Юркарса коми культура шöрин "Коми му" газет редакциякöд öтвылысь лöсьöдчö нуöдны "Эзысь войын чужис сьылан" пас улын рытпукъяс, кöні пондасны юргыны важ коми сьыланкывъяс.

Талунъя том йöз пöвстын этшаöн тöдöны сьыланъяс, кодъясöс ливкйöдлісны налöн пöль-пöчыс, бать-мамыс. Мукöдыслы, гашкö, нинöм нин оз висьтавны татшöм нимъяс, кыдзи Александр Осипов, Яков Перепелица, Прометей Чисталёв, Глеб Семяшкин, Вацлав Мастеница, Лидия Чувьюрова. А öд буретш тайö войтырыс нимöдісны коми сьыланкывнымöс.

Ловзьöдны тайö енбиа йöзыслысь бур нимъяссö, тöдмöдны налöн олöмöн да творческöй уджöн томъясöс – "Эзысь войын чужис сьылан" пас улын рытпукъясыслöн медшöр могыс.

Быд аддзысьлöм лоö сиöма торъя сьыланкывлы, кутшöмкö авторлы либö сьылысьлы.

Медым рытпукъясыс артмисны тырвыйö бура, мунісны гажаа, корам "Коми му" газет лыддьысьясöс ыстыны редакцияö сьылысьяс да шылад тэчысьяс йылысь казьтылöмъяс. Миянлы колана быд юöр.

Медводдза рытпукыс лоö апрель 29 лунö 18 чассянь. Сійöс сиам Ыджыд Вермöмсянь 65 во тырöмлы.