Новости Республики Коми | Комиинформ

Öтсöгласöн, öта-мöдлы отсасьöмöн

Öтсöгласöн, öта-мöдлы отсасьöмöн
Öтсöгласöн, öта-мöдлы отсасьöмöн
logo

 

Ирина Васильевна Осипова кöть и том на, унатор нин удитöма аслас олöмын. Слудкаса школа помалöм бöрын велöдчöма Сыктывкарса торгово-экономическöй колледжын курсъяс вылын да уджалöма вузасьысьöн. Но кыскöма гортас да бöр бергöдчöма ас районас.

 Мыйкö дыра уджтöмалöма. Сэсся уджöн могмöдан шöринсянь вöзйöмаöсь босьтны содтöд специальносьт. Велöдчöма вöдитчыны компьютерöн да локтöма Гурьёвчиö. Корöмаöсь поштаö. Тадзи аддзöма ассьыс ордымсö, да и шудыс сійöс вöлöм тані виччысьö: петöма верöс сайö, быдтöны нылöс.

Тайö уджыс нывлы тöдса нин вöлöма, мамсö вежлöма отпускъяс дырйи да и сідз отсасьöма сылы Слудкаса поштаын, кажитчö пö вöлі. Гурьёвчиын нин уджысь орöдчывтöг велöдчöма Архангельскса телекоммуникацияяс колледжын. И со 2003 восянь веськöдлö татчöс поштаöн.

—Первойсö сьöкыд вöлі, кывкутöмыс зэв ыджыд, да и йöзыдкöд колö кужны уджавны. Но вочасöн велалі. Миян котырным ичöтик, ме да куим поштальон. Олам öтсöгласöн, öта-мöдлы отсасям. Удж вылад быттьö праздник вылö воа, — серöктіс Ирина Васильевна.

Поштаын сиктсаöс могмöдöны унаторйöн. Татысь позьö ньöбны небöг, кутшöмсюрö газет-журнал, а сідзжö ручка-блокнот да быд лун колана посниторъяс. Татчö жö войтырыс волöны мынтысьны коммунальнöй услугаысь, биысь, телефонысь. Письмö, перевод-пöсылка, кöть и гежöда, мöдöдлöны, корлöны ыстыны Сыктывкарö дискъяс, медым сэні вöчасны фотографияяс. И кыдзи шуö поштаöн веськöдлысь, быдöнкöд колö кужöмöн сёрнитны, вочавидзны юалöмъяс вылö. А аслас "веськыд киöн" Ирина лыддьö Татьяна Михайловна Сухогузоваöс, коді быдторйöн отсасьö сылы, вежлö отпуск дырйиыс. Сійö тшöтш велöдчылöма связьса операторö, но веськöдлысьнад абу кöсйöма лоны да со 22 во нин почтальоналö.

Быдторйыс овлöма дыр каднад, и понъясыд усьласьлöмаöсь, курччывлöмаöсь на, кыдзи ачыс шмонитыштіс – восьсаинсö, а чужöмöс пö сумкаöн вöлі дзеба. Но вежны уджсö некор абу кöс-йылöма, йöзыдкöд пö интереснö, торйöн нин олöмаяс радпырысь виччысьöны пошта новлöдлысьтö, быдторсö висьталöны-сёрнитöны да сьöлöмсяньыс аттьöалöны.

—А ми ассянь зілям бурджыка могмöдны найöс, ас кадö разöдны газет-журналъяс, письмöяс, – кывкöрталіс Татьяна Михайловна, коді бара нин вöлі тэрмасьö тыра сумкаöн Королькиö да Таличаö.