Геннадий Осиповкöд öти кадö кымын велöдчылiм Коми пединститутын. Ме лои филологöн. Сiйö босьтiс историклысь профессия. А сэсся уна во эгö аддзысьлöй. И со неважöн паныдасим Сыктывкарын. Пыр жö пансис институтын велöдчан вояс йылысь пöсь сёрни. Геннадий Васильевич медся бур кывъясöн казьтылiс ассьыс вöвлöм велöдысьяс Василий Павлович Золотаревöс, Леонид Александрович Ждановöс, Юрий Михайлович Раппопортöс, Элеонора Анатольевна Савельеваöс, кодъяс сетiсны сылы зумыд тöдöмлун.
Сылöн институт помалöмсянь кольöма нин 39 во. Геннадий Васильевич талун велöдö аслас Луздор районысь Гурьёвчиса шöр школаын. 1981 восянь 1992 воöдз вöлöма сэнi директорöн. А велöдöмысь öтдор вöчö ыджыд общественнöй удж, юрнуöдö "Гурьевка" овмöдчöминса сöветöн. Пöсь сьöлöма мортлы абу веськодь, кыдзи олöны сылöн землякъясыс. А талунъя сьöкыд кадö ылi сиктад тöжд-майшасьöмыс тырмö.
– Помнита на, кыдзи коркö эз сöмын Луздор районын, но и республикаын нимавлiс "Гурьевскöй" совхоз, – казьтылö Геннадий Осипов. – Овмöсас видзлiсны уна скöт, быдтылiсны картупель. Совхозлы ёна отсасьлiсны Воркутаса предприятиеяс. Найö стрöитiсны овмöслы кирпичысь куим ыджыд ферма. Но сэсся странаын сiдз шусяна реформаяс нуöдан воясö совхозъяс, на лыдын и "Гурьевскöй", киссисны. Некодлы ковтöмöсь лоисны скöт картаясыд. А йöзыс öд аддзöны идöртöмлунтö да весь оз пукавны. Сiдзжö кутiсны чашйыны тайö фермаяссö. И эндыны кутiс Луздор районын видз-му овмöсыд. Абуöсь нин гырысь мöс стадаяс. Тырöны баддьöн видзьяс да муяс. Талун Луздорын медсясö тöдöны сöмын "Южное" государственнöй öтувъя предприятиеöс, кодöн юрнуöдö водзмöстчысь пöсь сьöлöма морт Владимир Леошеня, кодi коркö велöдчылiс миян школаын. Но öд сiйö оз вермы сетны уджсö дзик быдöнлы. Со и миян сикт-грездъясысь, уджыс абу да, йöзыс мунöны бокö. Унаöн уджалöны вахтаöн Усинскын. Торйöн нин öдйö чинö том войтырыс.
Тыртöммöны коркöя йöза да гажа сиктъяс. Талун Гурьёвчиын коймöд пай керкаас некод оз ов. Кöзяинъясыс либö мöдар югыдö мунiсны, либö кыськö мöдлаысь шуда олöм корсьöны.
Бергалö öнi Геннадий Васильевичлöн юрас мöвп, а мыйла эськö оз позь овмöдны эновтöм керкаясас Войвыв кытш сайысь лунвылöджык мунысь войтырöс. Окотитысьясыд, дерт жö, сюрасны. Да и сиктыслы найö выль оланру сетасны, кутшöмакö ловзьöдасны сiйöс.
Йöзлöн мунöмкöд тшöтш чинö и челядь лыдыс. Кор Геннадий Осипов Коми пединститут помалöм бöрын локтöма Гурьёвчиса шöр школаö, сэнi велöдчöма 440 нывка да зонка. Сылöн директоралiгöн вöлöма нин 320 велöдчысь. Талун школаас медводдзасянь бöръя классöдз 100 морт сöмын. А аскиа лун йылысь мыйкö сьöкыд нин шуны. Сiйö жö орчча Слудка сиктын коркöя шöр школа пыдди лоис 9 класса. Регыд сэнi кутасны велöдны сöмын ичöт классъясöс. А мый вöчан, челядьыс кö абу?
Збыльысь, бырöны танi ичöт грездъясыд. Коркö татчöс Кулига грездын вö-лöма колхозлöн ыджыд бригада. А талун ачыс грездыс быран выйын. Кольöмаöсь сöмын пöрысьяс. Ичöт сикт-грездысь унаöн вуджöны овны Леткаö да Абъячойö, кöнi и туй, и школа, и больнича, и лавка эм. А Гурьёвчиын, Берёзовкаын, Королькиын да Таличаын талун сöмын 700 сайö олысь.
– Нöшта нин öдйö ичöт сикт-грездъяс пондiсны бырны бöръя кадö, кор сэнi кутiсны пöдлавны школа, пошта, лавка, – майшасьö Геннадий Васильевич. – И позьö чайтны, миян власьтъяс тöдöмöн зiльöны öдйöджык бырöдны ичöт сикт-грездъяссö, кодъяс вöлiны важся бур оласноглöн, чужан кывлöн да культуралöн подулöн. Татшöм туйвизьыд öдвакö бур олöмад ваяс. Оз öд позь ставсö сьöмöн артавны.
Талун Гурьёвчиын абу этша и мукöд тöжд-майшасьöмыс. Медводз колö бурмöдны торъя сикт-грезд костын туйяс. Сiдз, 13 во нин мунö сёрни Талича да Корольки грездъяс костын туй асфальтируйтöм йылысь. Но ставыс бара жö пыксьö сьöмö. Кодi ас вылас босьтас тайö уджсö? Некымын во сайын танi ас вынöн босьтчылiсны туйяссö бурмöдны. Но сьöмтöгыд нинöм оз артмы. Сэсся татчöс администрация оз вермы вештысьны и уличаяс биöн югзьöдöмысь. Со и март тöлысь шöрсянь ывла вылын войся бисö ковмис кусöдны. Татчöс олысьяслы сьöкыдджык та-лун и пескöн.
Кöть эськö Гурьёвчиса войтыр оз жö кодкö вылö надеяöн овны. Ас овмöсъясын видзöны мöсъясöс, куканьясöс, порсьясöс, быдтöны уна картупель, град выв пуктас. "Южное" предприятиелöн Зеленечса чипан видзан фабрикакöд сёрнитчöм бöрын öнi татчöс муяс вылын кутiсны кöдзны ид, кодi мунö чипанъяслы кöрым вылö. Тайö сiдзжö бурпырысь кутiс тöдчыны и предприятиелöн, и йöзлöн олöм вылö. Гурьёвчиса культура керкаын уджа-лысьяс сiдзжö унатор вöчöны, мед кыпыдджык вöлi сиктса олысьяслöн ловруыс.
– Ачым ме сиктса морт. Ог вермы карын овны. А талунъя том педагогъясыд пединститут либö университет помалöм бöрын оз зэв окотапырысь локны сиктад. Удждоныс ичöт. И таысь зэв шог. А сiдзсö öд миян сиктын позьö овны, кыскö кö тэнö вöр-ваыс, – медбöрын шуö Геннадий Васильевич. – Менам аслам керка, град йöр. Гожöмнас радейта вотчыны. Сöмын бöръя кадö и ас войтыр кутiсны вöр-васö урöстны. И тайö менö сiдзжö ёна майшöдлö. А колö эськö, мед татчöс олысьяс збыльысь лоисны ас му выланыс идöра кöзяинъясöн. Но танi унатор миян власьтъяс сайын. Медым эськö найö эз син гугнаныс видзöдны сикт вылö. Кöть эськö унатор и асьныс войтырыс вермасны вöчны. Та йылысь ми медводз казьтылам асланым школаын ныв-зонмöс велöдiгöн.
