Апрель 7 лунö Коми Республикаса вужвойтырлöн шылада-драмаа театрын медводдзаысь на петкöдлісны "Ручильöй да Кöчильöй" опера-мойд. Либреттосö гижöма Гений Горчаков, а шыладсö тэчöма тайö театрас музыка юкöнöн веськöдлысь, композитор Александр Горчаков. Геройяслысь партияяссö сьылöны "Парма" ансамбльысь артистъяс. Мойдас висьтавсьö коми пармаын олысь пемöсъяс йылысь. Тамыш синма Кöчиль кыпöдöма аслыс шоныд керка. Гаж вылас корис Урöс, Ошкöс, Йöраöс, Сьöдбöжöс, Туланöс, Вöрканьöс, Кöинöс, Барсукöс. Сöмын наян Ручöс эз. Но и сылы кывсьöма тайö юöрыс да пашкыр бöжа Ручиль кортöг локтіс гажöдчыны Кöчиль ордö.

Мудер ручыдлöн шоныд да пельк керка вылад сэсся петіс вежыс, и мöвпыштіс сійö мырддьыны Кöчлысь оланінсö. Та вылö ышöдіс и Кöинöс. Но сійö эз кöсйысь, ме пö Кöчлöн бур ёрт. Век жö наян ручыд вöтліс тамыш синмöс шоныд паччöрсьыс да тöв шöрын кöдзыд пармаö тодмышкаліс. Бур, Кöчильлöн ёртъясыс уськöдчисны сылы отсöг вылö, öтвылысь вöтлісны Ручöс шоныд керкаысь.

Кöчильöс ворсіс Анна Попова. Тайö енбиа артисткаыс уналы нин тöдса. Сійö и спектакльясын бура петкöдчö, и зэв мичаа сьылö.

—Анна, кор тэныд вöзйисны сьывны операын, майшасин? — юалі сылысь.

—Абу ёна сьöкыд партияыс да, эг повзьы. Искусствояс гимназияын да и колледжын велöдчи сьывны. Йöзкостса вокал юкöн помалі, — вочавидзис Анна.

А Ручильлысь партиясö сьыліс Коми Республикаса заслуженнöй артистка, Валентина Есева нима премияа лауреат Валентина Соколова. Ичöтсяньыс сійö концертасьлöма, ветлывлöма районса смотръяс вылö. Медводдза сьыланкывйыс, кодöн петкöдчöма смотр вылас, — "Кöч йöктö". А öні пö Ручильлысь партия сьылі.

Валентина Соколоваöс выльторъясыд некор оз падмöдны. "Парма" ансамбльын уджыс ёна и муса. Велöдчöмаöсь и коми йöзкостса инструментъясöн ворсны. А öні со операын вöзйöмаöсь сьывны. Бара выльтор. И бара сьöлöм сертиыс.

"Ручильöй да Кöчильöй" — зэв мича, яръюгыд опера-мойд. Гений Дмитриевич гижöма либреттосö сöстöм коми кывйöн. Да и шыладыс зэв мича. Опера-мойдын артистъяс и сьылöны, и йöктöны, и коми йöзкостса инструментъясöн ворсöны.

—Дерт, эз вöв кокни гижны коми кыв вылын челядьлы операсö, —висьталö Александр Горчаков. —Ковмис тöд вылын кутны артистъяслысь сьылан сямсö. Öд "Парма" ансамбльын оператö оз сьывны. Но век жö налöн ставыс артмис зэв бура.