Республикаса коми КВН таво котыртсьӧ дасӧдысь нин. Но сылӧн пыр аслас ним, ӧніяыс сиӧма Коми мулӧн гӧгрӧс паслы, та вӧсна шусьӧ: "Сё арӧсыд ӧтчыд нэмнас овлӧ".
Коми культура шӧринса уджалысьяс висьталӧм серти, буретш найӧ дасьтӧны фестивальсӧ, таво фестивальыс лоӧ ӧшым тӧлысь 10-ӧд лунӧ 17.30-ын, сэні петкӧдчас 8 котыр. Кызвыныс на пӧвстысь унаысь нин пырӧдчылісны коми КВНӧ. Тайӧ изьваса "Бандерлогъяс", Коми-Перым кытшысь "Ёгвуси", Сыктывкарысь "КилоМэтръяс", Кӧрткерӧс районысь "Одыбса репас" да "Коланторъяс", Кулӧмдін районса "Скӧрӧдумсаяс". Вермасьны накӧд кӧсйӧ тшӧтш и неважӧн артмӧм юркарса "Эжвайывса бабаяс" котыр. А медводдзаысь Республикаса коми КВНӧ таво пырӧдчӧ Печораысь "Рӧмпӧштан" котыр.
Найӧ кутасны ордйысьны сӧмын "Вомтыр сьылан, зеп тыр шмонь!" конкурсын, но сэтчӧ позяс пыртны некымын юкӧн: и чолӧмасьӧм, и гортса удж, и СТЭМ, водзвыв дасьтӧм видео.
Став командаыслы КВН-ӧ пырӧдчӧмысь вичмас сьӧма козин. Вермысьлы лоас медводдза тшупӧда диплом да "Медся серамбана рака поз" стутэтка. Мӧд тшупӧда диплом босьтысьлы - "Медся ёсь кывъя рака поз" статуэтка, коймӧд тшупӧдаыслы - "Медся сюсь рака поз". "Вылын юра рака пиян" нимпасын вермысьясӧн лоӧны нёльӧд места босьтысьяс, "Ныриса рака пиян" да "Пӧшти рака пиян" статуэткаяс донъялысьяс козьналасны витӧд да квайтӧд местаясысь.
Шмонитны радейтысьяс чукӧртчасны "Сыктывкар" концертнӧй залын, но QR-кодтӧг видзӧдысьясӧс сэтчӧ оз лэдзны. Билет позьӧ ньӧбны Сыктывкарса коми культура шӧринысь (Бабушкин ул., 31) да "Сыктывкар" концертнӧй залысь (Бабушкин ул., 22)
