Тöв шöр 27 лунö вöлi Ниналöн Андел лун. Нимлун. Библиотекаын быд во чукöртчылiм небöг радейтысьяскöд да кыпыда пасйим тайö лунсö – конкурсъясöн, викторинаясöн. Асьным корсялiм частушкаяс Нинаяс йылысь да дзоньнас аддзысьлöмсö сиим сьылöмлы. Вöлi зэв гажа. Нинаясöс нимöдöма гижысьяслöн висьтъясын, поэмаясын, повесьтъясын –лыддьысьны радейтысьяслы корсьысьны да юр вем жуглыштны вöлi жö позянлун.

Таво кöсйим жö чукöртчывны да нимöдны Нинаясöс. Ставыс нин вöлi дась, но аддзысьлыны туйсö тупкис пандемия. Библиотекакöд топыд йитöдъяс кутысь Нинаяс йылысь кöть висьтыштам асланым гижöдын. Миян котырын öд сизим Нина.

Пöшти быд лун библиотекаö пыравлö Нина Афанасьевна Попова. Ёна лыддьысьö. Гортас небöгъясыс джаджъяс тыр, мамсяньыс на тшöтш кольöма, и ачыс ньöбалö. Ставсö нин лыддьöма. Татысь куш киöн оз жö мун. Нина Афанасьевна нэмыс велöдöма роч кыв да литература: Паспомын да Кулöмдiнса шöр школаын. 1989-öд воын сетöмаöсь РСФСР народнöй просвещениеын отличник пас. Конкурсъяс да викторинаяс нуöдiгöн Нина Афанасьевна аслас тöдöмлунъясöн ёна отсалö командаыслы.

Нина Алексеевна Нефёдова ыджыд мывкыдлуннас миянлы мам кодь, тöдö олöмсьыс слöйсö, ыджыд сяма велöдысь (РСФСР просвещениеын отличник, Коми АССР-са заслуженнöй велöдысь, Коми Республикаса заслуженнöй уджалысь нима), но та вылö видзöдтöг – вежавидзысь. Кужö йитны сёрни, тайöн сiйö öтвывтö котырнымöс.

Нинаяс лыдын нöшта кык велöдысь: Нина Кимовна Нестерова да Нина Модестовна Попова. Нина Кимовналöн технология урокъясыс велöдiсны том войтырöс уджавны: пусьыны-пöжасьны, шöрасьны-вурсьыны, кысьыны-вышивайтчыны. Технология кабинетсö лöсьöдiс ачыс, сувтöдiс вурсян машинаяс. Сылöн велöдчысьясыс петлiсны вермысьясöн технология кузя олимпиадаясын. РСФСР-са образованиелöн почёта уджалысь нима велöдысь аслас тöдöмлунъясöн да сямöн юксис и том технолог-велöдысьяскöд. А кор чукöртчылам лыддьысянiнö чай чашкаа пызан сайö, Нина Кимовна чöсмöдлö аслас пöжасъясöн.

Нина Модестовна, кодi велöдiс англия кыв Кулöмдiнса шöр школаын, тöдö некымын сикас йöз кыв. Паськыд тöдöмлунъясыс суйöр сайса олöмысь, культураысь, традицияясысь. Тайöс ми важöн нин казялiм. Конкурсъяс да викторинаяс дырйи сылöн бур вочакывъясыс содтöны ёртъяс котырыслы баллъяс. Нина Модестовна мичаа лыддьö мукöд кыв вылын кывбуръяс да висьтъяс. Сэсся миянлы комиöн вуджöдö.

Ми, эськö, гажтöмтчим зэв варов Нина Васильевна Тесленкотöг. Сылöн шмоньыс, кы-пыд руыс ловнымöс восьтö. Ар-лыд вылö видзöдтöг, том йöзысь нинöмöн на оз кольччы. Ачыс тай шуö: челядь дырйи суöм войналöн сьöкыд кадыс пö миян кодьяссö öдъялунöн öжигайтiс. Весиг спортö сетчысьяскöд радын петавлö вöр-ваö, "Пожöма ягын" котыртлöм ворсöмъяс вылö. Лыддьысянiнтö ёна жö радейтö.

Черед воис висьтыштны кык Нина Ивановна йылысь. Öтиыс-Напалкова, пенсия вылö петтöдз велöдiс посниясöс начальнöй классъясын. Бать-мам öнöдз корлöны быдтасыслы отсыштны велöдчöмас, быд гожöм некымынöс школаö пырысьöс дасьтö. Библиотекаö волö тшöкыда, небöгъясысь öтдор лыддьö газетъяс. Мöд Нина Иванов-на - Буткина, журналист, кодi 40 во уджалiс районса "Ленин туйöд" да "Парма гор" газет редакцияын. Öнi на лыддям гижöдъяссö "Парма горысь" да "Коми муысь". Пырö Россияса журналистъяслöн котырö, новлöдлö Коми Республикаса заслуженнöй уджалысьлысь ним. Ассьыным уджъяс дасьтiгöн да вöчигöн унаысь шыасьлам Нина Ивановна дорö отсöгла.

Тайöпöрйö казьтыштiм сöмын пыдди пуктана Нинаяс йылысь. Но нимкодь, мый небöг радейтысьяслöн лыдыс öтарö содö. Долыд и сыысь, джаджъяс вылö вочасöн содтам выль лыддянторъяс. Тшöтш шöр библиотекаын дасьтöмаясöс.

Ольга Кочанова,

Ольга Чисталёва,

Кулöмдiнса шöр библиотекаын уджалысьяс.