Айму вöсна Ыджыд тышын Вермöмсянь 65 во тыригкежлö дасьтöм "Поминание" небöгöн тöдмöдасны апрель 17 лунö Эжваса "Светоч" библиотекаын. Лöсьöдіс книгасö Сыктывдін районса Шыладор грездын чужлöм морт Николай Доронин.

Николай Александрович абу öти во туялöма Шыладорысь война вылö мунöм войтырлысь олöмсö, корсьöма "Паметь небöгысь" налысь ним-овсö. Витсё сайö морт овлöма война водзас грездас, 168-öн мунöмаöсь фронт вылö, 85-ыс усьöмаöсь. Коді бöр локтöма, кызвыныс доймалöм, висьысь морт. Ставсö найöс пасйöма "Поминание" небöгын.

Николай Александрович-лöн кывъяс серти, босьтчан кö пö корсьысян уджö, дугöдчыны сыысь он нин вермы. Öд сы мындатор тöдмалан. Кыдзи, шуам, тöдмалöма, мый Шыладорысь войнаса герой Михаил Шуктомов, код йылысь Серафим Попов гижöма "Сталинградскöй балладаас" – сылöн рöдвуж, кыкнанныс Ерö рöдысь петлöмаöсь.

Аслас небöгын Николай Доронин вайöдö Шыладорса школаын велöдысьяслысь да велöдчысьяслысь 1930-öд воясся снимок. Челядьыс сюся видзöдöны миян вылö ылö нин кольöм кадсяньыс. На пиысь некод на оз тöд, кутшöм олöм найöс виччысьö, оз куж весиг мöвпыштны, мый регыд лоас война, и унаöн ныв-зон пöвстысь усясны тышъясын, миян вöсна сетасны ассьыныс олöмсö. И миянлы пö быть колö тöдны найöс ставнысö – та могысь и босьтчöма Николай Александрович корсьысян уджас. Уджыс абу на эштöма, сійö надейтчö, мый книгасö лыддьысьяслöн отсöгöн стöчмöдас да содтас на сійöс.

Победа лун водзын Шыладорын восьтасны усьöмаясöс казьтылан обелиск. Вöчны сійöс отсалöмаöсь Сыктывкарса коймöд номера школа-интернатысь войтыр.