Со тай öшинь сайын турöбалö, кöдзыд, быдлатi тыртö лымйöн. Татшöм тöвся январ 19-öд лунö Великопольеын чужис шань да вежавидзысь ань - Галина Павлиновна Попова (нывдырйи Шахова). Буретш сы йылысь талун и висьтышта. Быдмис шуда нылöн, гажаа да öтув олiс Зоя чойыскöд, отсасис мамыслы. Ичöт классъясас велöдчис Великопольеын, водзö Пожöгын. Мöвпыштiс лоны воспитательöн, школа помалöм бöрын мунiс Сыктывкарса педучилищеö. Том специалист бергöдчис муса чужанiнас. Велöдiс да быдтiс эз öти кöлена посни челядьöс, пыр велöдiс овны сöгласöн, ёртасьöмöн да öта-мöднымöс пыдди пуктöмöн. Вöлi стрöг и шаньöн, челядь зэв ёна радейтiсны садйын мамнымöс вежысьöс. Ме тшöтш вöлi Галина Павлиновналöн шуда быдтасöн, и сьöлöмö пыр кежлö колис сiйö шуда кадыс: быдторйö велöдчöм, ворсöм -сьылöм, мойдъяс кывзöм да с.в.
А кутшöм жö сiйö мича сьылö-йöктö, сы вылö видзöдöмöн быд ногыс вежнясим и ми. Быд асыв Галина Павлиновна вочаавлiс мелi нюмöн, шоныд кывъясöн, сывъявлiс. И таысь ми лунтыр вöлiм кыпыд руаöсь. Дерт, челядь дзолядырйи сюсьöсь, инö ог öшйöй, вильышöсь. Галина Павлиновна кужис лöньöдны да ышöдны кутшöмкö уджö либö öтувтлiс ворсöмö. Кыпöдлiс-ыззьöдлiс и лöнь нывка да зонкаясöс. Велöдiс бура ёртасьны.
Ми нывкаяс ёна радейтлiм ворсны мама-нылаысь. Галина Павлиновна велöдiс лоны бур кöзяйкаöн, вежавидзысьöн. Зонкаяс пö нывъясöс да Айму дорйысьяс, аскиа семья кутысьяс, да налы быть колö лоны ёнöн, сьöкыдлунъясысь повтöмöн. Быд пекнича ворслiм лавкаысь, важ сьöмöн, ас вöчöм тöварöн. Кутшöм гажа вöлi ывлаын гуляйтiгöн. Сад йöрыд ыджыд, сэнi и машина, и исласянiн, чом. Олiм-вылiм ёртасьмöн, кодкö кö мыйкö эз куж либö эз артмывлы, пыр отсавлiм öта-мöдлы. Гежöдика ми ветлывлiм и лавкаö, ог вунöд кыдзи восьлалiм сьылiгтырйи. А кутшöм гажаöсь вöлiсны Выль вося да арся, мамъяслы да батьяслы сиöм да мукöд гажъяс. Сэки эз вöвны компютер да колонкаяс, и миянлы гудöкасьлiс Иван Павлович Сенькин. Галина Павлиновна ачыс лöсьöдлiс гаж нуöданног, сетлiс велöдны кывбуръяс. Быд гаж кежлö выль сьыланкывъяс да йöктöмъяс.
Галина Павлиновна челядь дорын уджалiс комынысь унджык во, кызь кык во воспитательöн да дас öти во веськöдлысьöн. Став сьöлöмнас радейтiс ассьыс уджсö. Быдтiс ныла-пиöс, а öнi лелькуйтö внук да внучкаöс. Галина Павлиновна важöн нин шойч-чöг вылын, олö Улыс Ярашъюын, но пыр сьöлöмыс кыскö чужанiнас. И кор миян Великопольеын кутшöмкö гаж - сiйö гажöдчö миянкöд тшöтш. Аддзысьлiгöн бытьысь сёрнитас садйын быд-мысьяскöд, тöдмалас тöжд-могъяс, нимкодясяс вермöмъяслы, сöвет на сетас и. Пыр бур кывйöн казьтывлöны Галина Павлиновнаöс.
Ме эштöдi нин школа, велöдча Сыктывкарса университетын коми да роч кыв велöдысьö. Мый бöрйи тайö туйвизьсö, ыджыд пайыс Галина Павлиновналöн. Сы моз жö кöсйи уджавны, велöдны челядьöс. Унаöн мунiсны сылöн кок туйöд.
Марина Дёмина
Великополье
