Водзмӧстчы да нинӧмысь эн пов

Водзмӧстчы да нинӧмысь эн пов
Водзмӧстчы да нинӧмысь эн пов
logo

Май помын Санкт-Петербургын муніс Рытыв-Войвыв кытшса вужвойтыр аньяслӧн форум. Зэв нимкодь, мый ми, кык коми ань – ме да Одыбысь коми кыв велӧдысь Ева Кучева – тшӧтш веськалім сэтчӧ. А корис миянӧс тайӧ колана да тӧдчана аддзысьлӧм вылас "Кольское саамское радио" ООО-ӧн веськӧдлысь Валентина Совкина.

Медводдза лунас став Россия пасьталаысь чукӧртчӧм аньяслы психология наукаса кандидат Валентина Лихошева нуӧдіс "Женщина и лидерство" тренинг. Сэтчӧ пырӧдчысьяс мӧвпалісны-корсисны, мый вермӧ вӧчны ас олӧмас нывбаба, мый вылӧ тырмӧ сылӧн вын-эбӧсыс, кыдзи венны мытшӧдъяс, мыйысь оз ков повны – ӧти кывйӧн кӧ, кыдзи лоны лидерӧн-нырщикӧн.

Мӧд лунас миянӧс велӧдісны повтӧг да стӧча сёрнитны йӧз водзын. Москваса комьюнити шӧринӧн веськӧдлысь, филология наукаса кандидат Татьяна Винниченко велӧдіс, кыдзи мӧрччана кывъясӧн шыӧдчыны йӧз дорӧ, медым тэнӧ гӧгӧрвоисны.

Тайӧ кык лунся уджалӧм-велӧдчӧмыс муніс интерактивнӧй технология отсӧгӧн: аддзысьлӧм дырйи эз ков гажтӧм лекция кывзыны, а мӧдарӧ – збоя висьтасьны, кужны мыйкӧ ассяньыд вӧзйыны да водзмӧстчыны, мичаа да повтӧг уна йӧз водзын сёрнитны.

3.jpg

Коймӧд лунас ZOOM пыр кывзім водзмӧстчысь аньясӧс. Саам нывбабаяслӧн форумӧн веськӧдлысь Гудрун Элисса Эриксен Линди, Гренландияса университетысь Сара Ольсвиг, саам консульствоысь вице-президент Аса Ларссон сёрнитісны сідз шусяна гендернӧй равенство йылысь, ӧд тӧдса, мый ӧнӧдз на мирын уналаын айловлӧн да нывбабалӧн правоясыс абу ӧткодьӧсь.

На бӧрын Финляндияысь ас вылӧ уджалысь Юлия Аллеман висьталіс, кыдзи босьтчыны этническӧй туризмӧ, да эскӧдіс, мый быдӧнлы вермас таын отсавны. Юлиялӧн эм ас киӧн вӧчӧмторъясӧн вузасянін.

Форум дырйи сёрни кыптыліс и семьяын аньӧс увтыртӧм йылысь. Колӧ-ӧ терпитны нывбабалы нӧйтӧмсӧ? Код дорӧ шыӧдчыны, веськалан кӧ татшӧм олан мытшӧдас? Сьӧкыд-ӧ лоны ӧтка мамӧн? Став тайӧ юалӧм вылас ми зілим корсьны вочакыв.

Нӧшта ӧти ыджыд да тӧдчана юкӧнын кыпӧдлім тшӧтш и этша лыда войтыръяслысь кыв да культура видзӧм йылысь сёрни.

Тані миянкӧд аддзысьліс Москваса Герцен нима университетын эвенк кыв велӧдысь Надежда Булатова. Тӧдса, мый быдлаын чинӧ чужан кывйӧн сёрнитысьыс. Но быдӧнлы колӧ кужны видзны кыв, культура, традиция, а нӧшта и дорйыны ас-сьыд правоястӧ.

Быд войтыр аслыспӧлӧс, и некодӧс оз позь ӧтдортны!

* * *Форум вылӧ ветлігкості Коми муын вӧлӧма 30 градус жар, а Питер вочааліс миянӧс зэра ыркыд лунъясӧн. Но ми эг майшасьӧй та понда – аддзим кад нимкодясьыштны ыджыд карлӧн мичлунӧн, а тшӧтш и Нева юӧн.

Ыджыд аттьӧ форум котыртысьяслы миянкӧд колана удж нуӧдӧмысь. Уна выльтор да буртор сюркнялім пель сайӧ, тӧдмасим Россия пасьталаысь водзмӧстчысь аньяскӧд. Кутам лача и водзӧ ёртасьӧм вылӧ. Висер сикт, Кӧрткерӧс р.