Шуöны тай, бур мортыдлы сьöкыд здукö став мирыс отсöг вылö локтас. Тадзи лои и пöддельнöйсакöд сиктса библиотека сотчöм бöрын. Биыдлы тай веськодь, йöзöс либö небöг ньылыштны. Менам чужан сиктлы тайö пöжарыс вайис ыджыд шог. Аттьö бур йöзлы отсöг вичмöдöмысь.
И со Пöддельнöйын выль библиотека. Сиктса школа дзескöдчыштiс да вичмöдiс медся ыджыд жыръяссö. Буретш тшупöда кадö — библиотекалы 105 во тыригкежлö. Небöгъяссö, джаджъяссö да пызан-улöссö чукöртiсны ставöн öтвылысь: национальнöй политика да культура министерствояс, Кöрткерöс районса культура юкöн, Лебедев нима, юркарысь Маршак нима библиотекаяс да мукöд. И йöзыс гортсьыс вайисны медся радейтана небöгъ-яссö.
Пöддельнöй сиктса библиотекарь Вера Борисовна Королёва локтiс сиктö комын во сайын культпросветучилище помалöм бöрын. Кыдзи ачыс висьталö, сы дырйи библиотекаыс вуджис нёльöдлаö нин. Медводз сiйö меститчöма сиктса культура керкаын, сэсся вуджöдöма-öсь вöвлöм сиктсöветлöн жырйö. Сöмын пö велавны кутiм, баситiм-мавтiм гöгöр, ковмис мунны коймöдлаö: вöвлöм школаö, олöма войтырлöн керка мöд юкöнас. Сэнi вöлöма шоныд, уна öшиня да зэв югыд. Шондiыс пö сiдз и ворсöдчис сöстöм жыръясын. Олöма йöзыд лыддьысьнытö ёна радейтöмаöсь, век пö мыйкö да мыйкö босьтöны. Торйöн нин коми небöгъястö. И со... Пöжар пуктiс пом сиктса библиотекалы. А öд танi вöлi 8 сюрс сайö небöг, ас кежас велöдчöм художник Станислав Сметанинлöн серпасъяс, сиктлы сиöм уна фотоальбом, ас киöн вöчöмторъяс... Ставсö ковмис чукöртны выльысь.
Вера Борисовна шыöдчис отсöгла йöз дорö, и чукöстчисны зэв унаöн. Сiдз, 2009 воын чукöрмис 2.300 сайö небöг, а таво вайöмаöсь 600-öс нин. Уна небöг Кöрткерöсса шöр библиотекаын на. Сэнi найöс пасъяласны, печатяласны да вöлисти ваясны Пöддельнöйö.
Талун сиктса библиотекаö лыддьысьны волöны 204 верстьö да 66 посниулов. Школаыдкöд öти стрöйбаынöсь да, челядьыд тшöкыда пыралöны. Кодкö небöг листалö, кодкö кывбур бöрйö, кодкö серпасасьö. Быдöн аддзö сьöлöм сертиыс удж. Вера Борисовна котыртлö уна сикас конкурс, викторина, аддзысьлöм. Öти кывйöн, олöмыс пуöмöн пуö.
А кодi, мися, медся ёна виччысис библиотека восьтöмсö? Вöлöмкö, Николай Иванович Попов небöг видзанiн воссьöмсö абу сöмын виччысьöма, но и отсалöма чукöртны книгаяс, тэчны джаджъяс, мавтчыны-краситчыны. Вера Королёва став сьöлöмсяньыс аттьöалiс ассьыс медся водзмöстчысь отсасьысьяссö: Николай Ивановичöс, Вера Николаевна Королёваöс, Людмила Михайловна Лобановаöс, Валентина Владимировна Моторинаöс, Светлана да Екатерина Нестероваясöс, Татьяна Николаевна Моторинаöс, Антонина Николаевна Зюзеваöс, Валентина Фёдоровна Исаковаöс. Сиктса велöдысьяс да велöдчысьяс уна жö вын пуктöмаöсь библиотека мичмöдöмö. Сы мында пö бур йöзыс, шыöдчан да öдйö и воöны отсöг вылö, шуö Вера Борисовна. Андрей Афанасьевич Ширяев аслас машинанас некымынысь журкнитлöма Важкуръяö да Кöрткерöсö джадж-небöгъясла. Талун танi мича, гажа да югыд. Весиг гортса быдмöгъяс йöзыс вайöмаöсь. Уна дзоридз козьналöма Наталья Арсентьевна Картушева.
Юалi Вера Борисовналысь, кутшöмджык небöг оз тырмы, а кутшöм, гашкö, и уна нин.
—Чужан му туялöм кузя сы мында чукöрмис, мыйта весиг водзыннас эз вöв. Зэв уна коми небöг авторлöн кырымпасаöсь и быдöн: Александр Ульяновлöн, Иван Белыхлöн, Елена Козловалöн, Нина Куратовалöн, Владимир Тиминлöн, Пётр Столповскийлöн, мукöдлöн. Найöс кöсъя торъя джаджйö тэчны. А со кольöм вежонö вайисны посниуловлы 1970-öд воясö лэдзöм коми книгаяс. Кыдзи аддзи, лолöй топавлiс. Öд тайö менам челядьдырся небöгъяс! Наысь кöсъя вöчны торъя выставка.
А оз тырмы выль, талунъя проза. Öнi öд небöгъясыд донаöсь, да оз на пыр и шедны.
Вера Борисовна зэв лабутнöя да кутшöмкö аслыспöлöс муслунöн висьталiс лыддьысьысьяс йылысь. Вöлöмкö, медся олöмаыс Пантелеймон Иванович Королёв, а медся томыс — Валерия Зюзева. Пантелеймон Ивановичлы сизимдас сайö арöс нин, а век на öчкитöг став шыпассö бура аддзö. А Валерия кöть и нёль арöса на, лыддьысьö зэв нин збоя. Нывка тöдмасьöма нин Толстойлöн "Золотой ключикöн", Михалковлöн "Дядя Стёпаöн", Агния Бартолöн, Корней Чуковскийлöн да мукöдлöн гижöдъясöн. Тöдö уна кывбур.
А овлöны-ö, мися, кутшöмкö тешкодьторъяс, та мында вонад сытöг эз жö коль?
—Коркö кольсьöма библиотекаö понйöс. Нывъёртлöн Райдаыс адöй гусясьысь вöлi. Быд керкаö пыралас да мыйкö шышнитас: котлет, яйтор, чипан. И ставсö сэсся гортас вайö. Весиг песлалöм кöлуйтö кöв вывсьыд нетшкылiс. Пöгибö пöдругаöй волiс, ставныс дивитöны да. А понйыс сiдзсö зэв сюсь да мича, быдтор гöгöрвоö. Коркö пырöма и библиотекаад. Аддзылöма, кöнкö, мый ме кампет-печенньö ньöби, да бöрсянь и уйкнитöма. Сэсся дзебсьöма. Асывнас пыри библиотекаö да муртса гатшöн эг усь – гöгöр кампет кор да печенньö торпыриг. Некымын книга на чирйыштöма и. Кöнкö, нинöм вöчнысö лои да, лыддьысьыштны босьтчылöма.
Чужан сиктö менам тайö ветлöмыс небöг вайöмö жö лöсялiс. Звöнитiсны кодкöлунö Национальнöй библиотекасянь да вöзйисны пöддельнöйсалы козин. Öти нималана аньлöн кулöм бöрын пö ыджыд да зэв озыр библиотека кольöма, гашкö, сюрс сайö книга и матö ставыс – роч да рубежсайса классикъяслöн. Алексей Мовля пиыс (снимок вылын) ставсö нин лыддьöма, да и öнi ёнджыкасö компьютерысь гижöдъяссö корсялö. А мамнас чукöртöм небöгъяссö весь куйлöднысö жаль, кодлыкö öд найö ёна ковмасны, шуам, челядьлы. Со тайö книгаяссö и нуим Пöддельнöйö. Козиныс лоис Коми Республикаса заслуженнöй врач, онкологияса диспансерысь отделениеöн веськöдлысь Евгения Васильевна Мовляöс аслыспöлöс казьтылöмöн. Вера Борисовна пöсь чолöм мöдöдiс Алексей Геннадьевичлы да корис аттьöавны газет пыр.
Ыджыд аттьö библиотекарь висьталiс и Плосков гозъялы. Найö 200 гöгöр небöг мöдöдiсны сиктö. Кыдзи кылiсны, мый "Коми му" газет редакция чукöртö книгаяс, дзик пыр некымын мешöк вайисны. Сэки жö зэв лабутнöй, олöма нин морт вайис менам жырйö мичаа вурыштöм журналъяс: "Войвыв кодзув", "Человек и закон", "Новый Север". Тайö пö пöддельнöйсаяслы. А нимсö юалi да вочавидзис, Иван дядьöн пö и шу. Нимöдны менö оз ков, бур делöтö и сытöг позьö вöчны.
