Тимшерысь Иван Тимофеевич Паршуков зiль, быдторсӧкужысь, уджач морт. Чужiс 1932-ӧд воын Мысын. Кӧть таво пасйис ӧкмысдас арӧс, а век на вӧралӧ.

Чужанiнас велӧдчис витӧд классӧдз, сы бӧрын пырис уджавны "Выль олӧм" колхозӧ.

Кызьӧд нэм шӧрын заводитiсны воссявны леспромхозъяс. Тимшерса леспромхозӧ и вайӧдiс сэки олӧмыс Иван Тимофеевичӧс. Зiлис шоперӧн, пуксьылiс кран вылӧ, ветлӧдлiс тракторӧн, уджалiс сӧвтчан машинаӧн, кыпалiс бригадир-механикӧдз.

Ӧтлаасис кагаа нин нывбабакӧд. Алексей писӧ дзолядырсяньыс быдтiс ассьыс моз. А сэсся чужисны нёльӧн - Тамара, Светлана, Нэля да Николай. Гӧтырыс кувсьылiс водз. Айловлы мӧдысь усис аддзыны шуд, овмӧдчис шань нывбабакӧд. Олiсны ӧта-мӧдӧс пыдди пуктӧмӧн да гӧгӧрвоӧмӧн.

Чужӧмсянь пармакӧд ёртасьысь мужичӧй нэмсӧ кыйсис-вӧралiс да вотчис. Олӧмын ыджыд туй вуджӧмӧн оз лэдзчысь аслас лов кыпӧданаторйысь. Аслас трактор пысалӧ ичӧтик керка (будка), босьтӧ радио да кайӧ вӧрӧ. Посёлокын нималӧ пыж да лямпа вӧчысьӧн. Эм аслас вӧчасян-дзоньтасянiн, кытчӧ ӧнi на тшӧкыда петавлӧ.

Уна вося бур уджсӧ Иван Тимофеевичлысь пасйӧма юбилейнӧй медальясӧн, почёт грамотаясӧн.

Январ 20-ӧд лунӧ гӧгрӧс пасӧн чолӧмалiсны тӧждӧн кытшалысь дас куим внук-внучка да кызь кык правнук, сиисны дзоньвидзалун да висьталiсны шоныд кывъяс. Олӧма мортӧс ыдждӧдлiсны и Тимшерса юралысь Валентина Андреевна Белова да олӧмаяслӧн котырӧн юрнуӧдысь Галина Николаевна Паршукова, сетiсны козинъяс.