Меным ёна кажитчӧны ас киӧн вӧчӧм уджъяс, кӧні воссьӧ мастерлӧн зарни киподтуйыс, сьӧлӧм шоныдыс да муслуныс. Чайтсьӧ, мортлӧн фантазиялы помыс абу. Да и шензян, кыдзи сылӧн татшӧм мичаасӧ артмӧ?!

Таисия Семяшкиналысь уджъяссӧ аддзи ӧтуввезйысь. Кыӧм чачаясыс вӧліны сэтшӧм мусаӧсь, мый окота лои тӧдмасьны мастерыскӧд.

– Таисия, чолӧм! Висьталышт ас йывсьыд.

– Видза олан! Меным кажитчӧ, кор шуӧны Таяӧн. Чужи Кӧрткерӧс районса Пӧддельнӧй сиктын. Коймӧд во уджала орчча Вомын сиктса культура керкаын художествоа веськӧдлысьӧн.

– Тэнад кыӧмторъясыд воисны сьӧлӧм вылӧ аслыспӧлӧслуннас да шензьӧдана мичнас. Корсянь пырӧдчан творческӧй уджас?

– Дзолясянь радейтлі вӧчасьны киӧн. Ичӧт классъясын велӧдчигӧн медводдза велӧдысьным Вера Михайловна да сылӧн верӧсыс миянкӧд ёна ноксисны. Кипом уджас унаторйӧ велӧдісны: папье-машеысь вӧчлім акань театр, сюмӧдысь дозмукъяс да чачаяс, идзасысь серпасъяс. Налы зэв ыджыд аттьӧ! Сэксянь и радейта мыйкӧ ас киӧн вӧчны.

А кор нин вуджи витӧд классӧ, ветлӧдлі крючокӧн кысян кружокӧ. Велӧдысьнас вӧлі Тамара Павловна. Сылы тшӧтш окота шуны ыджыд аттьӧ! Сійӧ кадсяньыс крючокӧн кысьыны эг на дугдывлы!

Кыся быдсяма мастер-класс серти, эмӧсь менам авторскӧй чачаяс. А овлӧ сідз, мый серпас либӧ фотография серти кыа.

– Дыр-ӧ кыан ӧти чачасӧ?

– Овлӧ, нёль часӧн артмӧ. А вермас лоны, и дас сизим час та могысь колӧ, кык лун, быдса вежон. Ыджыд кӧ кыанторйыс – кык вежонӧдз нокся.

Уна чача корӧны кыны козин вылӧ. Выль во да Март 8 лун кежлӧ унджык заказыс. Выльвоасьӧм водзын ас сиктын чукӧртчылам сиктса "Киподтуя аньяс" клубӧ ветлысьяскӧд да кыам волысь символсӧ. Таво артмисны зэв мусаник тигръяс.

А сідзсӧ кыся ас кӧсйӧм серти. Чачаясӧ босьтчи вит во сайын на. Сыӧдз кыи ковта, кардиган, жилет. Пыр чайтлі, мый чачатӧ кыны зэв сьӧкыд, вывті уна посни детальыс да. Кыан, сэсся вурлыны колӧ… А кор кыи медводдза чачасӧ, сэтшӧма кажитчис. Пыр на ачым шензя, кыдзи прӧстӧй шӧртысь артмӧ сэтшӧм мусаник да мича чача!

– Быд лун кысян?

– Кыся прӧст кадӧ! Пӧшти быд лун. Овлӧ, вит час асылын чечча да удж вылӧ мунтӧдз кысьышта, а корсюрӧ и удж вылысь локтӧм бӧрын. А шойччан лунъясӧ – асывсяньыс рытӧдзыс.

– А кутшӧмджык сунис да ем колӧ кысьынысӧ?

– Ӧні вузасянінад сунис-шӧртыд, ок, уна сикас. На дорӧ колӧ крука ем. Дерт, кызтасӧ бӧръян кыантор серти. Овлӧ, полухлопок сунисӧн кыся. Сы дорӧ колӧ 2,5 миллиметра крука ем. А ӧні кыа плюшысь, да сыӧн уджала 3,5 мм кызта крука емӧн.

– Тшӧкыда-ӧ бӧр резьӧдлан кыӧмтортӧ?

– Овлӧ жӧ. Но гежӧдика. И сӧмын сэк, кор асшӧра мӧвпышта чачасӧ, да окота мыйкӧ вежыштны-мичмӧдыштны. А сідзсӧ водзвыв серпасала, мый кӧсъя кыны, да сэсся сы серти и уджала.

– Тая, а кутшӧм сьӧлӧм-кылӧмӧн кысян? Гашкӧ, уджӧ кутчысьтӧдз мыйкӧ водзвыв бергӧдан-вӧчан?

– Меным водзвыв колӧ сӧмын пусьыштны да пелькӧдчыштны, медым эз ковмы сэсся кысигӧн манитчыны.

Ме ӧд ловъя, та понда сьӧлӧмкылӧмыд овлӧ уна сикас. Кор лов вылад кыпыд да бур – удит сӧмын крука емтӧ кутыштны, ачыс кыас кыдз колӧ. Сьӧкыд кӧ – кысьӧмӧн жӧ лӧньӧда сьӧлӧмӧс. Овлӧны и сэтшӧм здукъяс, кор нинӧм оз артмы, кисьыд ставыс усьӧ. Сэки бурджык мыйӧкӧ мӧдторйӧ босьтчывны, шойччыштны.

– Тая, висьтав, кысьӧмыс тэныд мый сетӧ?

– Кысьӧмыс меным "больше, чем хобби". Сійӧ менам муслун, менам сынӧд, ме сытӧг овны ог вермы. Артмылас кӧ кост, чуньясӧй асьныс нин быттьӧ заводитӧны вӧрны. Сідзкӧ, ӧдйӧджык колӧ босьтчыны кысьыны.

* * *

Со татшӧм енбиа анькӧд ме тӧдмаси. Таисия Владимировна Семяшкиналӧн чачаясыс кыпӧдӧны ловтӧ, найӧс окота кутыштны киын, видзӧдавны гӧгӧрбок да помтӧг нимкодясьны.

И кыдзи татшӧм чачаыс сылӧн артмӧ?

Надежда Пунегова.

Снимокъясыс Таисия Семяшкиналӧн гортса архивысь.