2007 воын Эжва дорын кöляскаа мотоцикл зурасьöма машинакöд. "Кöрт вöлöн" мунысьяс абу доймöмаöсь. А мотоциклöн веськöдлысь пöльлысь коксö орöдöма. Содтöд на кöляскаас пукалöма ичöтик нывка. Мотоциклыс пасьмунöма, асфальтыс ойдöма вирöн...
Стажёр-спасатель Алексей Кузнецов сэки медводдзаысь ас синнас аддзöма туйвывса неминучалысь шуштöм да повзьöдлана серпассö. Медъёна майшöдлöма да дöзмöдöма, мый доймöм йöзлы отсавны сійö абу вермöма. Стажёрлöн могыс öти — видзöдны спасательяслöн удж бöрся да тадзи велöдчыны дорйыны йöзöс.
Талун Алексей Викторович ачыс нин спасатель, содтöд на и водолаз.
Ичöтсяньыс радейтöма спорт
Алексей Кузнецов быдмöма Сыктывкарын. Велöдчöма юркарса 4 номера школаын. Зонка ичöтсяньыс зільöма быдöнлы отсавны. Ассьыс ёртъяссö пыр дорйылöма, кор гырысьджык классъясын велöдчысьяс кöсйылöмаöсь кедзовтны.
Алексей ёртасьöма спорткöд. Школаас на велöдчигöн заводитöма ветлыны челядьлöн да том йöзлöн 5 номера спортшколаö, кöні вöлöма самбо секция. Тренер Нина Юрьевна Поликарпова казялöма зонкалысь зільöмсö. И быд ногыс ышöдöма да велöдöма сійöс бура вермасьны.
Школа помалöм бöрын том зон пырöма Коми пединститутса физико-математическöй факультетö. Сійö кадас быд ведомствоын да предприятиеын заводитöмаöсь ньöбавны компьютеръяс. А наöн сэки вöдитчыны сяммöмаöсь лыда йöз. Физмат факультетын буретш таö велöдöмаöсь.
Институт, дерт, абу школа, сэні ёна сьöкыдджык босьтны тöдöмлунтö. Лекцияяс, семинаръяс, рытнас содтöд на библиотекаын ковмылöма пукавны. Но та вылö видзöдтöг Алексей спорткöд абу янсöдчöма. Мöдарö на, петкöдчылöма быд сикас ордйысьöмас, шедöдöма самбо кузя спортса мастер ним.
Сюрукыдлы отсаласны жö
Том мортöс армияö абу босьтöмаöсь. Мамыс, Галина Александровна, зэв ыджыд арлыда нин вöлöма да.
Школаын велöдöм пыдди том морт медасьöма уджавны спасательöн. И Сыктывкарса аварийно-спасательнöй отрядын веськöдлысьяслы сійö воöма сьöлöм вылас. Спортсмен, зіль да водзмöстчысь...
Некымын тöлысь стажируйтчöм бöрын Алексей Викторовичöc индöмаöсь спасательöн. Медводдза жö лунас звöнитöмаöсь: Сыктывкарса вöвлöм аэропортлöн важ стрöйбаас пö йöрмöма варыш. Сöлöмаöсь машинаö да мунöмаöсь индöминö. Варышыд, тыдалö, гулюяс бöрся вöтлысигас жбыркнитöма стрöйба пытшкö, а сэсся сибдöма öшинь рамаяс костас.
Лэбачыс ыджыд дай ёсь ныра-гыжъя. Дöраöн вевттьöмаöсь да кутöмаöсь. Варышыс абу доймалöма. Мый сыкöд вöчны? Юркарса юннатъяслöн станцияö, гашкö, сетны да? Вердöмаöсь яйöн. Лэбач сёйöма. А сэсся сійöс лэдзöмаöсь. Кольöма мыйтакö кад. Бара звöнитöмаöсь, доймöм варыш пö карын. Нöшта öтчыд кутöмаöсь. Бордсö бурдöдöмаöсь да юннатъяслöн станциялы и козьналöмаöсь лэбачтö.
Спасательяслы быд лун звöнитöны. Сыктывдін районса Выльгорт сиктын пö мöс гуранö вöйöма. Бара сöлöмаöсь машинаö. Канализация трубаяс, буракö, мöвпыштöмаöсь нюжöдны сиктас. Гурансö кодйöмаöсь, а уджыс сэсся джöмдöма. Сэтчö и чукöрмöма ваыс да нюйтыс. Луд вылысь локтігас Сюрукыд и бузгысьöма. Ва веркöсас муртса юрыс тыдыштö. Ымзö нин мöскыд, быттьö корö-кевмысьö, мездöй пö менö кулöмысь... Кöзяйкаыс синвасö чышъян дорнас чышкалö. Суседъясыс сэні жö сулалöны. Но кыдзи эта ыджда пемöссö кыскан-перъян?
Алексей Кузнецов первойöн воськовтöма гуранас. Троскöн мöстö кынöм увтіыс гаровтöмаöсь да лебёдка отсöгöн перйöмаöсь. Сюрукыд весиг абу доймöма. Аньыд ёна и аттьöалöма.
А ю пыдöсад пемыд...
Том мортлысь зільöм-водзмöстчöмсö казялöмаöсь да вöзйöмаöсь велöдчыны водолазö. Öд быд спасательлöн эм некымын специальносьт. Алексей Кузнецов окотапырысь босьтчöма выль уджö. Первой бура тöдмасьöма удж вылын неминучаысь видзчысян правилöясöн, кöні ставсö ясыда висьталöма, мый колö тöдны водолазлы. Та бöрын нин бассейнын уялöма, сынöд тыра баллон кышалöмöн, ваувса маска да ласты пасьталöмöн...
Водолазлы и збыльысь унатор колö тöдны да кужны. Сідз, ю пыдöсын пемыд, нинöм прамöя он аддзы да и визулыс кылöдö. Тшöкыда ва веркöсын мöд водолазкöд "варовитöны" кабель отсöгöн. Сійöс кинас тракйöмöн "сёрнитöны": ва веркöссаыс индалö, мун пö веськыдвылö либö шуйгавылö. Ставыс тайö кутшöмакö Морзе азбука кодь...
— Менам велöдысьясöн вöліны Сергей Пашнин да Леонид Таланцев. Сергей Михайлович 20 сайö во нин водолазалö. Сы йылысь торъя небöг нин позьö гижны, — висьталö Алексей Кузнецов.
Тайö уджыс зэв аслыспöлöс. И сэк жö оз быд морт босьтчы ю пыдöсысь корсьны ваö пöдысьöс. Алексей Викторович казьтыштіс:
— Ачым кык вöйöм мортöс корсьлі да ваысь кыски. Öтиыс пöдöма дзик кар бердын. Воим да заводитім корсьысьны. Лэччи ва улö. А Сыктыв зэв визув. Ю пыдöсті краб моз кынöм вылад кыскасьöмöн лоö корсьысьны. Ваыс гудыр, нинöм оз тыдав. Ва веркöсын сулалысь ёртöй индö, сэні пö кöнкö, бурджыка корсь... Збыльысь, ки улö кокыс сюри. Тушасö морöс бердö топöді да кöвсö нетшыштöмöн юöрті, лэптöй, мися...
Сыктывкарса аварийно-спасательнöй котырын 8 водолаз. Республикаса быд пельöсö, кöні лоö кутшöмкö неминуча, ветлывлöны. Сідз, Чилимдін районын вöйöма катер. Ва улас сунöма берегсяньыс зэв ылын. Водлазъяс öдйö эськö аддзöмаöсь, но перйынысö вöлöм зэв сьöкыд. Таысь öтдор найö ва пыдöсысь лэптöмаöсь машинаяс, мотора пыжъяс... Княжпогост районса Чисва тыысь öти моторсö кык вежонöн кыкысь перйылöмаöсь. Бöръяысьсö йи улысь, 12 метр пыднаысь.
А öтчыд отсöгла шыöдчöма вöралысь. Сыктывкар бердса Чит вылысладорас Сыктыв юö вöйöма ружьеыс. Бать на пö меным сійöс козьнавліс. Криста ради, отсыштöй пö. Аттьöала, нинöм ог жалит... Мунöмаöсь урчитöминö. Вöралысь стöча шуöма, татчö пö вöйи... Пыжыс сувтöма якöр вылö. Алексей Кузнецов суныштöма ва улö. И заводитöма корсьны. А водолаз вылын паськöмыс-оборудованиеыс матö 80 килограмм: сынöд тыра баллон, комбинезон, торъя сьöктöд, öти кöмыс – 6 килоа... Мудзтöдзыс кималасöн лыасö кинас вешталöма. И öд бöръяпомыс Алексей Викторовичлöн чуньясыс веськалöмаöсь ружье стволас...
Вöралысьлöн вомыс пельöдзыс. Радысла, дерт. Водолаз-ёртъясыс ошкöмаöсь, тэ пö Алексей – молодеч, быттьö турун зорöдысь ем аддзин. А вöралысь бöрас нин отрядса веськöдлысь ним вылö гижöма аттьöалана письмö...
Сідзжö водолазъяс быд гожöм дежуритöны юркарса пляж вылын. Алексей Кузнецов висьталö:
— Ывлаыс жар, карса олысьяс, мукöдыс семьянас, локтöны вадорö. Сэні, дерт, ыркыдджык. Но кыдзкö зэв нин аслысног миян йöз шойччöны. Сур да курыд зелля дучкöны-юöны. А гажмасны да ваö пырöны. Быд гожöм код юра морт дасöс ваысь перйылам. Тайö сöмын миян дежуритігöн, мукöд смена йылысь ог казьтыв. Овлö, и челядь, кодъяс варччынысö оз кужны, гупликö веськалöны да заводитöны таб моз сунавны... И найöс вöйöмысь мездам.
И ордйысьны колö
Быд тöлысь спасательяс сдайтöны сідз шусяна норматив: котöртöны 100 метр, 1 да 3 километр, урчитöм мындаысь лэптöны гира, варччöны да уна мукöдтор на вöчöны. Спортса мастер Алексей Кузнецов ставсö тайöс кокниа вöчö. Прöст кадас ёртъясыскöд ворсöны футболöн да волейболöн.
Таысь на öтдор Россиялöн Рытыввыв-Войвыв кытшын нуöдöны спасательяс пöвстын ордйысьöмъяс. Сідз, бöръяыс вöлöма 2009 воын Вöлöгда обласьтса Вытегра карын. Комиысь команда босьтöма витöд места. Алексей Викторович шуö:
— Вöлі зэв уна команда. Татшöм ордйысьöмыс – аслысногöн тренируйтчöм кодь. Сэні вöчам ставсö, мый збыльмöдам удж вылын. Шуам, коді медся öдйö вундас-восьтас неминучаö веськалöм машиналысь öдзöссö да перъяс доймöм мортöс. А 70 метр джуджда чой йылö коді медöдйö кыпöдчас либö вертолётсянь гезйöд лэччас ва вылö да кыскас вöйысьöс берегö...
Победа дорысьяслысь патерасö дзоньталісны
Сыктывкарса аварийно-спасательнöй службаын зільысьяс пыр дасьöсь локны отсöг вылö пикö воöмалы. Шыöдчам буретш на дорö, суас кö ускöттьö. И налы жö звöнитам телефон пыр, пу йылö кавшасьöм кань кö бöр лэччынысö оз вермы...
Спасательяс бура гöгöрвоöны пöгибö воöм мортöс и мукöдöс, кодъяслы колö отсöг. И зільöны быдöнлы отсавны. Сідз, республикаын таво вöлі йöзöдöма Ыджыд Вермöмсянь 65 во тырöмлы сиöм "Мы – наследники Великой Победы" марафон. Вель уна сьöм лои чукöртöма войнаса да тылса ветеранъяслы отсалöм могысь. Владимир Кудряшовлöн веськöдлöм улын Сыктывкарса аварийно-спасательнöй котырын зільысьяс пуктісны жö тайö марафонас ассьыныс пай. Юркарын Морозов уличаса керкаын олысь Попов гозъялысь патерасö дзоньталісны. Иван Егорович – вöвлöм фронтöвик, а Лидия Егоровна – война кадö тылын зільысь...
