Бать-мамлöн сьöлöмныс медъёна висьö челядьныс вöсна. Торйöн нин майшасьöны, кор быдтасныс оз кывзысь. Скандинавияысь зонпоснилысь да томуловлысь психология туялысьяс дасьтöмаöсь торъя уджтасъяс, медым бурмöдны налысь олан сямсö. Кольöм пекничаö Норвегияысь специалистъяс Сыктывкарын нуöдісны "Дети и молодёжь группы риска в Баренц-регионе" уджтаслы сиöм семинар.
Кыдзи пасйис "Дети и молодёжь группы риска в Баренц-регионе" уджтасöн веськöдлысь Пол Кристиан, медым вежны кывзысьтöм челядьлысь этшсö, колö пуктыны уна вын. Бать-мамлы öтнаныслы тайö абу вын сертиыс. Та могысь лоö шыöдчывны и психолог, и бурдöдысь, и велöдысь дорö. Дерт, бать-мамлы колö тöждысьны асланыс быдтас вöснаыс, мед кагаыс гöгöрвоис, мый сійöс радейтöны.
Норвегияысь специалистъяс вöзйöны босьтчыны асланыс уджтасысь "Невероятные годы" первой юкöн сертиыс челядькöд уджö.
—Тайö программасö дасьтігöн ми туялім Америкаысь да Россияысь 1.422 кагаöс. Налöн олан сямын уна öткодьлуныс. Сöмын Россияса нывкаяс да зонкаяс асьнысö верстьö мозджык кутöны. Гашкö, тадзи корöны асьныс верстьöясыс да сы вöсна. И Россияын ми вöзйим уджавны челядькöд куим тшупöдын: велöдысьлы школаын, бать-мамлы гортаныс да кыдзи зонпосни кутöны асьнысö тшöтшъяяскöд. И ставсö тайöс вöчны ворсöмöн, — висьталіс Тромсё карса университетысь профессор Вилли -Туре Мёрк.
Виллилöн кывъяс серти, медым быдтыны шань да вежавидзысь кагаöс, колö сыкöд ворсны. Öд буретш ворсігöн кага да бать-мам костын лоö йитöдыс. Колö быдтастö и ошкыны да, бура кö олö, пасйыны козинъясöн. Шуам, юмовторъясöн. А водзö нин сыкöд öтлаын мöвпавны, мый бур, а мый и лёк.
—Овлö, челядь омöль оласногаöсь. Тышкасьöны, весиг бать-мамыс вылö горзöны. Накöд кыдзи? —юалі Виллилысь.
—Ёна ыждалысьяссö ми вöзъям торйöдны бать-мамсьыс, — висьталö профессор. — Татшöмъяссö колö йöртны торъя жырйö либö пуксьöдны улöс вылö. Мед кагаыс öткöн олыштас. Öд горзöмнад сійöс он бурöд. Мöдарö, кагаыд вермас ёнджыка скöрмыны. И вочасöн дзикöдз кисьыд петас.
Абу гуся, мый кор бать-мам дöзмöны челядь вылас, унаöн ньöръялöны либö юрсиöдыс някыртöны. Норвегияысь учёнöяслöн видзöдлас серти, тадзи вöчны оз позь. Колö и асьтö киад кутны. Позьö пö весиг гораа шуны: "Ме радейта ассьым кагаöс. Сійö менам медся бур".
"Дети и молодёжь группы риска в Баренц-регионе" уджтаслöн мöд юкöнын — "ART" программа. Сы вылö подуласьöмöн Норвегияысь учёнöйяс туялöмаöсь скöр да лöгалысь ныв-зонмöс. Весиг ветлöмаöсь дзескыдінын пукалысьяс дорö.
Норвегияын Рогаланда карса колледжысь доцент Кнут Гундерсен пасйис, мый ныв-зонлöн сьöлöмас лöглуныс чужö ичöтдырсяньыс на:
—Эмöсь сэтшöм челядь, кодъяс оз ёртасьны тшöтшъяясыскöд. Медсясö найö полысьöсь. Быдмиганыс сэсся скöрмöны да лоöны висьлöсöсь и школаын лёка велöдчöны. Татшöм челядьыс пыр чайтöны, мый на вылö кодкö лёка видзöдлöма, абу сідзи шуöма. Та вöсна сэсся найö и öтарö зыксьöны. Думайтöны, кута пö кö ыджыдавны, ставныс мöдасны повны.
Кнут Гундерсенлöн висьталöм серти, татшöм челядьсö колö велöдны мöвпавны да кутны асьнысö киын.
—Öтчыд öти зонкакöд пукалім саридз дорын. Пуртöн ракпань восьтігмоз варовитім олöм йылысь. Зонкаыд заводитіс майшасьны. Друг сылöн пуртыс кисьыс мыні да веськаліс орччöн сулалысь пыжö, кöні пукалісны чери кыйысьяс. Зонкаыдлысь юалі: "Мый кутам вöчны?" Сійö вöзйис пышйыны, повзис пинялöмысь да. Та-тшöмъясыс буретш и лöгалысьöсь, и полысьöсь.
Ми сэсся сыкöд öтлаын мöвпалім, мый позьö вöчны. Вöзйи матыстчывны да гöгöрвоöдны, кыдзи пуртыс веськаліс пыжас. Зонкаыд тадзи и вöчис. А вуграсьысьясыд пурттö бöр сетісны, — юксис челядькöд аслас уджаланногöн Кнут Гундерсен.
* * *
Тайö семинар вылас волісны Коми Республика пасьталаысь социальнöй юкöнын зільысьяс, психологъяс, тыр арлыдтöмаяскöд уджалысьяс. На пöвстын вöлі и Изьва районысь семьялы да челядьлы социальнöй отсöг сетан шöринын зільысь Людмила Васильевна Канева.
—Кыдзи ті чайтанныд, позьö-ö кывзысьтöм челядьлысь олан сямсö вежны-бурмöдны ворсöмöн? — юалі сылысь.
—Веськыда кö шуны, ог зэв эскы, — шуис Людмила Васильевна. — Сиктъясын кывзысьтöм челядьыд ёнджыкасö юысь бать-мамлöн. И миянлы лоö медводз верстьöяскöд уджавны, юöм-кодалöмысь öлöдны. Олöмысь лэдзчысьöмаяслöн ныв-пиыскöд миян шöринын уджалö психолог, логопед, дасьтам найöс школа кежлö.
Пасъям, "Невероятные годы" да "ART" уджтасöн вöдитчöны нин Мурманскын, Карелияын да Архангельскын. Комиын сійöн босьтчасны вöдитчыны сентябрь-октябрсянь.
