöн кöсйыны да кодöн лоны. И кöнi тэнö шудыд виччысьö.