Коми Республикаса вужвойтырлӧн шылада-драмаа театр пӧдлаліс ассьыс 29-ӧд театральнӧй сезон.
Коми театр радейтысьяс тӧдӧны, кутшӧм мытшӧдъяс венӧмӧн лоӧ уджавны артистъяслы. Но театрын ёна нюжалӧм дзоньтасьӧмыс эз падмӧд найӧс, да искусство радейтысьяслы козьналісны уна кыпыд рыт. Спектакльяссӧ петкӧдлісны Сыктывкарса администрациялӧн залын, опера да балет театрын, филармонияын.
Яръюгыд аддзысьлӧмъяс вӧліны и театрлӧн ичӧт залын. Видзӧдысьяслы мусмисны "Квартирникъяс". Театрлӧн тайӧ сідз шусяна выль формат: ловъя шылад улӧ юргысь коми да роч романсъяс да, дерт жӧ, артистъяслӧн творческӧй рытъяс.
Коми Республикаса народнӧй артист Александр Ветошкин вӧзйис "Грани творчества" рыт, Коми Республикаса народнӧй артистка Елена Чувъюрова (тайӧ почёт нимсӧ регионса юралысь Владимир Уйба сетіс сылы июньын) — "Менам рольяс — сикӧтш мольяс". Сідзжӧ юргис Оля Санлӧн да Коми Республикаса народнӧй артист Андрей Епанешниковлӧн "Шудлы шуДА" концерт. Петкӧдчис концертӧн театрбердса "Парма" ансамбль, медводдза сольнӧй концерт вӧлі мыла гӧлӧса да енбиа артистка Анна Поповалӧн. Вӧліны и челядьлы петкӧдчӧмъяс. Шуам, Нина Обрезковалӧн "Коді медся мича?" мойд, кӧні режиссёраліс Коми Республикаса народнӧй артистка Алёна Сметанина.
Октябрын да ноябрын театр кыпыда пасйис коми драматург Алексей Поповлы 70 арӧс тырӧм. Юбилейкӧд йитӧдын котыртлісны "Ас кывъя театр" фестиваль, кӧні петкӧдлісны драматурглысь тешъяс, на лыдын вӧлі и "Баба гожӧм" премьера. Тайӧ фестиваль дырйиыс ворсісны и мукӧд коми драматурглысь постановкаяссӧ.
Аслас спектальясӧн да концертъясӧн театр ветлӧдліс и республикаса сикт-грездъясӧ, кӧні видзӧдысьяс век зэв шоныда вочаалӧны ассьыныс радейтана артистъяссӧ.
2020 вося декабрын да 2021 вося январын театр петкӧдліс кык серамбана премьера — "Теш тыш" да "Гажа-курыд теш". Найӧс дасьтӧма серамбана гижӧдъяс серти да йӧзӧдӧма "Теш тыш" нима жӧ небӧгын, кодӧс театр йӧзӧдіс во сайын. Режиссёрыс — Светлана Горчакова. Кодлы мойвиис аддзывны тайӧ кык гажа постановкасӧ, тӧдӧны, мый
серамбана ворсанторъяссӧ босьтӧма олӧмысь. Ӧти акта ворсанторъяс, монологъяс, анекдотъяс йитчӧны сідз шусяна клоунадаӧн. Тайӧ кык яръюгыд постановкаас сідзжӧ уна тешкодь сьыланкыв да йӧктӧм.
Вужвойтырлӧн шылада-драмаа театр май 23 лунӧ опера да балет театрын петкӧдліс зэв ыджыд удж — Олег Уляшевлысь да Светлана Горчаковалысь "Эзысь шабді" лирическӧй теш. Спектакльлысь сюрӧссӧ тэчӧма коми войтырлӧн эскӧмъясысь, традицияясысь, гажъясысь, сьылан-кывъясысь да ворсӧмъясысь. Кыдзи пасйисны видзӧдысьяс, "тайӧ постановкаыс абу сӧмын геройяслӧн радейтчӧм, ёртасьӧм, нимкодясьӧм либӧ шогалӧм йылысь. Тайӧ аслыспӧлӧс спектакль-гаж, коді ловтӧ вӧрзьӧдӧ да сьӧлӧмад йиджӧ".
"Эзысь шабді" постановкаӧн вужвойтырлӧн шылада-драмаа театр петкӧдчис май 28 лунӧ Москваын "У Никитских ворот" театрлӧн сцена вылын Коми Республикалӧн 100 вося юбилейкӧд йитӧдын. Россияса юркарын олысьяслы сьӧлӧм вылас воис спектакльыс, ставӧн сувтӧмӧн дыр клопайтісны.
Коми мулы сиӧм лунъясӧ миян артистъяс петкӧдчисны Москваын да Санкт-Петербургын гала-концертъясын. Москваын тайӧ кыпыд гажыс вӧлі май 31 лунӧ Большой театрын, а Санкт-Петербургын — июнь 7 лунӧ Михайловскӧй театрын.
Августын нин вужвойтырлӧн шылада-драмаа театр восьтас ассьыс выль сезон — 30-ӧдӧс! Август 21 лунӧ Сыктывкарса администрациялӧн залын юргас талы, а сідзжӧ республикалӧн 100 вося юбилейлы сиӧм кыпыд гаж: тайӧ концерт дырйиыс лоӧ нимӧдӧма "Театр под знаком птицы счастья" небӧг — вужвойтырлӧн шылада-драмаа театрлӧн история йылысь медводдза ыджыд петас.
2005 воӧдз сэки Коми Республикаса фольклор театрын на вӧлі дасьтӧма коми фольклор вылӧ подуласьӧмсянь суйӧрсайса классикаӧ босьтчӧмӧдз 90 сайӧ спектакль. Яръюгыд книга-летописьӧ пыртӧма театрлӧн историяысь тӧдчана лоӧмторъяс, аслыспӧлӧс постановкаяс йылысь юӧр-гижӧдъяс, артистъяслысь серамбана казьтылӧмъяс, критикъяслысь да видзӧдысьяслысь донъялӧм, да, дерт жӧ, снимокъяс.
Тайӧ концерт-капустникнас пансяс театрлысь юбилей пасйӧм. Артистъяскӧд тшӧтш спектакльяс пыр, кодъясӧс вӧлі дасьтӧма тайӧ воясӧ, видзӧдысьяс казьтыштасны театрлысь историясӧ. Концертыс восьтас тшӧтш сідз шусяна закулисьесӧ, видзӧдысьяслысь ловрусӧ кыпӧдасны спектакльясысь сьыланкывъясӧн, теш-гажӧн.
* * *
А сентябрын артистъяс ветласны Чечняӧ "Левша" спектакльӧн, кӧні лоӧ национальнӧй театръяслӧн "Федерация" коймӧд фестиваль. Артистъяс гажӧдасны искусство радейтысьясӧс и Котласын.
Выль юбилейнӧй сезонӧ вужвойтырлӧн шылада-драмаа театр козьналас видзӧдысьяслы премьераяс. Тайӧ Владимир Безносиковлӧн висьт серти "Дзор кутш" мелодрама, Николай Щукинлӧн поэма серти "Зарни сюра кӧр" шылада мойд, а сідзжӧ нималана роч классик Фёдор Достоевскийлӧн "Идиот" роман серти "Настасья Филипповна" постановка. Дерт жӧ, юргасны и выль кыпыд концертъяс.
Евгения Савина
