Сыктывкарын вӧчисны томуловлӧн политика нырвизьын водзмӧстчысьяслӧн конкурслы кывкӧртӧд.
Быд во тайӧ ордйысьӧмас зіля пырӧдчӧны Печораысь, Усинскысь, Воркутаысь, Сыктывкарысь, Ухтаысь, Сосногорскысь, Койгорт районысь том войтыркӧд уджалысьяс, торйӧн кӧ, кар-районса администрацияяслӧн юкӧнъясысь, налӧн веськӧдлан (подведомственнӧй) да велӧдан учреждениеясысь юрнуӧдысьяс да специалистъяс.
Республикаса тшупӧдын вермысьяс сэсся петкӧдчасны ставроссияса конкурсын. На лыдын и Печораса "Досуг" культура шӧринын зільысь Олег Исаков.
– Тайӧ конкурсас пырӧдчи медводдзаысь, – висьталіс том морт. – Водзті чайтлі, мый ог вермы тайӧс вӧчны, ӧд уджала ог администрацияын либӧ томуловлӧн шӧринын, а культура учреждениеын. Котыртысьяслысь стӧчмӧді, позьӧ-ӧ меным шыӧдчыны. Вочавидзисны, мый позьӧ. Артмӧ, ме лои культура юкӧнысь медводдзаӧн, коді тайӧ конкурсас пырӧдчис.
Аддзи ӧтуввезйысь юӧр, мый документъяссӧ колӧ мӧдӧдны июнь 10 лунӧдз. Казялі тайӧс, дерт, бӧръя лунас нин, – нюммуніс сійӧ. – Заводиті дасьтысьны-лӧсьӧдчыны. Рытнас юӧртісны, мый шыӧдчан кадсӧ нюжӧдӧмаӧсь 4 лун. Чайтанныд, тайӧ кадколастнас вочасӧн лӧсьӧді колана гижӧдъяссӧ? Эг. Бӧръя войнас ставсӧ помалі. Тӧда, мый оз ков тадзи сёрмӧдчыны, но… сэтшӧм нин ме мортыс.
Заочнӧй тшупӧдын гижим "Тренды и вызовы для современного молодёжного работника" эссе, уна лист бока анкета, колана сценарий. Таысь кындзи Печора карса администрация мӧдӧдіс ошкана гижӧд.
Очнӧй тшупӧдыс муніс Сыктывкарын кык лун. Сэні вочавидзим тестлӧн юалӧмъяс вылӧ да петкӧдчим комиссия водзын. Жюриын вӧліны велӧдан министерствоын уджалысьяс, кольӧмвося татшӧм конкурсас вермысьяс да Сыктывдін районса школаысь велӧдчысь, коді донъяліс миян проектъяслысь ныв-зонлы коланлунсӧ.
Эг весиг мӧвпыштлы, мый лоа вермысьӧн!
Вермӧма! Ӧд томуловкӧд Олег Исаков зільӧ важӧнсянь нин, опытыс ыджыд.
–2014 воын, школаын велӧдчигӧн на, менӧ бӧрйисны веськӧдлыны "За качественное образование" ставроссияса котырлӧн Коми Республикаса юкӧнӧн, – казьтыліс сійӧ. – Сэки жӧ ветлі Тверь обласьтӧ "Селигер" форум вылӧ, кӧні менӧ и ыззьӧдісны татшӧм уджас босьтчыны. Пырӧдчи гранта проектъясӧ, добровольчествоӧ, студентъяслӧн асвеськӧдлӧмӧ…
Чайті, тайӧ лоӧ менам сідз шусяна хобби, но артмис и ассьым уджӧс йитны томулов политикакӧд. Университет помалӧм бӧрын веськалі уджавны Печора карса "Досуг" котырӧ. Проектъясӧс шуи водзӧ збыльмӧдны, дерт, войвылын нин.
Тані быд тӧлысь нуӧдам квизъяс (выль сикас интеллектуальнӧй ворсӧмъяс). Торйӧн нин радейта коми руа гажъяс котыртны. Во чӧжнас татшӧмсӧ уна и нуӧдам! Шуам, котыртлім "гӧгрӧс пызан", кӧні зілим вочавидзны "Колӧ-ӧ паськӧдны-сӧвмӧдны коми кывсӧ?" юалӧм вылӧ. 2019 воын нуӧдім Коми Республикаын олысь томуловлысь съезд, код дырйи дасьтім выль проектъяс, велӧдчим кужӧмӧн вӧдитчыны ӧтуввезлӧн позянлунъясӧн. Сідз шусяна самоизоляция кадӧ котыртлім водзмӧстчысь йӧзкӧд онлайн-аддзысьлӧмъяс. Крепыд йитӧд кутам вуз-ссузкӧд, зілям шедӧдны грантъяс. А таво сентябрын интернетын котыртам войтыркостса йитӧдъяслы сиӧм школа, кӧні ныв-зон кутасны быдса тӧлысь босьтны выль тӧдӧмлун. Дженьыда кӧ, уджным пуӧ!
Ирина Терентьева
