Часіын киссьысь лыа моз исковтö кадыс. Исковтö да он тай сувтöд сійöс... И со ветымын вося юбилей нин пасъяс апрель 16 лунö финн-йöгра журналистъяслöн Россияса ассоциацияысь президент, "Марий Эл" газетысь главнöй редактор Александр Абдулов.
Школаас на Александр мöвпалöма водзö велöдчыны сöмын Марий Элын Н.К.Крупская нима пединститутса филология факультетын, öд Башкирияысь уна том морт сэки босьтіс сэні тöдöмлунсö. Но Марийскöй политехническöй институтын велöдчысь ёртъясыс ыззьöдісны зонмöс сдайтны экзаменъяс сэтчöс вöр овмöс факультетö. Но, кыдз шуласны, эз эськö шудыс ло, да шогыс отсаліс: математика сконйыштіс сійöс да ковмис Александрлы бöр бергöдчыны чужанінас – Башкирскöй АССР-са Мишкинскöй районса Старое Арзаматово грездö, кöні колис сылöн челядьдырыс да кöні 1977 воын помаліс шöр школа. Тадзи быттьö ачыс олöмыс бöрйис сы пыдди: код на тöдас, кутшöм вöр инженерöн эськö лоис Александр Абдулов, а журналистикаын сійö збыльысь шедöдіс гырысь вермöмъяс.
Но вай став йывсьыс сьöрсьöн-бöрсьöн.
Во мысти Александр Абдулов выльысь веськöдчö вузö, та пöрйö педагогическöйö, да Марийскöй пединститутын вит во студенталöм бöрын босьтö филологлысь диплом. Армияöдз во уджалö Йошкар-Оласа школа-интернатын, а воöн-джынйöн служитöм бöрын бöр воö Марий Элса юркарö. Мари да роч кывъяс бура тöдысь мортöс "Марий коммуна" газетса главнöй редактор Михаил Григорьевич Байков босьтö редакцияас вуджöдчысьöн, а куим во мысти Александр Абдуловöс корöны комсомоллöн Марийскöй обкомö лекторъяслöн котырö. Тайö вöлі 1988 воö – гырысь вежсьöмъяслöн кадö, кор йöзыслöн чужис уна буртор вылö лача, окота лоис вöчны мыйкö ыджыдöс, тöдчанаöс.
Сэки жö быд выльсö бура кылысь да гöгöрвоысь том мариечьяс öтувтчисны комсомол обкомбердса "У вий" котырö, босьтчисны лэдзны "Саман" литературнöй альманах. Том поэтъяс, артистъяс ветлöдлісны Марий Элса каръясті да сиктъясті, и, кыдз шуласны, садьмöдісны йöзöс дудан кадлöн унзільысь. И тайö уджыс вöлöма йöзыслы зэв коланаöн, öд найö виччысисны выль мöвпъяс да кöсйöмъяс, а "У вийсалöн" татшöмыс вöлі уна.
Котырын водзмöстчысьяс лыдын вöлі и Александр Абдулов. А кор республикаын лöсьöдісны том йöзлы мари кыв вылын быд тöлысьö петысь газет, буретш сылы и вöзйисны юрнуöдны сійöн. 1991 вося июльсянь петысь "Кугарня" газет эм и öні, 1991–1994 воясö сыöн веськöдліс Александр Абдулов. Но сылöн олöмын нöшта на вöліны гырысь вежсьöмъяс: во уджаліс Марий Элса телевидениеын, вöлі республикаса Госсекретарлöн службаын сöветникöн, 1999 воö сійöс индöны "Марий Эл" газетса главнöй редакторöс вежысьöн, а во мысти Александр Саликович юрнуöдö нин республикаса газетöн.
Öні редакцияын зільö нелямын вит морт. Тайö ассьыныс уджсö бура тöдысь йöз, кодъяс радейтöны газетсö да лыддьысьысьясöс. Матö джынйыс сетісны газетыслы коді дас вит–кызь, а коді и унджык во нин. Найö – збыльысь зэв кывкутана профессионалъяс, быдторйын век дасьöсь отсавны томъяслы. А ылькйöн пуысь вын-эбöса том войтыр зільöны велöдчыны налысь.
Дерт, уджалысьыд век вежсьö, локтöны выльяс. Оз на быдöн вермы кокниа пырöдчыны редакциялöн уджö – тырмылö и сьöкыдлуныс, овлöны и сорсьöмъяс. Но Александр Саликович ковтöг некодöс оз кулит, век зільö гöгöрвоны. И сöмын воöн либö воöн-джынйöн мысти кö мортыс сідзи и оз аддзы асьсö журналистикаын, сэки нин редактор янсöдчö сыкöд. Но колö пасйыны, татшöмыс овлö зэв гежöда.
Миян олöмын, тшöтш и журналистикаын, газет-журнал лэдзöмын, öні ыджыдалö рынок. Главнöй редакторлы быть колö лоны и овмöс кутысьöн, корсюрö и тöлка коммерсантöн. Некымын во сайын "Марий Эл" газет бердын кутіс петны "Суртпече" ("Подворье") приложение. 5 сюрс экземплярöн петысь 16 лист бока йöзöданторсö артыштöма сиктса войтырлы, сад вöдитысьяслы, му вылын ноксьысьяслы – налы, кодъяслы муыс и лоö вердысьнас. Тайö петассьыс газетлы воö оз омöль водзöс.
"Марий Эл" газет лэдзö и книгаяс, брошюраяс, буклетъяс, альманахъяс. Неважöн на вöлі йöзöдöма художникъяс Иван Ямбердовлöн да Измаил Ефимовлöн, театрса фотохудожник Валерий Тумбаевлöн творчестволы сиöм альбомъяс, горномарийскöй поэт Николай Егоровлöн кывбуръяса небöг, Арсак Александровлысь "Роза" повесьт, Вячеслав Абукаевлысь повесьтъяс да висьтъяс, Мария Илибаевалысь серамбана гижöдъяс, марийскöй просветитель Павел Глезденёв йылысь Ксенофонт Сануковлысь небöг, Морки районлы сиöм мича снимокъяса фотоальбом, челядьлы книгаяс.
Газет оз вунöд и Марий Эл Республикаысь бокын олысь лыддьысьысьяссö, тöлысьнас öтчыд кык лист бокын йöзöдö на йылысь гижöдъяс. Торъя нин сьöлöмсянь петысь гижöдъяс артмöны Башкирияын олысь сё сюрсысь унджык мариеч йылысь.
Ёнмöны и став рöдвуж войтыркöд йитöдъяс. 2004 воö вöлі лöсьöдöма финн-йöгра журналистъяслысь Россияса ассоциация, кытчö öтувтчисны квайтымынысь унджык газет-журналын уджалысьяс. Асланыс президентöн найö бöрйисны "Марий Эл" газетысь главнöй редактор Александр Абдуловöс. Ассоциацияыс нёльысь нин котыртліс финн-йöгра прессалысь фестиваль, кыкысь чукöртчылісны Йошкар-Олаын, öтчыдысьöн – Сыктывкарын да Ижкарын. Витöд фестивальыс гожöмнас лоас Саранскын. Аддзысьліганыс журналистъяс юксьöны сямнас, вöчöны конкурсъяслы кывкöртöдъяс, чолöмалöны вермысьясöс. Кыкысь нин семинаръяс вылö чукöртчылісны финн-йöгра редакцияясысь фотокорреспондентъяс, тавося июньын Саранскын нуöдасны коймöд семинар.
Журналистъяс тшöкыда ветлывлöны ёрта-ёрт дорас да тöдмасьöны рöдвуж войтырлöн республикаясöн, редакцияяслöн уджöн. "Марий Элысь" Светлана Пехметова вöлі Сыктывкарын, Валентина Тойшева – Ижкарын, Денис Речкин – Саранскын, Светлана Белкова – Ханты-Мансийскын. Уна финн-йöгра газетысь журналист воліс и Йошкар-Олаö да уджаліс "Марий Эл" газет редакцияын.
Финн-йöгра том войтырлöн ассоциациялы таво тырас кызь во, а МАФУН-лöн медводдза веськöдлысьнас бара жö вöлі Александр Абдулов.
* * *
Александр Саликовичлы апрель 16 лунö тырö 50 арöс. Быттьö и абу ыджыд арлыд, но сы мында нин сійö удитöма вöчны. Окота сины тайö енбиа мортыслы, бур веськöдлысьлы, тöлка овмöс кутысьлы, Марий Эл Республикаса заслуженнöй журналистлы, история наукаса кандидатлы крепыд дзоньвидзалун да быдторйын выль вермöмъяс.
А вермöмыс, эскам, уна на лоас.
.
