Коми Республикаса опера да балет театрын квайтӧд во нин сьылӧ Кӧрткерӧс районса Шойнаты сиктын чужлӧм мича коми ныв Ксения Шабалина.
2016 воын Улыс Новгородын М.И.Глинка нима государственнӧй консерватория помалӧм бӧрын Ксения бӧр воис чужан муас да босьтчис уджавны театрын солисткаӧн.
Сьывны радейтӧмыс ичӧтсяньыс нин вӧлӧма: гортас ёна и нимкодьӧдӧма матыссаяссӧ быдсикас сьыланкывйӧн да петкӧдчӧмӧн.
Ӧні опера да балет театрса сцена вылын нимкодьпырысь и челядьлы мойдын, и верстьӧлы ыджыд спектакльын петкӧдчӧ.
–Ассьым уджӧс зэв ёна радейта, ӧд сійӧ вайӧ меным ыджыд долыдлун. Зіля быд спектакльын петкӧдчыны сьӧлӧмсянь, став вын эбӧсӧн. И кута лача, видзӧдысь тайӧс тшӧтш казялӧ да концерт-спектакль бӧрын бур сьӧлӧмкылӧмъясӧн гортас мунӧ. А кор петкӧдчӧм бӧрын матыстчылӧны дзолюкъяс да окотитӧны киӧд кутлыны, матысяньджык тӧдмасьны – сэки нин дзикӧдз шудӧн тырла, – кывкӧрталіс Ксения.
Галина МАКАРОВА. Снимокыс авторлӧн
