Неважöн Коми Республикаса минсельхозпродысь юристъяс вермисны Арбитражнöй ёрдын Комиын антимонопольнöй службалысь управлениеöс (УФАС). Суд шуис, мый монополиялы паныд водзсасьысьяс вывтіасисны, кор мыждісны видзму овмöс министерствоöс "Конкуренция дорйöм йылысь" оланпас торкалöмысь.

Тайö лоöмтор йывсьыс паськыда кывсис, öд Россияын ни öти татшöм ведомстволы паныд эз панлыны та мында антимонопольнöй делöсö. Юöрыс воис весиг РФ-са Президент Дмитрий Медведевлöн да премьер-министр Владимир Путинлöн администрацияясöдз.

Збыльсö корсьны ковмис воысь дырджык. А пансис ставыс сысянь, мый кольöм вося февраль 2—16 лунъясö минсельхозöс видлалöм бöрын УФАС мыждіс ведомствоöс видз-му вöдитысьяслы государствосянь отсöг оланпас торкалöмöн вичмöдöмын. Министерстволы пö колö сетны отсöгсö УФАС-кöд сёрнитчöмöн. Та вöсна государствосянь субсидиясö видз-му овмöсъяслы эз вермыны мынтыны быдса тöлысь апрель-майын, буретш тувсов гöра-кöдза кежлö дасьтысян пöсь кадö.

—Монополиялы паныд водзсасьысьяс тшöктісны юасьны налысь дзик быд овмöслы да став сикас отсöг вич-мöдöм кузя. Но тайö жö йöз серам! — гöгöрвоöдö лоöмторсö республикаса видз-му овмöс да сёян-юан кузя министр Сергей Чечёткин. — Ми дзик пыр шыöдчим Коми Республикаса Арбитражнöй ёрдö корöмöн киритны УФАС-лысь тшöктöмъяссö. Öд республикаса да федеральнöй бюджетъясысь отсöгыс быд во воö 12-13 сюрс овмöслы! На лыдын видз-му вöдитан 75 организация, 94 фермер, 23 потребитель котыр, 11 сюрсысь унджык ас овмöс кутысь. Законас абу урчитöма, мый быд субсидия вичмöдöм кузя быть колö сёрнитчыны антимонопольнöй ведомствокöд!

Медводдза 17 делöсö видлалісны Комиысь Арбитражнöй ёрдын, коді шуис, мый минсельхозпрод ставсö вöчö закон серти. УФАС норасис тайö помшуöм вылас Кировын Мöд Арбитражнöй апелляционнöй судö, но и сэні воча эз мунны. Бöръя, коймöд элясьöмсö антимонопольнöй ведомство ыстіс Улыс Новгородö, Волга-Вятка кытшын Федеральнöй арбитражнöй судö. Ёрд кывкöрталіс, мый министерство конкуренция йылысь оланпассö оз торкав.