Ирина Рочева водзтіджык зільöма детсадйын. А öні öкмыс тöлысь нин уджалö "Пригороднöй" восьса акционер котырын. Быдтö öгурцы да помидор.
Кор ми волім тайö овмöсас, сійö ёртъясыскöд вöлі лöсьöдчö босьтны выль теплицаясысь медводдза урожай.
Буретш апрель 16 лунö тайö овмöсас вöлі восьтöма выль тепличнöй комплекс, öнія кадыслысь став бурторсö тöд вылö босьтöмöн.
"Пригороднöй" ВАК-ын оз повны сьöкыдлунъяссьыд. Сэні кужöны артавны быд шайт, пыр зільöны пыртны уджö став выльсö да весиг кризис вылö видзöдтöг вöчöны водзö тöдчана воськовъяс.
Выль теплицаяссö кыпыда восьтігöн овмöсса уджалысьясöс волісны чолöмавны Коми Республикаса Юралысьöс вежысь Иван Поздеев, видз-му овмöс да сёян-юан кузя министрöс медводдза вежысь Алексей Буткин да министрöс вежысь Эдуард Блох, Сыктывкарса администрацияöн веськöдлысь Роман Зенищев.
Чукöртчысьяс водзын сёрнитігöн "Пригороднöй" ОАО-са генеральнöй директор Геннадий Низовцев пасйис, мый важ ногöн град выв пуктас быдтігöн öнія кадö он вермы босьтны уна барыш. Вывті нин гырысьöсь рöскодъясыс. Со и выль теплицаясö талун сувтöдöма öнія медся выль технологическöй оборудование. Мортлы отсöг вылö воисны компьютеръяс. Тайö отсалö видзтыны уна энергия. Сідз, помидор да öгурцы выль ногöн быдтігöн шоныдыс колö куим пöв этшаджык. Град выв пуктасъяслы веськалö унджык югыдыс. Налöн вужъясыс öні абу нин муынöсь, а веркöсас, да öдйöджык шоналöны.
—Бöръя кадö республикаса аграрнöй юкöнын тайö медся ыджыд инвестиционнöй проект,—тöдчöдіс Геннадий Фёдорович.—Сы вылö предприятие видзис 161,2 миллион шайт. Босьтны кö тöд вылö сійöс, мый войвылын видз-му овмöс вöдитігöн пыр эмöсь гырысь сьöкыдлунъяс, та вылö сьöм вичмöдысьясöс абу кокни аддзыны. Выль тепличнöй комплекссö стрöитöма торъя войтырлöн сьöм да "Россельхозбанклöн" Коми юкöнысь босьтöм кредит отсöгöн. Став уджсö вöчöма дас тöлысьöн.
Талун позьö нин чукöртны öгурцылысь да помидорлысь медводдза урожай. Выль стрöйбасö збыльысь позьö шуны войтыркостсаöн. Сійöс кыпöдісны Белоруссияысь строительяс. Теплицаясö сувтöдöма Голландияысь вайöм оборудование. Ыджыд аттьö таысь колö висьтавны пöдрадчикъяслы, "Агроисовгаз" ООО-са генеральнöй директор Александр Малаховлы, "АТС-200" котырса генеральнöй директор Леонид Тарасовлы, "Теплицмонтаж" ОАО-са генеральнöй директор Николай Костюклы, мукöдлы.
—Ми талун сёрнитам йöв, яй, град выв пуктас фабрикаяс лöсьöдöм йылысь,—пасйис Коми Республикаса Юралысьöс вежысь Иван Поздеев.—Буретш татшöм ногöн тырвыйö могмöдам асьнымöс бур сёян-юанöн. "Пригороднöй" овмöсын стрöитöма медся выль теплицаяс. Эз торк уджсö и кризис. Тайö нин висьталö, мый овмöс бура сулалö кок йылас.
—Неважöн на вöлі пуктöма выль теплицаяслы подувсö, а талун найö дасьöсь нин, — шуис Сыктывкарса мэр Роман Зенищев. — "Пригороднöй" овмöс зумыда восьлалö водзö. И сылысь колö велöдчыны мукöдлы.
—Ми пыр зілям отсавны сьöмöн выль стрöйбаяс кыпöдігöн ас овмöсъяслы,—висьталіс "Россельхозбанклöн" Коми юкöнöн веськöдлысь Михаил Кузьмин.—Та боксянь "Пригороднöй" овмöс лоис миянлы бур ёртöн. Став сьöкыдлун вылö видзöдтöг сійö пыр кутö ассьыс кывсö.
— "Пригороднöй" овмöс 34 во нин вердö республикаса войтырöс град выв пуктасöн, йöлöн, яйöн. И со дас тöлысьöн лои стрöитöма 3 гектар ыджда выль комплекс, коді кутас сетны содтöд уна тонна öгурцы да помидор,—пасйис Коми Республикаысь видз-му овмöс да сёян-юан кузя министрöс первой вежысь Алексей Буткин.
Чукöртчысьяс пöся чолöмалісны сёрнитысьясöс. Тайö луныс лоис "Пригороднöй" ОАО-лы збыльысь ыджыд гажöн. И со нин гöсьтъяс овмöсса директорöс вежысь, главнöй агроном Евгений Григорайлöн корöм серти босьтчисны идравны öгурцылысь медводдза урожай, кодöс сэсся мöдöдасны Сыктывкарса социальнöй учреждениеясö. Зумыд овмöслöн зумыдöсь и воськовъясыс.
