Миян олöмным топыда йитчöма сьыланкывкöд. Чужам да медводз мамлысь либö баблысь потандорса сьылöм кылам. Мöдар югыдас мунiгöн бара на сьылöдöны.
Олöм чöж – шогалам ли, радлам ли — ловным сьывны корö. Мукöддырйиыс кылан вунöдлöм нин сьыланкыв, а сiйö уськöдас тöд вылад кутшöмкö зэв дона казьтылöм, ылькнитас важыс да син водзад сувтас. Весиг сiйö кадся сынöд кöрсö быттьö кылан.
Быд кадлöн аслас, сылы лöсялана сьыланкыв. Мукöдыс со, видзöдан да, вежон чöж и юргöны, сэсся кытчöкö вошöны-сылöны. А эмöсь сьыланкывъяс, кодъяслы мойвиöма нэмъяс овны.
Öти татшöм — "Эзысь войын чужис сьылан" — сетiс нимсö юркарса коми культура шöринын панöм, коми сьыланкывлы сиöм рытпукъяслы.
Талунъя том йöз этшаöн тöдöны сьыланъяс, кодъясöс ливкйöдлiсны налöн пöль-пöчьяс, бать-мамъяс. Мукöдыслы, гашкö, нинöм нин оз висьтавны татшöм нимъяс, кыдзи Александр Осипов, Яков Перепелица, Прометей Чисталёв, Вацлав Мастеница, Лидия Чувьюрова, Валентина Есева. А öд буретш найö кыпöдiсны коми сьыланкывнымöс, бордйöдiсны сiйöс.
И рытпукъяслöн медшöр могыс — ловзьöдны тайö енбиа йöзыслысь бур нимсö. Гижысьяслöн, композиторъяслöн котыръяскöд, а сiдзжö воöм гöсьтъяскöд öтвылысь казьтывны вунöдлöм нин сьыланкывъяссö, найöс тэчысьясöс да сьылысьясöс. Пöльыштны важ шыладас выль лов шы. Сьыланкыв отсöгöн да мыйсюрö ас олöм-вылöмысь тöд вылö уськöдöмöн бергöдчывны важас.
Медводдза рытыс мунiс Ыджыд Вермöмсянь 65 во тырöм водзвылын. Сiйöс вöлi сиöма Айму вöсна Ыджыд тыш кадся, сы бöрся да война йылысь сьыланкывъяслы…
"Алöй ленточка"
Войналöн медводдза лунъяс… Олöмаяс и томъяс колльöдöны пöльнысö, батьнысö, вокъяснысö дорйыны вöрöгысь Чужан му.
Тайö кадыслы лöсялана сьыланкывсö эз на удитны тэчны, та вöсна юргöны паськыда тöдса йöзкостса коми сьыланкывъяс, мый улö ёна важöнджык нин – и финскöй, и первой мирöвöй, и гражданскöй война вылö мунiгöн эновтлiсны служивöйяс гортнысö. И на пöвстын "Алöй ленточка".
Менам вöлi алöй ленточка,
Воши сiйö озъя тылаö…
Со кыдзи рыт вылас донъялiс алöй ленточкалысь пертассö (образсö) Валентина Филиппова, филология наукаса кандидат:
— Алöй рöмыс коми фольклорын – пыр югыдлун, сöстöмлун, дерт, радейтчöм. Оз весьшöрö сьыланкывйыс заводитчы буретш тайö рöмсяньыс. Важ йöз, кор мыйкö колö вöлi зэв ёна тöдчöдны, тшöкыда корсьлiсны роч кыв. И тадзи быттьö ёнджыка тöдчöдiсны кывйыслысь вежöртассö.
Со и Василий Юхнин аслас романлы сетöма "Алöй лента" ним.
Алöй би – мездан, отсалан би. Сiдзкö, ставыс лоас бур, кöть эськö быттьö и некытысь нин бурсö виччысьнысö, öд танi, сьыланкывъяс, муса мортöс воштöмыскöд тшöтш кусö и олöмыс. Тайö зэв бура петкöдчö рöмъяс пыр: еджыд, виж, лöз…
Но бара жö менам чайтöм серти, сьыланкывйыслöн тайö вариантыс, кодöс ми бура тöдам да сьылам, помавтöм. Алöй рöмсянь кö сiйö заводитчис, неуна мöд ног сылöн помыслы колö лоны, öд надеяыс некор эз бырлы, бурсö виччысьöмысь некод эз мудзлы. Колö, сiдзкö, и водзö корсьысьны, медым пыдiсяньджык вермим донъявны сьылансö, а сыкöд öтшöтш и коми мортлысь важ оланногсö.
"Джуджыд керöсын"
Война вылö муса мортöс колльöдiгöн быдöн дзик пыр босьтчылiс виччысьны сiйöс бöр. Виччысисны быд здукö, мый вынсьыныс. И весиг сэк, кор волiс вошöм йылысь юöр. И сэк, кор лунъюгыдсö сьöдöн вевттьылiс похоронка. Пыр виччысисны: а друг… А друг воссяс öдзöс и пырас донаыс, мусаыс. Тайö виччысьöмыс, гашкö, и отсалiс венны тшыглунсö, шогсö, дойсö. Содтiс абутöм выннысö. И мукöддырйиыс збыльысь артмылiс, мый вошйöдлана салдат ловйöн воськовтлiс порог вомöн.
Шог, курыд сьыланкывъяс пöвстын югыд шондi моз мыччысьлiсны и шудаяс. Тадзи чужис "Джуджыд керöсын" сьыланкыв.
Выль Паш, Павел Шеболкин, гижлiс тайö кывъяссö 1928 воын на. А йöзыс со сёрöнджык босьтiсны да лöсьöдiсны сыысь сьыланкыв. Мыйла буретш тайö кывъяс вылас? Мый сэтшöмсö кужис сэки нин кывны Павел Андреевич, кодлöн чужöмсянь тавося август тöлысьö тырас 105 арöс? Та йылысь висьталö Куратовлöн музейöн веськöдлысь Диана Холопова:
— Павел Шеболкин вöлi ыджыд сьöлöма мортöн. Сiйö эз вермы чорзьыны ни сэк, кор пондiсны шуавны, мый сылöн кывбуръясыс воштiсны лирикасö, дзикöдз рудöдiсны. Ни сэк, кор сiйöс мыжтöг мыжалiсны да пуксьöдiсны вит во кежлö. Ни сэк, кор ыстiсны фронт вылö. Павел Андреевич пыр вöлi дась дорйыны ёртъяссö, локны налы отсöг вылö. Сiйö некор эз усьлы ловнас да ышöдiс таö мукöдсö. И кывбуръяссö сiйö гижлiс сэтшöм кывъясöн, кутшöмöн сёрнитлiсны ачыс да йöзыс – шыльöдтöг, баситтöг, вывтiасьтöг. Та понда найö быдöнлы гöгöрвоанаöсь, матыссаöсь, сьыланаöсь.
И талун тайö сьыланкывйыс олö-вылö сьöлöмловъясын. Сiйöс ливкйöдлöны и уджалiгöн, и пызан сайын пукалiгöн. И олöма йöз, и студентъяс. А гижысьяс сiйöс пыртöны асланыс пьесаясö. Кыдзи, шуам Нина Обрезкова "Асъя гöсьтö".
— Збыль вылас кö шуны, ме тайö сьыланкывсö эг пырт, — висьталö Нина Обрезкова. — Сiйö быттьö ачыс виччысьтöг воис менам героиня юрö. Сiдзкö, мыйöнкö вермöма йиджтысьны и менам морöсö. Олöма кöнкö пыдi дзебасын. И со колана кадыс воис да и мыччысис. Эз тай кутшöмкö мöд сьыланкыв, а буретш тайö. Збыль, кузь нэма вöлöма.
"Коми ань"
Кор опера да балет театрын дасьтысьöмаöсь Геннадий Юшковлöн 70 вося юбилей кежлö, Геннадий Анатольевич матыстчылöма режиссёр дорас да корöма, медым рыт вылас быть юргис сылöн "Коми ань" сьыланкывйыс. Онö кö пö сьылöй, ме юбилей вылö ог лок, асьныд метöг пасйöй. Рытсö дасьтысьяслы быть ковмöма кывзысьны да пыртны сценарийö сьыланкывсö.
Нöшта öти казьтылöм. Геннадий Анатольевич радиоын журналисталiгас мунас öти нывбабалысь босьтны интервью. Аньыд сылысь и юалас, мыйсяма нö пö удж эськö тайö тэнад: юасян да гижасян. Журналист пö ме, вочавидзас Геннадий Анатольевич. А нöшта на и гижысь. А аньыд бара ропкö: тайö нö пö удж али мый мужичöйлы. И буретш сiйö кадас радио пыр кутас юргыны "Коми ань" сьыланкыв. Нывбабаыд сэки и шуас: "Вот эськö татшöм сьыланкыв кö гижин, тайö эськö удж вöлi". Геннадий Анатольевич лöня вочавидзас: "А ме öд тайö сьыланкывсö и гижи".
Геннадий Юшковлöн кывъясыс, Яков Перепелицалöн шыладыс – тайö сьыланкывйыс лои гимнöн коми нывбабалы, кодi кыскис аслас пельпом вылын став сьöкыдсö. Сiйöс гижигöн Геннадий Анатольевич тöд вылас кутiс ассьыс мамсö, кодлы вичмис война кадся да сы бöрся став тöждыс.
А нимöдiс тайö сьыланкывсö, дерт жö, Коми АССР-са народнöй артистка Валентина Есева.
"Кöкöй"
2006 воö Коми Республикаса телевизионнöй канал дасьтiс шылада медводдза диск. Сэтчö пырис тшöтш и "Кöкöй" сьыланкыв.
И дисксö дасьтысьяс, и сьылысь Александр Попов чайтiсны, мый тайö сьыланкывйыс йöзкостса. Но драматург Александр Ларевлы комын вит во сайын, радиоын редакторалiгас на, мойвиöма аддзыны сьыланлысь збыль авторсö – Шойнаты сиктса ань Александра Обрезковаöс. Александра Ивановна нэмсö велöдлöма челядьöс. Сылысь писö, Георгийöс, муртса удитöма помавны школасö, босьтöмаöсь фронт вылö. Регыдöн и пуктöма юрсö Ыджыд косьын. Война вылысь эз во гортас и Александра Ивановналöн верöсыс.
И мед пö кыдзкö пальöдны шогсö, нывбаба лöсьöдöма тайö сьыланкыв-бöрдöдчöмсö. Дыр корсьöма лöсялана шыладсö да кывъяссö.
И сьыланкывйыс сэтшöма вöрзьöдiс йöзлысь сьöлöмсö, мый найö кутiсны содтавны кывъяс, пыртны выль образъяс, вежлавны сьыланногсö.
Талун тайö сьыланкывсö пöшти быд районын сьылöны аслысногöн. А Коми Республикаса народнöй артист Михаил Бурдин лöсьöдiс сы подув вылын талунъя обработка.
"Землянкаын", "Катюша" да мукöд
Коми йöз пöвстын паськыда юргöны война кадся да война йылысь роч сьыланкывъяс. Казьтыштлöм нин Павел Шеболкин 1944 воын война вылын комиöдлöма "Сьöд пемыд вой", "Вася-Василёчек" сьыланкывъяс.
А бöръя воясö нöшта вуджöдöмъяс чужисны. Победасянь 60 во тыригкежлö Шойнатыса библиотека отсöгöн петiс ичöтик небöг, кытчö пырисны Сергей Куликовöн комиöдöм война кадся сьыланкывъяс. Лоöмторйыс торйöн тöдчана, мый вуджöдысьыс ачыс Великöй Отечественнöй война вылö ветлысь. И сы вывтi мунiс ставыс, мый йылысь сэнi сьывсьö.
Талунъя гижысьясöс, кодъяс Ыджыд тыш йылысь тöдöны сöмын казьтылöмъясысь да киноысь, тшöтш кыскö ас бердас война кадся сьыланкыв-йыд: и Нина Обрезковаöс, и Олег Уляшевöс, и Анже-лика Елфимоваöс.
Олег Уляшев висьталö:
— Менам вуджöдöмъясöй — тайö миян вöсна лов пуктысьяслы аслыссяма уджйöз вештöм. Оз на тай став сьыланкывйыс артмы. Гашкö, сöмын найö, кодъяс бертыштöны сьöлöмтö, мыйöнкö вермöны вöрзьöдны сы выйöдз, мый окота, мед и комиöн найö юргисны.
Аслас рöдвужлöн да матыссаяслöн паметьлы сиис Олег ассьыс вуджöдöмъяссö да сьылiс гитара улö.
* * *
Гижöдад тай артмö сiдзи, быттьö рытпук вылад сöмын варовитöм и вöлi. Но рытпукысьясыд тöдöны, мый сьывтöгыд эськö нинöм эз артмы.
Сьылiм ставöн. Кодкö юрсьыс, кодкö кабала вылысь. А босьтавнысö отсалiсны "Зильган турун" да "Зарни ань" сьылан котыръяс, "Пелысь мольяс" ансамбльысь нывъяс, Наталья Канова. Гудöкасьны волiс Михаил Оверин.
Уна на сьыланкыв эськö позис ливкйöдлыны, уна творческöй йöз йылысь висьтавны-казьтывны, но сэки эськö рытпукыд сы выйöдз миян нюжалiс да ковмис нин алöй рöма шондi кыптöмсö паныдавны.
Рытсö дасьтысь-нуöдысьяслы — Наталья Макаровалы, Валентина Самариналы, Ольга Авериналы да тайö гижöдсö дасьтысь Анжелика Елфимовалы – тырвыйö донъявны ассьыныс уджсö, дерт, зэв сьöкыд. Но кор ад-дзан, кутшöм шаньмöм чужöмöн, мелi нюмöн, быттьö жальпырысь разöдча-лiсны гортаныс йöзыс, кор кылан сьöлöмсянь аттьöалöм да бурсиöм, а сiдзжö водзö вылö сиöм-вöзйöмъяс, сэки гöгöрвоан, мый абу весьшöрö тайöс ставсö панöма. И юрыд тырöма нин мöвпъясöн, кыдзиджык нуöдны коймöд, нёльöд, витöд рытсö…
Мöд рытыс дась нин. Но кутшöмджык коми сьыланкывъяслы мойвиас сэнi юргыны да кодi восьтас налысь историясö, тöдмалас сöмын миян рытпук вылö волысь.
Сiдзкö, аддзысьлытöдз!
