Важсьыс гажтӧмтчи да, кольӧмасӧ казьтыштӧм ради ветлі Сизябӧ, кӧні витӧд классӧдз кымын коллявлі гожся каникулӧс вежань ордын. Куим во нин Изьваысь ылӧджык некытчӧ эг ветлы да, окота лои кокӧс веськӧдігмоз сьӧлӧмӧс бурмӧдышт-ны, мыйкӧ выльтор аддзывны-кывны.

Сизябын быдласянь воссьӧ вӧр-валӧн зэв мича серпас. А библиотекаыс эськӧ тшук лоис регионса "Библиотекасянь тыдалан медмича серпас" конкурсын вермысьӧн. Изьва керкалӧн лунвыв юкӧнас, да нӧшта на и мӧд судтаас, тайӧ жыръясас югыд да кыпыд. Ньӧти абу окота тась муннысӧ!

Небӧгаиннас веськӧдлысь Татьяна Семяшкина дзик пыр вӧзйис гижӧдчыны библиотекаын да бӧрйыны сьӧлӧм серти книга, мый ме и вӧчи. А нӧшта на гижи ассьым бурсиӧм "Луд" гаж йылысь козьналан петас-небӧгӧ.

Татьяна – "Купальнича" котырын сьылысь Ариналӧн мам. Тайӧ нывкаыс петкӧдчис "Изьва во гӧгӧр" цикллӧн нёльнан клипас. Ысті Ариналы пӧсь чолӧм да янсӧдчи мелі да няня-сола библиотекаръяскӧд. Менам ӧд водзын гидтӧг экскурсия на.

Сиктса клуб дорысь бара казялі тӧдса нывкаясӧс. "Купальнича" котырысь посниулов виччысисны репетиция вылысь нывъёртъяссӧ. Казьтыштім накӧд во сайын "Изьва олӧ!" клип снимайтан здукъяс да вӧчим гоз-мӧд снимок.

Клубас "Увезу тебя я в тундру" сьыланкыв улӧ репетируйтісны йӧктӧм. Мичаник да мусаник "кӧрпиян" збоя йӧктісны наставникыслӧн юрнуӧдӧм улын. Дерт, видзӧдалі клубсӧ. Гӧгӧр гортын моз кыпыд да лӧсьыд.

Колӧ шуны, важся Сизяб сиктӧ ветлӧмӧй ставнас йитчис "Купальничакӧд". Этша на, мый водзвыв сёрнитчӧм серти менӧ вочааліс да нуӧдліс вежаньлӧн эндӧм нин керка дорас тайӧ котырнас веськӧдлысь Валентина Чупрова. Нӧшта на и гортлань бергӧдчан туй вылын вочаасим "Купальничаысь" Яна Малявкокӧд.

Игорь КОЛЕСОВ