"Коми му" газет юӧртліс нин, мый Кӧрткерӧс районса Висер сиктын бурдӧдысьяс уджалӧны зэр улын, амбулаторияыслӧн вевтыс розясьӧма да. Налы отсӧг вылӧ воӧмаӧсь ставроссияса "Народнӧй фронтын" водзмӧстчысьяс.

Казьтыштам, амбулаториясӧ кыпӧдлӧмаӧсь 1926 воын. Пӧшти нэмӧвӧйся стрӧйбаын некутшӧм сідз шусяна благоустройство абу: шоныд сэтчӧ оз во, колӧ пескӧн пач ломтыны, асмогасяніныс — розь. Важмӧм бурдӧдчанінын вевтыс виялӧ, а, сідзкӧ, гожся зэрыс кӧтӧдӧ, тулыснас лым сылігӧн ваыс уджалысьяслы да висьысьяслы, позьӧ шуны, питшӧгас войталӧ. Медикъяслы ковмылӧ быдлаӧ таз-ведра сувтӧдны, мед кӧть неуна видзны джоджсӧ сісьмӧмысь. А медсясӧ майшасьӧны, мый пӧжар вермас лоны, ваыс ӧд и би проводъяс вылӧ виялӧ.

Висерса бурдӧдчанінын тадзи майшасьӧмаӧсь некымын во нин. Сідз, 2018 воын ставроссияса "Народнӧй фронтын" зільысьяс висерсалӧн корӧм серти шыӧдчылӧмаӧсь республикаса дзоньвидзалун видзан министерствоӧ, мед сиктса амбулаторияын жугласьӧм шиперсӧ вежасны профнастилӧн, а сідзжӧ вежлаласны ӧшиньсӧ, выльысь вольсаласны джоджсӧ. Но дзоньтасьнысӧ ӧнӧдз абу слӧймӧмаӧсь.

Таво гожӧм общественникъяс бара шыӧдчылӧмаӧсь инаяс дорӧ. Кӧрткерӧс районса шӧр больничаӧн веськӧдлысь Алексей Чуркин эскӧдӧма найӧс, мый Висерса амбулаторияын вевтсӧ дзоньталасны матысса кадӧ.

—Та пӧрйӧ збыльысь ӧдйӧ дзоньталӧмаӧсь. Дерт, таысь нимкодь. Но ми бара на шыӧдчим Коми Республикаса дзоньвидзалун видзан министерствоӧн веськӧдлысьяс дорӧ, мед найӧ оз вунӧдны важ амбулаторияын уджалысьяссӧ. Висерын колӧ кыпӧдны выль бурдӧдчанін либӧ тайӧс капитальнӧя дзоньтавны, а не "дӧмлыны". Чинаяслы колӧ видзӧдны и аскиа лунӧ, мед сиктса врачьяс уджалісны благоустроитӧм больничаын, а эз нэмӧвӧйся амбулаторияын, — кывкӧрталӧ- ма регионса ОНФ-лӧн штабӧ пырысь Ольга Федулова.

Екатерина Макарова