Тулысыс вочасöн босьтö ассьыс öдсö. Ывлаыс лунысь-лун югдö-мичаммö, енэжыс сöстöммö, вöр-ваыс ловзьö. И та вöсна тшöтш торйöн нин кыпыд лолöн лöсьöдчам пасйыны Тулыслысь да Уджлысь праздниксö. А кусöдчан службаын зільысьяслы тайö лунъясö кык пöв унджык вичмö чолöмалана кывйыс. Апрель 30 лунö налöн, тшöтш и Ольга Анатольевна Тропниковалöн, профессиональнöй праздник.
Таво февраль 25 лунö тырис 30 во, кыдзи Ольга Анатольевна уджалö биысь видзчысян службаын. Кöть эськö школаас на велöдчигöнсійö мöвпалöма лоны врач-педиатрöн да бурдöдны челядьöс. И век жö ньöти оз жалит, мый бöрйис тайö ордымсö. Öд кусöдчысьяс врачьяс моз мездöны пикö воöм йöзöс.
Ас кошта вылö
Ольга Анатольевна чужöма Сосногорск районса Порожск грездын. Налöн семьяын вöлöма дас челядь. Ольга – квайтöд.
Первой помалöма аслас грездас начальнöй школа, а сэсся водзö тöдöмлунсö босьтöма Ухтаса 5 номера школа-интернатын. Казьтышті нин, Ольга ичöтсяньыс кöсйöма лоны бурдöдысьöн. Батьыс, Анатолий Алексеевич, воюйтöма Великöй Отечественнöй война вылын. Öти тышын чорыда ранитчöма. Дыр куйлöма госпитальясын. Гортас воöма II группаа инвалидöн. А Ольга ёна радейтöма батьсö. И став сьöлöмсяньыс кöсйöма отсавны медматысса мортлы.
Гашкö, и збыльысь Ольга Анатольевна лоис врач-педиатрöн. Школаас ёна зільöма-велöдчöма, думсьыс институтö дасьтысьöма. Но, кыдз шулöны, олöмтö овны — абу потшöс вомöн вуджны. Уна челядя семья сэки олöма сьöкыда. Видз-му овмöсын уджалысьяслöн удждоныс, асьныд тöданныд, кутшöм. Содтöд батьыс – войнаса инвалид. Со и лоöма вежны дум-кöсйöмсö.
— Ачым сэки тадз мöвпалі. Мися, колö öдйöджык ас кошта вылö петны. Кöть нин бать-мамöс да чой-вокöс, мися, кокньöда. А бöрынджык, артмас кö, дасьтыся да пыра институтö, — шуö Ольга Анатольевна.
Школа помалöм бöрын сійö пырöма Сыктывкарса 28 номера ГПТУ-ö. Кык во велöдчöма вурны мужичöйяслы вылыс паськöм. 1977 воын диплом босьтöм бöрас том специалистöс мöдöдö-маöсь Ухтаö. Сэні кык во уджалöма первой "Северянка", а сэсся "Берёзка" вурсян ательеясын.
Верöспуыс кусöдчö вöлöм
Гашкö, ачыс Енмыс водзвыв тадз туйдöма. Вурсяніныскöд орччöн вöлöма биысь видзчысян службалöн часьтыс. Коркö-некоркö паныдасьöмаöсь ныла-зонма, мусмöмаöсь öта-мöдлы. Ольгалöн верöспуыс буретш кусöдчысьöн зільöма. Ворсöмаöсь гажа кöлысь. 1980 воын верöсыс, Дмитрий Арсентьевич, вöзйöма гöтырыслы вуджны кусöдчысьяслöн службаö, лоан пö радиотелефонистöн.
И сійö сетöма сöглас. А тöданныд, мыйла? Ольга Анатольевна казьтыліс:
— Порожск грездын сöмын миян керкаын вöлі телефон. Ефим ыджыдджык вокöй уджаліс связистöн. Став олысьыс волывлісны миянö звöнитны. А телефоныс зэв аслыспöлöс. Первой ручкасö колö ёна выныштчöмöн некымынысь бергöдны, вöлисти сэсся республикаса мукöд кар-сиктö верман звöнитны. Ичöтджык чой-вок пиысь тайö менам вöлі медбура артмö. Сэсся телефон пыр джöмдавтöг сёрниті.
Вöлöма и нöшта öти помка. Порожск гöгöрын некымынысь вöрыс öзйылöма. Дерт, медсясö жар гожöмö, кор некымын вежон абу зэрлöма. Тшыныс пö ёна вöлöм повзьöдлö, сук сьöд кымöр моз öшйö енэжас, и шондіыс саялö. А сынöдыс йиджö котшöс дукöн.
Олялöн мöд классын велöдчигас öзйöма школаныс. Тöвнас тайö вöлöма. Муртса тшыныс вевт весьтас пуркнитöма, чукöрмöмаöсь грездса олысьяс, ваöн коялöмаöсь öзйöминсö. А челядь лымнас резöмаöсь. Öтвылысь кусöдöмаöсь бисö.
Ухтаса кусöдчысьяслöн отрядын 16 во Ольга Анатольевна уджалöма диспетчерöн. А сэсся семьянас вуджöмаöсь Сыктывкарö. Верöссö, Дмитрий Арсентьевичöс, вуджöдöмаöсь Комиысь биысь видзчысян управлениеö оперативнöй дежурнöйöн. И гöтырыс челядьыскöд сы бöрся мунöмаöсь юркарö овны.
А сэсся биысь видзчысян служба вежсьöма. Мукöд моз Ольга Тропникова аттестуйтчöма да лоöма старшöй прапорщикöн. И зільöма 2009 воöдз, кор воöма пенсия вылö петан кад. Февраль 12 лунö гижöма МЧС-ысь мунöм йылысь шыöдчöм, а аскинас нин уджалöма Гöрд Затонын 1 номера кусöдчан отрядын ведущöй инженерöн. Ачыс нюмъялö, весиг пö öти лун весь эг ов.
Кор ставыс тшынйыв кайö
Пöгибö воöм морт медводз звöнитö 01 номера телефон пыр. Тадз управлениелöн шöринса диспетчер тöдмалö, кöні ыпнитöма биыс либö кодöскö суöма ускöттьö.
Ольга Анатольевна шуö, мый зэв сьöкыд кывзыны неминучаö веськалöм йöзсö.
— Ыджыдсьыс-ыджыд шог, кор тшынйыв кайö олан керка. Биыд ставсö "ньылыштö". И мый вöчны коньöр йöзыслы? Абу юр сюянін, ни эмбур, ни паськöм... Татшöм войтырыс зэв жальöсь, — висьталö Ольга Тропникова.
Ань буретш вöлöма отпускын, кор öзйöма Ухтаын "Пассаж" стрöйба. Зэв унаöн би-тшынас кувсьöмаöсь. Ускöттьö йывсьыс кылöм бöрын пыр жö котöртöма удж вылас. А думыс вöлöма öти: кыдзи эськö йöзыслы отсавны...
Мукöддырйи овлöны и сэтшöм лоöмторъяс, кор он кöсйы да нюмыд петас... Емдін районса Айкатыла сиктысь мужичöй звöнитö:
— Чипанöй пö кутшöмкö аслыспöлöс...
А буретш курöг грипп йылысь сёрни паськалöма. Ольга Анатольевна звöнитысьсö пыр жö йитöма Россельхознадзор управлениеын уджалысьяскöд. Специалист заводитöма юасьны, кытысь мортыс ньöбöма пöткасö, пистиавлöма-ö, мый пö сійö öні вöчö... Мужичöй жö, кыдзи сяммöма, вочавидзöма.
Сёр рытнас нин Ольга Тропникова ачыс звöнитöма Айкатылаын пемöсъясöс бурдöданінö. А сылы юöртöмаöсь, мый сійö жö лунас ветврачьяс курöгсö босьтöмаöсь видлавны, но пöткаыд кувсьöма...
2007 воын звöнитöма мужичöй. Горзö пö:
— Вöя, вöя!..
А тöлыс вöлöма шоныд. Йöрданö веськалöма? Али мыйкö мöдтор? Ольга Анатольевна пуклöс вывсьыс чеччыштöма:
— Ті кöнöсь?
— Да ме ю сайын? — горзö морт. — Вöя! Ставыс, телефон кöтасис...
И трубкаыс лöньöма. Мый лоис? Вöйис мортыс? Диспетчер йитчöма спасательяскöд. А мый вöчны? Кытчö котöртны? Кöні вöйысьыс? Öти кывйöн кö, ставöн шызьö-маöсь, юрсö жуглöны, кыдзи эськö отсавны мортыслы.
Кык час мысти бара триньöбтöма телефон.
— Ме петі туй вылö, отсöгыд оз нин ков, — дядьöыд лабутнöя сёрнитöма.
А рытнас телевизор пыр мужичöй ошйысьöма-висьталöма, кыдзи буранöн мунöма юркарса Доручастоклы паныда Эжва ю мöдлапöлö. И кутшöмкö шор вуджигöн "кöрт вöлыс" бузгысьöма шорö. Дерт, ваыс ылькнитöма, мортыдлысь коксö кöтöдöма. Пыр жö пö звöниті МЧС-ö... Сэсся телефоныс усьöма ваас. Но отсöг вотöдз на ачыс сяммöма шорсьыс кыскыны бурансö.
И пиыс дорйö пикö воöмаöс
Тропниковъяслöн семьяыс аслыспöлöс. Гозъя пыр öтлаын зільöмаöсь. И буретш сы могысь, медым йöзсö ускöттьö эз су. Кор Дмитрий Арсентьевич веськöдлöма Ухтаса кусöдчан часьтöн, Ольга Анатольевна сэні жö зільöма радиотелефонисткаöн, верöсыс – республикаса управлениеын оперативнöй дежурнöй, гöтырыс – диспетчер, Дмитрий Арсентьевич – Комиын аварийно-спасательнöй службаса начальник, Ольга Анатольевна — республикаын биысь видзчысян служба да йöзöс доръян управлениелöн 1 отрядын ведущöй инженер.
Некымын во нин Виталий ыджыд пиныс зільö Сыктывкарса спасательяслöн отрядын. И йöзыслы колана тайö уджсö бöрйöма ачыс. Ичöтджык Иван пиныс 7 во вöлöма кусöдчысьöн жö. Но Сыктывкарса вöр институт помалöм бöрын вежöма уджсö.
Ольга Анатольевна 30 во нин уджалö биысь видзчысян службаын. Ольга Анатольевналысь зільöмсö вылö донъялöмаöсь, пасйöмаöсь "На охране России", "Отличие в службе", "За 10 лет безупречной службы", "За 15 лет безупречной службы" да уна мукöд медальöн.
