Важсьыс гажтӧмтчи да, кольӧмасӧ казьтыштӧм ради ветлі Сизябӧ, кӧні витӧд классӧдз кымын коллявлі гожся каникулӧс вежань ордын. Куим во нин Изьваысь ылӧджык некытчӧ эг ветлы да, окота лои кокӧс веськӧдігмоз сьӧлӧмӧс бурмӧдыштны, мыйкӧ выльтор аддзывны-кывны.

Вежаньлӧн, Нина Степановна Семяшкиналӧн, керкаыс зумыда на сулалӧ, сӧмын тай укшальмӧма-эндӧма овтӧгыд. Керка дорас кайигӧн кыдзкӧ тӧді жӧ туйсӧ. И дзик пыр ылькнитіс-вевтыртіс-петіс син водзӧ важыс, ичӧтдырсяыс. Горш гӧрддзасьмӧнъя лои.

Со тайӧ ордымӧдыс ми вежаньлӧн Сергей внукыскӧд котралім вадорӧ, детсадйӧ, кӧні вежань зілис пусьысьӧн. Либӧ восьлавлім мӧдарӧ, вӧрлань: корӧсь перйыны (буретш Сизябын и велалі сійӧс тэчнысӧ), тшак-вотӧс ӧктыны…

Важ пӧлӧс керкаыс сиктын абу уна, но тырмымӧн. На вылӧ видзӧд-нысӧ весиг любӧ. Вывтасінын стрӧйбаясыс ыджыд йӧраӧсь, ӧшиньясыс вадорлань видзӧдӧны. Нимкодяси нэмӧвӧйся ӧдзӧсъяснас, ӧшинь карнизъяснас, тшӧтш и йӧрас мукӧд стрӧйбанас. Збыльысь нимкодяси-любуйтчи, сы вӧсна мый и рудӧдӧм керъясын визь-потасъясыс, и ӧдзӧс-ӧшиньын вушйӧм краскаыс, и калич-иганыс – ставыс казьтылӧ важысянь зумыда тэчӧм-лӧсьӧдӧм-вужъясьӧм да чужӧмсянь бура тӧдса овмӧс кутанног-оланногсӧ. Тайӧ ставыс – гӧгӧрвоана, аддзана да помтӧг муса збыльвывса мичлун.

Ӧти керка йӧрын дом йылын вӧв. Снимайта. Вӧлыс кыпӧдіс юрсӧ да гӧрӧктіс сэтшӧм гораа, орчча сиктӧдзыс кывмӧнъя. "Абу и серам", – вочавидзи да мӧдӧдчи бӧр туйӧ…

Куш пос перилӧ сайын – юлӧн паськыд от. Тӧв ни ру да, ва веркӧсыс дзик мольыд. Быттьӧ мый водзын кӧ ланьтӧдчӧма-виччысьӧ…

Пуксян шонділӧн югӧръясӧн югзьӧдӧм интернат дорын мудзыс вӧлисти суис.

Сідзкӧ, локтан лунъясӧ позьӧ бара на петавны кузь туйӧ – ветлыны бать рӧдлӧн чужанінас – Мокчойӧ…

Игорь Колесов

Комиӧдіс Елена Плетцер