Кулӧмдін районса администрацияӧн веськӧдлысьӧс вежысь, тшӧтш и сьӧлӧмӧ йиджана кывбуръяс гижысь Наталья Левченколӧн тайӧ сьыланкывйыс зэв стӧча лӧсялӧ воысь-во мичаммысь да сӧвмысь Кулӧмдін сиктлы, кодлы таво июль 15 лунӧ тыри 375 во.
Кулӧмдін тэ менам, Кулӧмдін,
Статя йӧз да кыпыд оланін,
Ылі му ни саридз мен оз ков,
Тані долыд мен и кыпыд лов…
И збыльысь, ӧтарӧ мичаммӧ да паськалӧ миян юрсикт. Кӧть и мӧдӧд во нин ыджыдалӧ коронавирус, Кулӧмдінын вӧчӧны ставсӧ, мый урчитӧма збыльмӧдны йӧзлысь олӧмсӧ бурмӧдӧм могысь.
Овмӧдчӧминса администрация пырӧдчис "Комфортная городская среда" уджтасӧ да, сы серти лӧсьӧдӧны-мичмӧдӧны районса культура керка водзын эрдсӧ. Кольӧм во вольсалісны асфальт. Майбыр, оз ло дзескыд сэні гажӧдчысьяслы, сьылысь-йӧктысьяслы, а сідзжӧ видз-му овмӧс ярманга вылын вузасьысь-ньӧбасьысьяслы.
Таво тайӧ жӧ уджтас сертиыс эрд вылас сувтӧдісны мраморысь вӧчӧм книга, кӧні вайӧдӧма Эжва йывса нималана гижысь Василий Лодыгинлысь чужан мулы сиӧм кывбурсӧ, орччӧн – "коз пу вылын ур" (вӧрса тайӧ пемӧссӧ серпасалӧма Кулӧмдін районса герб вылын), вӧчӧны сцена, сувтӧдасны шойччан лабичьяс, содтӧд на и гӧгӧрыс бура югзьӧдасны.
Юрсиктын Ручейнӧй улича вылын, кӧні кыпалӧны выль стрӧйбаяс, да кольӧм во лэптісны и бать-мамлӧн дӧзьӧртӧг кольӧм ныв-зонлы кык патераа керка, "Йӧзкостса бюджет" уджтас серти нюжӧдісны 610 метр туй юкӧн, сэні жӧ лӧсьӧдісны кусӧдчан ва видзанін.
Регионса видз-му овмӧс министерстволӧн программаӧ пырӧдчӧмӧн шедӧдісны сьӧма грант. Сы весьтӧ вӧчасны сиктса челядьлы нёль ворсанін, кыкыс лоас кывтыдын да кык жӧ – катыдын.
–Таво кежлӧ адгумлы паныд тышкасьӧм-водзсасьӧм вылӧ торйӧдім сьӧм. Ньӧбим "Агрокиллер" сорас. Видзӧдлам, лоас-ӧ сыысь водзӧсыс. Колӧ куим во дорвыв вонас ӧтчыд резны ӧти и сійӧ жӧ местасӧ. Июнь заводитчигӧн пызйим сорассӧ овмӧдчӧминса администрациялӧн стрӧйба сайын, Великӧй Отечественнӧй война вылӧ ветлысьясӧс казьтылан пас дорын. Киськаланінас коръясыс вижӧдісны, и адгумыс оз нин быдмы-дзоридзав, оз пет и выльыс. Юрсиктын 2,5 гектар вылын ытшким куимысь нин. Колӧ нин бара петавны ытшкынысӧ. Волісны республикаса видз-му овмӧс министерствоысь специалистъяс, накӧд да спорт юкӧнын уджалысьяскӧд лыжиӧн да лыжероллерӧн котраланінын адгумлысь дзоридзалан юръяссӧ гартлім мешӧкъясӧ, мед став кӧйдысыс сэтчӧ и коляс, да арнас чукӧртам. Министерство татшӧм экспериментсӧ нуӧдӧ некымын районын, – висьталіс овмӧдчӧминса администрацияӧн веськӧдлысь Виктор Петрович Игнатов.
Быд тулыс сиктын олысьяс петалӧны пелькӧдчыны, идравны лӧп-ёг. Сӧстӧм лоис и катыдса шойна вылын.
Июльын восьтісны пляж. Вавывса спасательяслӧн ставроссияса котырысь республикаса юкӧн могмӧдіс резина пыжӧн, вышкаӧн да мукӧд коланаторйӧн.
Юрсикт мичаммӧ-бурмӧ и районса администрациялӧн водзмӧстчӧмӧн, уна сикас программаӧ пырӧдчӧмӧн.
Сиктъяс сӧвмӧдӧм кузя государстволӧн программа серти ыджыд удж бергӧдісны Лодыгин, Липин, Спорт, Петропавловскӧй уличаяс вылын, вӧчисны туйяс да нюжӧдісны ва трубаяс. Шогмытӧм нин керкаясын олысьяслы кывтыдын босьтчисны кыпӧдны уна патераа кык стрӧйба. Водзӧ кыпалӧны бать-мамлӧн дӧзьӧртӧг кольӧмаяслы олан керкаяс.
Сиктсалы да гӧсьтъяслы зэв тӧдчанаӧн лоӧ Великӧй Отечественнӧй война вылын усьӧмаяслы пас. Сійӧс воддза воын выльмӧдісны. Сувтӧдісны лабичьяс. Пас дорсянь увланьынджык кералісны бадь кустъяссӧ, вӧчисны лэччан-каян пос да шойччанін.
Таво райадминистрацияысь туй овмӧс кузя юкӧнысь специалистъяслӧн "Йӧзкостса бюджет" проектӧ пырӧдчӧмӧн Сӧветскӧйсянь Шӧр улича вылӧ лэччӧм могысь брусчаткаысь тэчасны моски, а культура управлениеын уджалысьяс кӧсйӧны сы пӧлӧн сувтӧдны сиктын важся олӧм йылысь гижӧд-снимокъяса стендъяс. Овмӧдчӧминса администрация мӧвпалӧ программаясӧ пырӧдчӧмӧн лӧсьӧдны нӧшта ӧти шойччанін.
–Кольӧм сиктын чужис 74 кага, куліс 96 морт. Тавося январь кежлӧ Кулӧмдінын артавсис 6.749 олысь. Йӧзыс оз чин. Юрсиктӧ локтӧны районса сикт-грездысь олысьяс да кыпӧдӧны тані аслыныс керкаяс.
Сиктным паськалӧ-сӧвмӧ, а миянлы, меставывса власьт тэчасын кывкутысьяслы, колӧ водзӧ бурмӧдны йӧзлысь олӧмсӧ, мед быдӧнлы чужан муыс вӧлі медся дона, мед Эжва йывсаяс, торйӧн нин томъяс, эз мунны бур олӧм корсьӧм могысь мукӧдлаӧ, а вужъясисны татчӧ, – кывкӧрталіс Виктор Петрович.
Марина ДАДАШОВА
