Петруньын котыртлöм "Тэрыб кöр" гаж вылö волісны Инта, Воркута да Усинск районъясса кöр видзысьяс. Ордйысьöмö пырöдчисны матö 40 дадюла.
—Гажыс артмис зэв кыпыд! — висьталö видз-му овмöс да сёян-юан кузя министрöс вежысь Эдуард Блох, коді тшöтш ветліс Петруньö. — Праздниксö котыртысьяс вöчöмаöсь ставсö, медым быдöнлы вöлі лöсьыд. Сиктö волісны веськöдлысьяс, общественнöй котыръясын водзмöстчысьяс, маті сикт-грездысь войтыр, весиг кöр видзысьяслöн Москваын да Питерын олысь рöдвужыс. Гöсьтъяс эз сöмын нимкодясьны Комиын кöр видзысьяслöн винёвлунöн да сюсьлунöн, но и тöдмасисны налöн оласногöн, культураöн, пыралісны чомъясö да чöсмасисны национальнöй сёян-юанöн. Татшöм гажъясыс öтувтöны йöзсö, сетöны позянлун юксьыны öта-мöдкöд сям-кужöмлунöн.
А "Тэрыб кöр" гаж водзвылын минсельхозпродысь специалистъяс нуöдісны Интаын сöвещание, донъялісны кöр видзан юкöнын серпассö да урчитісны сійöс сöвмöдан туйвизьяс.
Талун республикаса вит предприятиеын — "Оленевод" ПСК-ын, "Северный" ООО-ын, "Петруньское" да "Абезь" ГУП-ясын, "Интаса чипан видзан фабрика" ВАК-ын – 235 уджалысь дöзьöритöны 64 сюрс кöр. Овмöсъясын джын пемöсыс – эньяс, та вöсна эм позянлун содтыны яй вöчöмсö. 2009 воын кöр видзысьяс вöчисны 9.824 центнер яй (2008-öдын – 8.159 ц), январын 100 пемöсысь – 16,9 центнер. Та мындаыс эз вöв бöръя квайт восö. Мöйму медся тöдчана вермöмнас лоис "Ыджыд Инта" ООО-лысь стада видзöмыс. Сійöс вуджöдісны Интаса чипан видзан фабрикалы.
Быд во Комиын начкöны шöркодя 13 сюрс кöр. 2009 воын начкисны 14 сюрс гöгöр пемöс, ставнас 802,8 тонна. Сöмын тай овмöсъясын сьöмöн век на дзескыд. Кольöм во налöн чöжöсыс воис 10,7 прöчент, и сöмын государствосянь отсöг весьтö лыдпасыс содіс 42,3 прöчентöдз. Килограмм яйлöн асдоныс содіс 22% да лоис 72,19 шайт. Вузалан доныс содіс 20% — 79,94 шайтöдз. Предприятиеясын шöркодь нажöткаыс 8 сюрс шайт гöгöр, и тайö сьöмыс оз ышöд кöр видзысьясöс уджавны бурджыка да кывкутöмöнджык.
Сьöм тырмытöм вöсна жö абу позянлуныс лöсьöдны яй переработайтанінъяс да öнія кадся начкыся-нінъяс. А татöг овмöсъяс оз вермыны босьтны кöр яй вылö сертификатъяс да вузавны сійöс, кöть эськö ньöбны окотитысьыс зэв уна. Сöмын "Оленевод" ПСК-ын мöйму эштöдісны переработайтан цех выльмöдан удж да ньöбисны оборудование, мый отсöгöн позяс вöчны унджык сикас вöлöга.
Кöр видзан предприятиеяс сöвмöдöм могысь öні колö лöсьöдны Евросоюзöн урчитöм нормаяс серти бур начкысян комплексъяс. А медым овмöсъяс вермисны нажöвитчыны, колö, медым сэні вöчисны став уджсö öтилаын: пемöсъясöс быдтöмсянь начкöмöдз да переработайтöм яй иналöмöдз.
Но медъёна майшöдлö кöр видзысьясöс угоддьöяс вылö колана кабалаяс чукöртöмыс. Му юкöнъяс кöртымалöм кузя сёр-нитчöмъяссö абу вынсьöдöма да, кöр йирсьöдан угоддьöяссö тшöкыда сетöны промышленнöй стрöйбаяс, трубопроводъяс да туйяс стрöитöм улö. Мöд юр висьöм – ку переработайтöм. 20-25 сюрс кöр ку быд во ковмö шыбитны-гуавны. Предприятие-ясын кö вöлі оборудование, сыысь позис вöчны дона кучик да вурны мичмöдчанторъяс: сумка, пась, кöшель, чуня кепысь. А та весьтö эськö и овмöсъяс зумыдджыка сувтісны кок йыланыс да озырмисны.