Во вит сайын Емваса национальнöй культураяс шöринын чукöртчисны сизимöн. Ставныс чужлöмаöсь Туръяын, велöдчылöмаöсь öти классын.
Мöвпыштöмаöсь лöсьöдны сьылан котыр. Тадзи артмöма "Аддзысьлöмъяс" ансамбль. Сьылö сэні и Геннадий Габов, "Коми му" газетлöн бур ёрт. Геннадий Степанович и шыöдчöма миян редакцияö, директорöс вежысь Ганна Холопова дорö, ті пö мукöд районö ветлывланныд лыддьысьысьяскöд аддзысьлыны, а Емва вожö эн на волöй.
И со кольöм вежонö "Коми му", "Йöлöга" газетъясын, "Чушканзі", "Би кинь" журналъясын уджалысьяс мöдöдчим Княжпогост районö. Кöсйим йи лöзöдтöдз на удитны, öд ковмас ю сайö вуджавны, лун-мöд кö сёрман, он и веськав.
Карсянь Туръяö мöдöдчысьяс тшöкыда чайтöны, сё квайтымын-сё сизимдас километртö пö мунны час кык-куимыд тырмымöн лоас, да та мында и артыштöны туй вылас. А воасны Емва берегöдз да вöлисти гöгöрвоасны, водзджык пö петны колöма, вуджанінад и джöмдім. Тадзи жö и миянкöд лоис. Автобусным талапöлас кольччис, а ми подöн мöдöдчим, öд мöдар берегас Туръяса машина нин сулаліс, медым сиктöдзыс нуны. Кöть тэрмасим, век жö ёнакодь сёрмим, но йöзыс клубын виччысьöмаöсь миянöс. Елена Плетцер, Галина Макарова, Григорий Хатанзейский, Николай Тюрнин висьталісны коми газет-журнал йылысь, лыддисны кывбуръяс, серамбана висьтъяс. Медся сюсь кывзысьяснас, кыдзи и мукöд сикт-грездын аддзысьлігъясö, дерт жö, вöліны челядь. Найö окотапырысь видзöдалісны газетъяс да журналъяс, петкöдлісны öта-мöдыслы, мыйкö интереснöйтор кö казявлісны. А миянлы нимкодь вöлі паныдасьлыны сиктса артистъяскöд, кодъяс неважöн на петкöдчылісны Визинын "Гажа валяй" праздник вылын да колисны вежöрö Туръя йылысь öзйöдана сьыланкывнас.
Туръясаöс медся ёна майшöдлö туй абутöмыс, кор тулыс-арнас быттьö ді вылö кольлöны. Да и гожöмнас налы абу жö нимкодьджык, вежоннас нёльысь рыт-асывсö сöмын паромыс вуджöдчö да. Быттьö некодлы ковтöм йöз найö. Тайö да сиктсалöн мукöд тöжд-мог йылысь сёрнитім сиктса администра- цияöн веськöдлысь Анатолий Шлоповкöд да Туръяса школаысь завуч Ирина Волковакöд. Сёрнисö лыддьöй матысса номеръясысь.
Сёрман кö, кадтö суöдны сьöкыд. Урчитöм кад кежлö эг вермöй воны и Сьöськаö. Но миянöс мездісны "Аддзысьлöмъяс" котырысь аньяс да мужичöйяс, сьылöм-йöктöмнас гажöдісны сиктса клубö чукöртчöм йöзöс. Сöвет кадö на кок йылас зумыда сулалысь овмöсын кыпöдлöмаöсь кирпичысь кер-каяс. Благоустроитöм патераясын олöны и мукöдлаысь локтöм йöз. Мария Алексеевна Габовалы апрель 12 лунö тырис 85 арöс, нэмсö олöма Габово сиктын. Пес и ва пö вайны колö да öні ог нин вермы сэні овны, нылöй ньöбис татысь патера да нёльöд во нин Сьöськаын тöвъя, гожöмсö сöмын Габовоын колляла. Öти нылыс сылöн олö Емваын, мöдыс – Мурманскын, а пиыс Чернобыльö ветлöм бöрын кувсьылöма нин. Ёртыскöд, Галина Васильевна Лятиевакöд, Мария Алексеевна и воліс газет-журналын уджалысьяскöд аддзысьлыны.
Клубса жырйын вöлі чукöртчöмаöсь вель унаöн: и верстьö, и том. Пыр жö кодкö шуис, челядь пö коминас оз гöгöрвоны да рочöн сёрнитöй. Падмыштлім весиг неуна. Коми газет-журналын зільысьяс локтім лыддьысьысьяс дорö да рочасьны кутам? Зэв öд мисьтöм артмас. Тöдам öд, Сьöськаысь ныв-зон тöдöны коми кывсö, быд во том гижысьяслöн Гожся университетö волывлöны да. Люда Пономарёва, Саша Дегтярёва, Настя Колоколова, Валя Суворова бур боксянь нин петкöдлісны асьнысö Гожся университетын да нимöдісны чужан сиктсö, ассьыныс школасö. Дерт, комиöн и сёрнитім. А бöрас сьöськасаяс уна коми небöг да коми сьыланкывъяса диск на ньöбисны.
"Аддзысьлöмъяс" котырса Сьöськаысь вöрзьöдчисны миянысь водзджык да виччысисны нин Емваын национальнöй культураяслöн шöринын, медым петкöдлыны неыджыд концерт. Сьыланкывъяс костас Нина Проворова сэтшöм лöсьыда висьтавліс и ас йывсьыс, и ансамбль йывсьыс, мый регыдöн нюмсера, кыпыд лола, олöмыслы радлысь аньяс да мужичöйяс лоисны миянлы зэв матысса да бура тöдсаясöн нин. Нина Ивановна зэв прöстöй кывъясöн да сьöлöмсяньыс висьтасьöмнас öти сьыланкывсянь вуджöдлывліс мöдö, йитіс найöс концертасян программаö. Уджавны пö заводитлі Мещураын, кык сюрс морт вöлі сэки сэні олö. Верöсöй роч, кык челядь рочасьöны жö, кöть и комиясöн асьнысö лыддьöны, муртса пö и ачым эг рочмы. Мещураад пö самолётöн лэбавлывлім, да öні миян артистъяс тіянлы "Тöдса пилот" сьыласны. Öти сьылан öтияс босьталöны, мöдöс – мöдъяс, кöнкö и йöктыштасны, мича серöн джодж кузя ветлöдлыштасны. Быдöнлы тöдса коми сьыланкывъяс ливкйöдлöны да ми тшöтш на бöрся вöтчыштам, сьылыштам.
– Геннадий Степанович кыксё сьыланкыв тöдö да кытчö оз мун, быдлаын сьылö, весиг пывсянас, – водзö висьталö Нина Ивановна, и ми бара на "Пывсянын" сьылігöн кокöн зымнитыштлам, киöн клопнитыштлам. – Ми асланым ансамбльöн ас районса став сикт-грездас нин волім, Сыктывдін районса Выльгортö "Завалинка" гаж вылö кыкысь ветлім. Газетаныд гижанныд да миянöс и республика пасьталаын бура кутасны тöдны. Ансамбльсö котыр-тігöн дыр думайтім, кыдзи кутам шусьыны, да сэсся "Аддзысьлöмъяс" ним и бöрйим. Сьöкыд эськö, но велалім да, быттьö сідзи и колö.
Кодсюрö Емваын чайтöмаöсь, мый журналистъяскöд тшöтш локтасны и районса веськöдлысьяс да висьтасясны асланыс удж йылысь. Юралысьясыд йöз водзас кывкутöны "Коми войтыр" öтмунöмлöн конференцияяс дырйи, миян жö могыс мöд вöлі – ышöдны Емва вожсаöс коми газет-журнал судзöдны да лыддьыны. Лача кутам, могнымöс тырвыйö збыльмöдім, и миян лыддьысьысьыс содас. Карö тай та мында бур да шань йöзкöд аддзысьлöм бöрын зэв кокни сьöлöмöн бöр бергöдчим-а. Коркö öд бара на аддзысьлам.
